Read Phom Naga PHILIPPI 1 Bible Online

PHILIPPI 1 - Phom Naga bible

PHILIPPI 1

¹Khrista Jisulei chongphobü Paul hatü Timoti nyi-i Philippilei nyupü Khrista Jisu kü vaipü nanglakthü, hatü attoi mübü hatü deaconthü touei,

²Jenei Pa Kahvang hatü SHEMBÜPA Jisu Khrista leipü phahji hatü chingmei nyute.

³Am deih-ei dangpü hepak ieyei kü ngei ngelei Kahvang men longnyeih,

⁴ngei phoppü shan ieyei kü am peü shingvaishi mongongpai nedoh-i phopnyeih;

⁵mehenangkü shongpü nyih kübü shaang ngoishi amphongi shahjangmei kü hean yahteke.

⁶Üpai am touei doumei chongpang, hapa Jisu Khristalei nyih thahshi kü temhen shei ngei monglempü nyüpeih.

⁷Am peü nang hapakei deihhenü ngei shingvaishi jiüpü khih; mehenangkü am peü ngelei mongei nyüpeih; ngei khoklatei nyujao nevaijü shahjangmei nangkü khangtei shingkü nevaijü hapa nih-ei venshingkü ammi ngei mü hapa Kahvang phahji kü hean yahpeih.

⁸Khrista Jisu bampü kü am peü nangkü ngei mekei ongyangnya ha jung Kahvangü ngelei denbü nyüke.

⁹Ngei phoppeyü nyingpühingpü hatü yao-aokpü koni maei am bamteipü aüh-ei yenhen,

¹⁰hatü Khristalei nyih kü amphong daülangi hatü eela neshiüi mehe peü mü mei ha jeaokhen,

¹¹hatü Kahvang müknyinshekhang hatü menvih shingvaishi Jisu Khrista homei peipü daülangshemshepü betjük maei nyuhen shingvaishi nyüke.

¹²Jeihinaüthü, ngei kü mehe vam, hapai shahjangmei anyei yaüei daihen kü hingmei sheühpü khih shei am kü nyinghünyüke.

¹³Ha tata kü ngei Khrista shingvaishi khoklatei nyüke shei ongshem kempülei hatü shennyakthü peüi nyingdaiteke,

¹⁴hatü ngei khoklatei nyupü nangkü Khrista kü jeihinaüthü longshi shing nyeinya monglongei nenyemi Kahvangei shah eteke.

¹⁵Hanei amiyü mükhakpü hatü khüpü homei Khrista jung venteke, shejao lebüthüi mei deihshi venteke.

¹⁶Shahjangmei yangei tuhhen nangkü ngei khoklatei küppeih shei nyingei jomi Khrista jung chongven.

¹⁷Lebüthüi ngei kü khoklatei nyeinya ngelei hanghi nyeihühen nangkü hingshangpai nevai, shejao chudeih ten kü Khrista jung chongventeke.

¹⁸Hapai mehe vampa? Chudeih ten kü vaijao, hingshangpü kü vaijao Khrista jung chongventeke; ha vaipü nangkü ngei mongongnyeih, Hih, ngei nedoh-i mongonghen;

¹⁹mehenangkü ammi phoppü hatü Jisu Khristalei Laanghai sheühpü homei ngei mehe ponghah, ha kübü yanghen shei ngei nying.

²⁰Ngei ongyangpü hatü monglempeyü ngei mekei etao neveühen, shejao ngei monglongei epai yemmü nyujao nevaijü didaijao düngei nyupü keiha shaangao ngelei büm kü Khrista longei anshihhen.

²¹Ngei shingvaishi yemmü nyupeyü Khrista, hatü dipeyü nanglei nyüpeih.

²²Ngei ha phai kü yemmü nyuei daijema ngei dükpü dou kü nyeinya betjük jükhen, shejao ngei mepa jehen nenying.

²³Ngei ha nyi aa kü thamapü kü nyüpeih. Ngei diyei Khrista mü nyudaihen ha-üng nyeinya meipü khih;

²⁴shejao ngei yemmü nyuhen-üng am shingvaishi nadang khih.

²⁵Ngei ha mongkü pongpeih, ngei yemmü nyuhen shei ngei nying, hatü vaipü kü am longhen hatü mongonghen shingvaishi ngei am peü mü nedoh-i nyuhen,

²⁶shejüang ngei shao am touei peishingkü Khrista Jisu kü am mongongpü aüh-ei yenhen.

²⁷Khristalei shahjangmei-i napükei ammei yangnyu dei-aei nyutuh; ngei peiyei am mü pongjao nevaijü ngei nepeijao am jung danhen, shejüang amphong laangha hük kü mong hük leiyei shahjang meipü kü hinglemei wong kohshi yaongnyüke shei ngei nyinghen,

²⁸hatü am khüpüthüi am nenyemhühen. Jom shingvaishi hapayü jom mahhen nyangeihepü, shejao am shingvaishiyü yemleipü nyüke, hatü hayü Kahvangi dükpeih.

²⁹Mehenangkü hapayü Khristalei men kü hinglemhen mon nevai, shejao büpa shingvaishi shangponghenao am kü shuohpeih.

³⁰Ngei ponghahpü shangpong ammi eeyei nyupü aihük shangpongi am shaang ponghahnyüke, hatü shaangao ngei ponghahpü ammi dannyüke.