Read Phom Naga 1 THESALONIKA 1 Bible Online

1 THESALONIKA 1 - Phom Naga bible

1 THESALONIKA 1

¹Paul, Silas hatü Timoti leipü Pa Kahvang hatü SHEMBÜPA Jisu Khrista kü Thesalonika attoi touei phahji hatü chingmei nyute.

²Am peü shingvaishi hami düngei Kahvang kü menvih shuohnyeih, hatü hami phoppü kü chengei am omshi,

³jenei Kahvang hatü Pa touei ammei hinglempü dou, bampü dou, hatü jenei SHEMBÜPA Jisu Khrista kü wongshongi monglempü deih-ei dangnyeih.

⁴Kahvangi bampü jeihinaü nyahinaüthü, büpai am jeteke shei hami nyingnyüke;

⁵mehenangkü am touei shahjang meipeyü shah kü mon nevai, shejao ngan kü hatü Laangha Daülangpü kü hinglemhen mü peipeih. Ammei men kü am touei ham mekei nyuei daipa ammi ha nyingei nyüke.

⁶Ammi ham hatü SHEMBÜPA kapiteke; ammi shüveidoidei pongjao Laangha Daülangpai shuohpü mongong mü ammi shahjangmei mongongshi yahteke.

⁷Hanangkü amü Macedonia hatü Akhaia kü vaipüthü peü touei lappü meipü leiteke.

⁸Mehenangkü SHEMBÜPAlei shah am leipü yanei deishihpeyü Macedonia hatü Akhaia kü mon nevai, shejao shing peüei Kahvang kü ammi hinglempü nyingdaiteke; hanangkü hami ha jung ehen napü neshiü;

⁹mehenangkü ammi ham mekei mongongshi yah, ha jom nyingi shah-om shuohteke. Vanyangyem hatü hingshangpü Kahvang chongphohen shingvaishi am mekei lajei kübü mong lepei Kahvang touei leipa,

¹⁰hatü vangsho leipü Cheha Jisu, üpa büpai dipü kübü yangei leishih, hatü ngoikahen mongshih kübü jen yangnya, jomi ha jung enyüke.