Read Phom Naga EPHESIA 3 Bible Online

EPHESIA 3 - Phom Naga bible

EPHESIA 3

¹Ha tata kü am Kung am men kü Khrista Jisu shingvaishi ngei, Paulü khoklat kü küppü am leipeih;

²hingmei am shingvaishi Kahvang phahji-i ngei kü kangpü shuohpü ammi danei nyüke,

³hatü ngei sholei shah maani nyangpükei shakei vampü homei mekei hapa shahjo ngei kü nyinghüpa,

⁴ha iepai Khristalei shahjo ngei nyingaokpü jung ammi nyingaokhen hih.

⁵Aivang denthü keyü shaang Laanghai büpalei daülangpü phongshanthü hatü thihivamthü kü shakei vamhüpükei hangku kü ha nenyinghüangpih;

⁶ha lappai, Kung amao aihük mü mükjüp yahpü am, büm hük kü aihük phaihan, hatü shahjangmei homei Khrista Jisu kü lahpü kü hean yahpü am leipeih.

⁷Büpalei ngani dou dükpai ngei kü shuohpü Kahvang phahji thintho aimü hapa shahjangmei kü ngei chongphobü hük leipeih.

⁸Ngei Kahvangei nanglakthü maanpü khongkü ahshi-üng maanpü hük vaijao, Kung am kü yemei neaokpü Khristalei mop jung shahjangmei kohen,

⁹hatü peü lingpü Kahvangi peihdaipü denthü kü joei tuhphongpü shahjo peü nih-eikhoei nyinghühen hapa phahji ngei kü shuohpeih;

¹⁰shejüang attoi homei Kahvang kihikon lem laolao vangsholei vanglem lempüthü hatü yemya yapüthü kü nyinghühen.

¹¹Hapayü Khrista Jisu, jenei SHEMBÜPA kü nedohnetenpü mükhong aimü büpai dükei daiteke.

¹²Büpa kü hinglempü homei jen mong longshi hatü monglemshi Kahvang touei peiaoknyeih.

¹³Hanangkü ngei am shingvaishi shangpongpü kü am mong nemahhen nangkü ngei phopnyeih; hathüyü ammei müknyinshekhang.

¹⁴Ha tata kü ngei Pa touei aümei shanyeih;

¹⁵büpa leipü vangsho hatü kahdoknyü kübü shemong peüi hapalei men yahnyeih.

¹⁶Büpalei müknyinshekhang mop shangshi, büpalei Laangha homei büpai ammei mongpa shennyak wong kohhühen ngan shuohhen nangkü,

¹⁷hatü bampü kü am tünglang yiüei chongwongei hinglempü homei Khrista ammei mongdangei nyuhen ngei phopnyeih.

¹⁸Daülangpüthü peü mü mehe bahiyang, shaopü hatü chüpü nyüpa ha yao-aokhen ngan am kü nyuhen,

¹⁹hatü nyingpü peü mü Khrista bampü peü mü nyeishi nyinghen shingvaishi ngei phopnyeih, shejüang amphong Kahvang deiaei peü philei mapai maei nyuhen.

²⁰Shaang jeni phepü hatü deihpü peü kü nyeishi üpai jenei mongkü dou dükpai ha dükei ngoihen aoknya,

²¹büpa kü attoi hatü Khrista Jisu kü denshem peü kü düngei müknyinshekhang nyutuh! Amen.