Read Phom Naga EPHESIA 5 Bible Online

EPHESIA 5 - Phom Naga bible

EPHESIA 5

¹Hanangkü bampü hapeüthü keiha ammi Kahvang anshi nyuhen kentuh,

²hatü Khristai jen kü bampü keiha, hatü Kahvang kü vong meipü jakpü büpa laophü nyingi jen shing shuohpü keiha ammi bampü yangnyu nyutuh.

³Shejao iyjeiphailei hatü nedaünelangpü lemphü, nevaijü hahnempü henüng keipü ammi te-etei; mehenangkü daülangpüthü touei ha jiüpü nevai.

⁴Nevaijü mih huluh shuohhen shah, ngashah, veüshah chemjalak kü ammi tenotei shejao ha nangjeiyei menvih shuohtuh.

⁵Iyjeiphailei, nedaünelangpü shennyak nevaijü hahnempü (hayü lajei kü khümpü hük) üpayao Khrista hatü Kahvang ongching kü mükjüp neshiüpih shei ha nyingtuh.

⁶Amphong üpa kao angsha shah-i telutelemhah; mehenangkü hathü douthü nangkü ven nedanpüthü touei Kahvang mongshihpü peinyüpeih.

⁷Hanangkü ammi hathü mü tejemtei.

⁸Mehenangkü chem am shangmang nyuhampeih, shejao shaang SHEMBÜPA kü amphongü vangngai. Vangngai hathü kei nyutuh;

⁹mehenangkü vangngai betjükü meipü, jiüpü hatü shahhing peü kü dangnyeih.

¹⁰Mepai SHEMBÜPA mong hahhühen ha yemhen khetuh.

¹¹Betjük nejükpü shangmang douthü kü hean teyah, shejao hathüyü shakei ngaihütuh.

¹²Mehenangkü hapa keipü shennyakthüi joei dükpeyü ju kü vamhenao veübenüng hih;

¹³shejao vangngai-i shakei vamhüpü lemphü eedainyeih,

¹⁴mehenangkü eehen mü vampü lemphüli vangngai. Hanangkü ha enyüke: Oh shipü shennyak, paotuh! Dipü kübü yangei leituh, hatü Khristai nüng kü vangngaiphahen.

¹⁵Nüng mekei nyunya lituh — kon nekohpü am kei nevai, kon kohpü am kei nyutuh;

¹⁶hepak mei anglangtuh; mehenangkü nyihthü nemei.

¹⁷Hanangkü am ngashi tenyu, shejao SHEMBÜPAi mongpü mehe, ha nyingtuh.

¹⁸Yiüi techok; mehenangkü delilao nyüpeih, shejao Laanghai maei nyutuh.

¹⁹Hüki hük mü menvih kesho, kesho hatü Laangha kesho-i eteituh; ammei mongdangei SHEMBÜPA kü ünghinyah meipai kesho loktuh.

²⁰Düngei Pa Kahvang kü hatü lemphü shing jenei SHEMBÜPA Jisu Khristalei men kü menvih shuohtuh.

²¹Khrista kü dhüm shuohpü homei am hüki hük phangkü shüteituh.

²²Shembünyüthü, ammi SHEMBÜPA kü kei laophülei bahathü phangkü shütuh.

²³Khristayü attoi kü shangjing, hapa keiha shembünyü shak kü baha shangjing, hatü Khristayü büpalei büm attoi Yangbü nyüke.

²⁴Attoi-i Khrista phangkü shüpü keiha lemphüli kü shembünyüthüi laophülei bahathü phangkü shütuh.

²⁵Bahathü, Khristai attoi kü bam, hatü pinnyü shingvaishi büpa lanei shuohpü keiha laophülei shembünyüthü kü bamtuh,

²⁶shejüang shah homei yungi paüei daüpai pinnyü daülangi leihen;

²⁷hanangkü attoiyü nethe meipü kü, ampü nevaijü khangdaipü nevaijü henüng keipü meheyao neshiüi shejao daülangi kawhikang neshiüi büpa kü shuohtuh.

²⁸Hapa keiha bahathüi laophülei shembünyüthü kü laophülei büm kü bampükei bamhen vongbong. Üpai laophülei nyüha kü bamnya büpai laophü nyingkü bamhahnyeih.

²⁹Mehenangkü üpaiyao laophülei büm kü nejiühitnyih, shejao Khristai attoi kü jungpükei büpai laophülei büm kü ühyingei jungnyeih;

³⁰mehenangkü jenü büpalei büm kü phaihan.

³¹Ha vaipü nangkü baha hüki laophülei pa hatü nyü tuhphongtü laophülei nyüha mü mongjemnyeih, hatü jiji phai hük leinyeih.

³²Hapayü longpü shahjo, hatü ngei hapayü Khrista hatü attoi nyi jung shetei enyeih.

³³Am peüi laophülei nyüha kü laophü kü kei bamtuh, hatü shembünyüi laophülei baha kü dhüm shuohtuh.