Read Phom Naga GALATIA 4 Bible Online

GALATIA 4 - Phom Naga bible

GALATIA 4

¹Ngei ehüpeyü ha hih: Mükjüp yahbüthü maanpü hashih vaipü thahshi mop kemei jomi yahhen vaijao aa mü meheyao hayaoha nevai,

²shejao pa-i tetpü nyih mangngoi thahshi yombü hatü jungbüthü phangkü nyunyeih.

³Hanangkü ha aihük mü mechem jenphongao maanpü hashih nyupa, hapa kahdoknyü kü vanglem lempü laanghathü phangkü nyupeih.

⁴Shejao mechem jiüpü hepak lomei peipa, Kahvangi shahkungnyü phangkü nyüha hüki bühhüei laophülei Ha shom.

⁵Büpai hapayü shahkungnyü phangkü nyupüthü angei leihen, hatü jenphongü hapeüthü shingkü ungei yahhen nangkü dükpeih.

⁶Amphongü hapeüthü vaipü nangkü Kahvangi Chehalei Laangha jenei mongdangei shompeih, hatü hapa Laanghai, “Abba!” “Opa!” shei lennyüke.

⁷Hanangkü amphong hajük kü aa hük nevai, shejao hapeü hük, hatü hapeü vaijema, Kahvang homei mükjüp yahpü am nyüke.

⁸Shelei mechem ammi Kahvang nenyingi nyupa, amphongü nyingnyoi kü-üng Kahvang nevaipü kahvangthülei aa vaihampeih.

⁹Shejao shaang ammi Kahvang nyingei peiteke, nevaijü Kahvangi am nyingteke. Shejema mekei etü ammi shao wong nekohpü hatü vanglem lempü laanghathü lemei lepdainya? Amphongi hathü phangkü shao aa vaihüpü je?

¹⁰Ammi hayaoha nyih, len, dühü, hatü vangbong kü mongshuoh-ei münyüke.

¹¹Am shingvaishi ngei dükpü dou lomoh vaidaihen khih shei yingei deihnyüke.

¹²Jeihinaüthü, ngei am kei leipü keiha amao ngei kei leituh shei khümei enyeih. Ammi ngei kü meheyao nejiüpü nedük.

¹³Ngei shongei am touei shahjangmei chongvenpeyü ngei tüngpü nangkü shei ammi nyingnyüke.

¹⁴Ngei tüngpü am shingvaishi hanggovih hük kei vaijao ammi ngei kü neienelemi neno, hatü neyakphong, shejao ammi ngeiyü Kahvangei vangsho phongshan, hatü Jisu Khrista kü kei mongongshi yahpeih.

¹⁵Am hajük mongongshi nyuhampeih, shaang mehe vamküpa? Aokbenüng vailangmeyü ammei mük loukei ngei kü yahphahen vaipü khih shei ngei denpü shuoh-ei eaoknyeih.

¹⁶Am kü shahhing epü nangkü shaang ngei ammei vepa leidaipü je?

¹⁷Hathü shennyakthüi am yawhlanghen am kü longi mong shuohpükei hunyüke, shejao jomei chudeih nemei; ammi jom kü kenhühen shingvaishi am ngei toueipü yantükhen khenyüke.

¹⁸Mükhong mei kü vaijema hapakei mong shuohpeyü hepak peü kü meiangpeih, hatü hapayü ngei am mü nyushi mon nevai.

¹⁹Ngei bampü hashihthü, am kü Khrista mangnyu thahshi hapeü angshingkü tüngpükei ngei nyunyeih.

²⁰Shaang ngei am mü nyupü eema, halangmeyü ngei am nangkü chudeih yeiyahen; mehenangkü ngei am nangkü longi mongshangnyüke.

²¹Ngei kü ha eshih, am üami shahkung phangkü nyuhü, ammi shahkungi epü nebanghen je?

²²Mehenangkü hapa nyangei nyüke: Abrahamei yeshang nyi nyu; hükü aa lanyüi bühpü hatü hükü chenyühai bühpü.

²³Aa lanyülei hapeü-ü phai aimü bühteke, shejao chenyühai bühpü hapeü-ü lahpü aimü bühteke.

²⁴Shaang hapayü büshah kübü nyinghen nyüke: Hapa nyüha nyiyü vangteipü nyi nyüke. Nyüha hük, Hagar-ü Sinai Kahshang leipü aa vaihen hapeüthü bühpü.

²⁵Shaang Hagar-ü Arabia leipü Sinai Kahshang leipü nyüke, hatü pinnyü shaangü Jerusalem kü shenshi nyüke; mehenangkü pinnyü-ü hapeüthü mü aa vaishi nyüke.

²⁶Shejao hükpa nyühayü shangpa leipü Jerusalem kü shenshi nyüke; pinnyü-ü bümei, hatü pinnyü-ü jenei nyü.

²⁷Mehenangkü ha nyangei nyüke: “Mongongtuh, Oh nüng nyülan, hapeü ne-angpü nüng; Mongongpai lenei wongtuh, hapeü anghen tüngpü ne-eepü nüng; mehenangkü yaktükpü nyühalei hapeüthüang baha nyupü nyühalei hapeüthü mao nyeinya nyüke.”

²⁸Shaang jeihinaüthü, jenphongü Isak keiha lahpü kübü hapeüthü.

²⁹Shejao hahepak kü phai aimü bühpü hapeüi Laangha ngani bühpü hapeü kü shüveihampeih. Shaangao ha lakshing nyüke.

³⁰Shejao Laihingi mehe enya? “Aa lanyü hatü cheha nyi changtüktuh; mehenangkü aa lanyülei hapeüi hingshangpü nyühalei hapeü mü mükjüp hanteinüng neaok.”

³¹Ha vaipü nangkü jeihinaüthü, jenphongü aa lanyülei hapeüthü nevai, shejao hingshangpü nyühalei hapeüthü nyüke.