Read Phom Naga 1 THESALONIKA 5 Bible Online

1 THESALONIKA 5 - Phom Naga bible

1 THESALONIKA 5

¹Jeihinaü hatü nyahinaüthü, shaang hepak hatü nyih nangkü am kü nyanghen napü neshiü;

²mehenangkü SHEMBÜPAlei nyih-ü yanüng gühpa hük peipü keiha peikahen shei ammi meishi nyingei nyüke.

³Mechem shennyakthüi, “Halei chingmei hatü nyiushemmei nyüke” shei ehen, nyüha hük hapeü anghen tüngpükei ngangahük kü jom touei mahpü peihen hatü üpayao neyangaokhen.

⁴Shejao bampüthü, hapa nyih kü gühpa hüki keiha am nehanhühen shingvaishi amphong vangnyak kü nenyu.

⁵Am peü kemei vangngai hatü nyihnüngei hapeüthü. Jenphongü vangnyak hatü shangmangei nevai.

⁶Hanangkü lebüthü kei jen shishi nenyushah, shejao jeni mükpaonathashi ungei-aeiyei nyushah.

⁷Mehenangkü üam shinya, vangnyak kü shinyeih, üam yiüi choknya, vangnyak kü choknyeih.

⁸Shejao jenphong vangngailei vaipü nangkü jen ungei-aeiyei, hinglempü ow owtü, bampü jaküpnyiam küptü hatü yemleipü monglem nyiam athen thenshah.

⁹Mehenangkü Kahvangi jenphong büpalei mongshih ponghahhen neje, shejao jenei SHEMBÜPA Jisu Khrista homei yemleipü danghen jepeih.

¹⁰Büpa jen shing di, hanangkü jen yemmü nyujao nevaijü didaijao jen büpa mü chemi nyuhen.

¹¹Hanangkü ammi shaang dükpükei am hüki hük mü nangthongteituh, hatü hüki hük lingei leituh.

¹²Shaang jeihinaü hatü nyahinaüthü, üami amphong mü dou düknya, hatü SHEMBÜPA kü am shak kü nyu hatü am kü vennya jomphong kü dhüm shuohtuh;

¹³Jomei dou nangkü bampü kü jomphong peü mü shaopü dhüm shuohtuh. Hüki hük mü chingmei kü nyutuh.

¹⁴Jeihinaüthü, vaükpüthü kü shahvüng shuohtuh, mong laaidaipüthü mongyanghütuh, wong nekohpüthü kü sheütuh, peü mü nenteiaoktuh shei hami am kü nangthongnyeih.

¹⁵Am üpaiyao ten kü ten neshemhen lituh, shejao düngei hüki hük mü, hatü peü mü mei dükhen kentuh.

¹⁶Düngei mongongtuh;

¹⁷nedoh-i phoptuh;

¹⁸hepak vangpan peü kü menvih shuohtuh; mehenangkü hayü am shingvaishi Khrista Jisu kü Kahvangi mongpü nyüke.

¹⁹Amphongi Laangha aw temettük;

²⁰thihivam shahthü ne-ienelemi teyaktük,

²¹shejao lemphüli kü dokei veituh; meipü mehe nyüpa, ha kü shoungtuh;

²²ten lemphü kübü yanei nyutuh.

²³Chingmei Kahvang, büpai am chemjalak kü daüphahen, hatü jenei SHEMBÜPA Jisu Khrista yiüshingkü ammei laangha, yangnyu hatü yembüm meishi hatü eela neshiüi tuhhen.

²⁴Üpai am kü nyük, büpayü shahhing hatü büpai ha dükhen.

²⁵Jeihinaü hatü nyahinaüthü, hamphong shing phopshih.

²⁶Daülangpü om kü jüpteipai jeihinaü hatü nyahinaüthü peü kü selam shuohtuh.

²⁷Hapa lai jom peü touei ietuh shei SHEMBÜPAlei men kü ngei am kü ngeükhüam shuohnyeih.

²⁸Jenei SHEMBÜPA Jisu Khrista phahji am mü nyute.