Read Phom Naga PHILIPPI 3 Bible Online

PHILIPPI 3 - Phom Naga bible

PHILIPPI 3

¹Shompülei ngelei jeihinaü hatü nyahinaüthü, SHEMBÜPA kü mongongtuh. Aihük douthü jung shao am touei nyanghenü ngei shingvaishi shanghah nevai, hatü hayü am shing yanglem nyüke.

²Shithü kü lituh, douten dükpüthü kü lituh, phai vetteipüthü kü lituh.

³Hingshangi japtükpeyü jenphong, Kahvang Laangha kü khümpü, hatü Khrista kü changmeihen hatü phai kü monglemhen changshi nyujao phai kü mong nenyangpeyü jenphong.

⁴Shennyak hanei-i phai kü monglemhen mü nyujema, ngei-ang nyeishi nyüpeih:

⁵nyih shetpabü kü japtükpü, nyübüh-i Israel nanglak hük, Benjamin phang kübü, Hebrew li kübü Hebrew am, shahkungnyü philei Pharisee am,

⁶nyakpükenpü philei attoi kü shüveipü, shahkungnyü phangkü daülangpü phikü eela neshiüpü.

⁷Shejao ngei mehe mehe nanglei dang, shaang ngei Khristalei men kü lomoh shei deihnyeih.

⁸Ha mü nyeishi Khrista Jisu ngelei SHEMBÜPA nyingpü peü mü longpü nanglei mü shetteijü lemphüli lomoh khih shei ngei ieyeilemnyeih. Büpalei men kü ngei lemphüli lomohtükpeih, hatü ngei hathü kü nyüphinya shei enyeih, shejüang ngei Khrista danghen,

⁹hatü shahkungnyü leipü peipü ngelei daülangshemshepü nevai, shejao Khrista kü hinglempü homei hinglempü kü laphentü vampü Kahvang leipü daülangshemshepü kü nyuei ngei büpa kü eehen.

¹⁰Ngei Khrista hatü büpa yangei leipü ngan nyinghünyeih, hatü büpa dipü kü büpa kei leiyei büpa shangpongpü kü hanteihünyeih.

¹¹hatü dipü kübü yangei leihen monglemnyeih.

¹²Ngei ha peü dangtih nevaijü ngei changpüshapü ngoitepih shei nevai, shejao ngei hapayü ngelei vaihen shei changei dainyeih; mehenangkü Khrista Jisui ngei büpa lompü leihü.

¹³Jeihinaüthü, ngei ha ngelei lompü leihütih shei nevai, shejao ngei ha dou hük düknyeih: ngaümpheilei mehe nyu, ha betüktü sheshalei mehe nyu, ha changei,

¹⁴Khrista Jisu kü vangsho lemei Kahvangi nyükpü thintho danghen shingvaishi ngei ha mükhong philei moknyeih.

¹⁵Jen meshüki behe lei, mong hük mü nyushah, hatü lemhük nangkü ammi lebükei deihshi nyujema, hayao Kahvangi am kü shakei vamphahen.

¹⁶Jeni mehe dangaok, ha kü mon wongshongi shoungtü nyushah.

¹⁷Jeihinaü hatü nyahinaüthü, ngei kü veiyei ngei kapituh, hatü hami am kü epü yangnyu lappükei nyupüthü kü veituh.

¹⁸Mehenangkü longshi shing Khristalei shophang kü vepathü kei nyunyüke; ngei düngei jom nang ehampeih, hatü shaang ngei am kü mükphi mü enyeih.

¹⁹Jom dohpeyü mahpü; jomei Kahvangü jomei shünyü, hatü jomei müknyinshekhangü jomei veüpong kü nyüke; jomei mongü kahdoknyü douthü kü tuh-ei nyüke.

²⁰Shejao jenei bühü heanü vangsholei nyüke, hatü jeni haleipü Yemleibüpa hük, SHEMBÜPA Jisu Khristai omdannyüke.

²¹Büpai jenei wong nekohpü büm yeiyahüei mepa ngan homei dou peü büpa phangkü shümei tuh-aok, hapa büpalei müknyinshekhang büm kü jen shepei ja leidaihen.