Read Phom Naga KOLOSI 3 Bible Online

KOLOSI 3 - Phom Naga bible

KOLOSI 3

¹Hanangkü amphong Khrista mü dipü kübü yangei leipü vaijema, shangphi leipü douthü, melei Khrista Kahvangei lakdah philei uoshi nyu, ha yemtuh.

²Kahdoknyü douthü kü nevai, shangphi leipü douthü kü ammei mong tuhtuh;

³mehenangkü am diteke, hatü ammei yangnyu-ü Khrista mü Kahvang kü joshi nyüke.

⁴Mechem Khrista, ammei yangnyu shakei vamkahen, hahepak kü amphongao müknyinshekhang kü büpa mü shakei vamhen.

⁵Hanangkü am kü nyupü kahdoknyü nyingnyoilei douthü peü dihütuh: iyjeiphailei, nedaüpü, iyhiphai-i napü, ten vaüpü, hahnempü (mepa yaongnaüya khümpü nyüpa),

⁶hathü nangkü ven nedanpüthü touei Kahvang mongshihpü peinyüke.

⁷Hapa yangnyu kü nyushi amphongao chem hapa lemthü kü kamhampeih.

⁸Shejao shaang ammi hakeipü douthü peü yaktükhen vongbong: mongshih anpü, mongpuk vampü, mih kü lak shihpü, ühing itpü, ammei ju kübü veüshah epü tüktuh.

⁹Am hüki hük mü shahshem te-e; mehenangkü ammi hathü dükhiling mü shennyak chang yaktükteke,

¹⁰hatü Lingbülei lajei aimü nyingpühingpü kü ja leiyei shennyak ja owteke.

¹¹Hapa ja lingpü kü hajük kü Greek hatü Jehoda, japtükpü hatü nejappü, lemphü kü ngaümpheilei nyupü am, Sithia am, aa hatü bümei shei neshiü, shejao Khristayü peü kü peü.

¹²Kahvangi jelangpü hük, daülangpü hatü bampü leshi phahji, bampü, maanpü leipü, nenteiaokpü, munenpü owtuh.

¹³Hüki hük mü nenteiaoktuh, hatü hüki hük khüei nyujema mang tükteituh. SHEMBÜPAi am kü mang tükpükei tükteituh,

¹⁴hatü hathü mei peü shak kü hingshangi mongjempü kü chemi shepei shahüpü bampü owtuh.

¹⁵Khristalei chingmei-i ammei mongkü vanglem lemhütuh; ha shingvaishi büm hük kü phaihan hük leiyei chingmei nyuhen am nyükpeih. Ha kü am men vihtuh.

¹⁶Mop keiha Khristalei shah ammei mongkü maei tuhtuh; kihikon kempü kü hüki hük kü nyuhteituh, hatü nangthongteituh, hatü ammei mongei mongongpai Kahvang kü menvih kesho, khümpü kesho, hatü laangha kesho lokeishuoh.

¹⁷Ammi mehe dükhen, shah kü vaijao dou kü vaijao, lemphüli SHEMBÜPA Jisulei men kü büpa homei Pa Kahvang kü menvih shuoh-ei düktuh.

¹⁸Shembünyüthü, amphongi laophülei bahathü phangkü nyutuh, hayü SHEMBÜPA touei jiüpeih.

¹⁹Bahathü, ammei shembünyüthü kü bamtuh hatü jom kü nemei-i teno.

²⁰Hashihthü, lemphü kü amphongi laophülei nyühipalei ven bangtuh; mehenangkü SHEMBÜPAi ha kü mong hahnyeih.

²¹Pathü, amphongi laophülei hapeüthü kü teloh, hei nevaijema jomei mong tendaihen.

²²Aathü, ammi kahdoknyü kübü ammei shembü kü lemphü kü jomi eehen hatü mong hahhühen shingvaishi nevai, shejao mongdang kempai SHEMBÜPA kü nyemei ven bangtuh.

²³Ammei dou mehe nyu, hapa kü shembü kü düknyu keiha nevai, SHEMBÜPA kü düknyu kei kenei düktuh.

²⁴Laklei vaishi SHEMBÜPAleipü mükjüp danghen shei ammi nyingei nyüke. Hapayü SHEMBÜPA Khrista amphongi chongphonyeih.

²⁵Mehenangkü nejiüpü dükpü am kü mehe mehe jomi nejiüi dük ha kü shemhen, hatü halei baong hanpü neshiü.