Read Phom Naga 1 THESALONIKA 3 Bible Online

1 THESALONIKA 3 - Phom Naga bible

1 THESALONIKA 3

¹Hanangkü hami ha nenenaoki Athenei heih-ei nyudaijü meihen khih shei deihpeih.

²Hanangkü hapa shüveidoidei homei üpayao nejenlenhen shingvaishi Khristalei shahjangmei baongpü kü chemi Kahvang chongphopü Timoti, hamei jeihinaü am vaipü kü wong kohhühen hatü mongnang thonghen shingvaishi shompeih.

³Jeni ponghenü demtükpeih shei amphongiyao nyingei nyüke.

⁴Jen shüveidoideipü ponghen shei hamphong am mü nyushi yeihshi am kü etepih, hatü ammi nyingei nyupükei ha vampeih.

⁵Ha vaipü nangkü ngei ha nenaokpü nangkü am vaipü jung nyinghen büpa am touei shompeih; dokpü ami am kü dokpai hami dükpü dou angsha vaidaihen khih shei yingei deihküpeih.

⁶Shejao shaang Timoti am toueipü leiyei ngoiteke, hatü am vaipü hatü bamteipü jung shahjangmei leiküteke. Hami am mü ponghüpükei ammi düngei ham mü ponghüpü jung büpai ekütih.

⁷Hanangkü jeihinaü hatü nyahinaüthü, ham ponghahpü hatü shüveidoidei kü nyuyang peü kü am hinglempü homei am nangkü ham kü mongnang thongteke.

⁸Ammi SHEMBÜPA kü wongshongi yaongjema, ham shaang yemmü nyüke.

⁹Am nangkü Kahvang touei hami dangpü mongong shangshi mekei etü hami am shingvaishi Kahvang kü menvih changshi nyokei shuoh-aokhenang?

¹⁰Hami am mü dhe dhe gongei ponghen hatü am vaipü kü mehe taoei nyu, ha shuohhühen nangkü nyakhingai thüngei lanei phopnyeih.

¹¹Shaang jenei Kahvang hatü Pa büpai hatü jenei SHEMBÜPA Jisui am touei ham peiaokhen lem nyemhuphama.

¹²Hami am kü bampükei SHEMBÜPAi am bamteipü hüki hük mü, hatü peü mü aüh-ei yenshi nyemlonghü.

¹³Jenei SHEMBÜPA Jisu, büpalei daülangpüthü peü mü yiüshingkü jenei Kahvang hatü Opa touei am eela neshiüi hatü daülangi nyuhen shingvaishi büpai ammei mongdang wong nyemkohhüma.