Read Phom Naga EPHESIA 4 Bible Online

EPHESIA 4 - Phom Naga bible

EPHESIA 4

¹Hanangkü mepa nangkü amphong nyük, ha nyükpü shangshi ammei yangnyu nyuhen ngei, SHEMBÜPA kü khoklatei küpbüi am kü khümnyeih.

²Nenteiaokpü, inyainyempü hatü peü munenpai bampü kü hüki hük mü nenteituh,

³hatü chingmei kü shepei shapai Laangha kü mongjemshi nyuhen kentuh.

⁴Am nyükpü monglem hük kü nyükpü keiha büm hük hatü Laangha hük,

⁵SHEMBÜPA hük, hinglempü hük, baptükpü hük,

⁶Kahvang hük, hatü büpayü peü shak kü nyüke, hatü peü homei hatü lemphülei Pa nyüke.

⁷Shejao jen ieyei kü Khristalei thintho shangshi büpai mongpü shongdak aimü phahji shuoh-ei nyüke.

⁸Hanangkü ha enyüke: “Mechem büpa shangei aongpa, büpai wüpküp leipü longi büpa mü müei lei, hatü hangku kü thintho shuoh.”

⁹Mechem, “Büpa shangei aong” shei ehenshang, “Büpa maaipa kahdokei yiü” shei epü mehe lappüang?

¹⁰Büpa üpa yiü hapa aihüki douthü peü kü büpa mahühen shingvaishi vangshothü peü shak kü peü mü shaoshi aongpeih.

¹¹Büpai shuohpü thinthothüyü hanei am phongshan vaihen, hanei am thihivam, hanei am chongvenbü, hanei am mi yombü hatü hanei am nyuhbü vaihen;

¹²hatü chongphopü dousho kü daülangpüthü temeilemhen, Khristalei büm linghen,

¹³hatü jen peü vaipü kü mongjemei, hatü Kahvangei Ha nyingpü kü behe leiyei Khristalei shaohi-ang thüei manglei thahshi ha dükhen büpai hathü shuohpeih.

¹⁴Jen hajük kü hashih keiha shennyakthüi mih lueilemhen küpjan ten tempü kon kü yungmok kü phongteipükei nenyuhen hatü nyuhpüvenpü aplük pelük kü nepipohen khih.

¹⁵Shejao bampü kü shahhing eyei, Khrista, üpa shangjing nyüpa, lemphü lem kü büpa kü longhen khih.

¹⁶Büpa kü büm kemei shapü hüki shepei shatü nyüke, hatü heanlem peüi laophülei dou dükpai bampü kü büm kemei longei lingnyüpeih.

¹⁷Shaang ngei SHEMBÜPAlei men kü ha kangei enyeih: am hajük kü Kung am nyupükei yahlak neshiüpü chudeih mongdang jüktü tenyu.

¹⁸Jomei danaokpü kon shangmang leidai, jom nelinehapü hatü mongdang vaanpü homei Kahvangi shuohpü yangnyu kübü yandaiteke.

¹⁹Jomi veüshe mahtüktü jomi laophü nyingi iyjeiphailei kü nedaünelangpü lemphü dükhen kennyüke.

²⁰Shejao ammi Khrista nyingpeyü hapa lem kei nevai.

²¹Hingmei ammi büpa jung danteke, hatü Jisu kü nyupü shahhing keiha büpa phei müpü amphong kü nyuhteke.

²²Amphong keyü shongpü yangnyu lem chang, ammei yangnyu chang, lueilemei lemphü kü vaüpai mangtükpü peü yaktükhen nyuhpeih,

²³hatü laangha kü ammei mong ja leihen,

²⁴hatü am nyingi shahhing daülangpü kü hatü kangshangpü kü Kahvang leshi lingpü yangnyu ja owtuh.

²⁵Shejema shahshem yaktüktü jen peüi jenei chingyowpa mü shahhing eshah; mehenangkü jen hüki hük mü büm hük kü phaihan kukpong nyüke.

²⁶Mongshihtuh, shejao mang tethah; am mongshihpai vanghenyü teshüshih,

²⁷hatü ammi kahshih kü shing temei teshuoh.

²⁸Gühpathüi gühpü yaktüktuh; halei meyü taopathü kü lemhük dangkao shuoh-aokhen mü laophülei laki shahhing kü dou düktuh.

²⁹Ammei ju kübü shahten tevamhü, shejao nanglaki napükei jom linghen nangkü mehe nadang nyu, ha etuh, shejüang ammei shahthü bangpü am kü nanglei vaihen.

³⁰Angei leipü nyih shingvaishi am kü füoshang shüngpü Kahvang Laangha Daülangpü mongtemanghü.

³¹Am kübü shahyakpü, lohpü hatü mongshih anpü, depülaopü, ühing itpü hatü lemphü ten dükpü yaktüktuh.

³²Am hüki hük mü bamteituh, hatü bamtei-aungtei mongdang jüktuh, hatü Khrista kü Kahvangi ammei mang tükpükei hüki hükei mang tükteituh.