Read Phom Naga 1 THESALONIKA 2 Bible Online

1 THESALONIKA 2 - Phom Naga bible

1 THESALONIKA 2

¹Jeihinaü hatü nyahinaüthü, am touei ham peipeyü angsha nevai shei am nyingi nyingei nyüke,

²shejao ham shangpongjao hatü Philippilei veüshi nemei-i dükphüjao jenei Kahvang kü khüpü longi nyujao Kahvangei shahjangmei am kü baonghen monglongshi nyupü ammi nyingei nyüke.

³Mehenangkü hami baongpü shahjangmeiyü lueilempü nevaijü nedaüpü chudeih nevaijü glüp kohpü kübü nevamnyih,

⁴shejao shahjangmei kohen Kahvangi mongei jepü shennyakthü keiha enyeih. Hami shennyakthü nevai, jenei mongdang dokpü Kahvang mongmeihühen khenyeih.

⁵Hami am touei yawhshah eshi nevaijü ham hahnempü jümtükhen shahmei eshi nepei shei ammi nyingei nyüke — Kahvangü hamei denbü.

⁶Hami hangku leipü lappai, am leipü nevaijü üpa leipao vihpülüpü neyem.

⁷Khristalei phongshanthü vaipü nangkü hami am kü hanggovih vaihühen vaipeih, shejao nyü hüki laophülei hapeü kü deipümeipü keiha am touei ham nenteiaokei nyupeih.

⁸Hami am kü ahshi bampü nangkü hami am kü Kahvangei shahjangmei hanhen mon nevai, shejao hamei yangnyuao am mü hanteihen temei nyupeih; mehenangkü amü ham shingvaishi longi bamhübenüng leiteke.

⁹Jeihinaü hatü nyahinaüthü, hami am kü Kahvang shahjangmei baongshingkü am üpa kao hanggovih nekohühen shingvaishi ham nyakhingai thüngei nyiueinangei dou dükpü ammi deih-ei dangtuh.

¹⁰Am vaipüthü touei ham mekei daülangi, jiüshi hatü eela neshiüi nyupa, am hatü Kahvangao ha denbü nyüke.

¹¹Mehenangkü pa hüki laophülei hapeüthü kü nopü keiha hami am kü,

¹²mongnang thongei, nyiushem meihüei, hatü Kahvangi büpalei ongching hatü müknyinshekhang kü am nyükpü shangshi yangnyu nyuhen deipümeipü ha ammi nyingei nyüke.

¹³Mechem hami venpü danei ammi Kahvangei shah yahpa, ammi hayü shennyakei shah kei nevai, shejao mepa am vaipüthü kü dou düknya, hingshangpü Kahvangei shah shei ammi ha yahpeih.

¹⁴Mehenangkü jeihinaü hatü nyahinaüthü, amphongü Khrista Jisu kü Judealei nyupü Kahvangei attoithü kapipü am leiteke; mehenangkü jomi Jehoda am leipü shangpong heüpükei amphongao laophülei kahmük kübü shennyakthü leipü aihük shanghah dangteke.

¹⁵Jomi SHEMBÜPA Jisu, hatü thihivamthü jütük, hatü hamphongao changtük; jomi Kahvang mongneonghü,

¹⁶hatü Kung am yanghen shingvaishi ham kü chongteven shei khüampai shennyak peü mü khetnyüke. Hapakei dükpai jomi jomei mang hanggo mahünyüke, shejao shompülei Kahvang mongshih jom shak kü peiteke.

¹⁷Shejao jeihinaü hatü nyahinaüthü, mechem hepak kansho hük shing hashihhathü kei jen yanei nyupa (mongdeih nevai, büm yanpü), am mü dhe dhe gongei pongteihen longi ongyangei deihpeih.

¹⁸Mehenangkü ham am touei peihüei nyupeih — hingmei ngei Pauli shao-üng ponghüei deihpeih, shejao Satani lem bangtükpeih.

¹⁹Mechem SHEMBÜPA Jisu yiühenshang, büpa touei hamei monglem, hamei mongong nevaijü ham müknyinshekhanghen hamei athen mehe nyuhen? Hayü amphong nevaipü je?

²⁰Hih, amphongü hamei müknyinshekhang hatü mongong!