Read Phom Naga JOSHUA 1 Bible Online

JOSHUA 1 - Phom Naga bible

JOSHUA 1

¹SHEMBÜPA chongphobü Mosa dipheikü SHEMBÜPAi Nunei cheha Joshua, Mosalei sheühbü kü eteke:

²“Ngelei chongphobü Mosa didaiteke. Israel am kü ngei shuohhen shei epü kahdokei Jordan yung homei daihen nüng hatü nanglakthü peü layaonghen temtuh.

³Ngei Mosa kü lahpükei ammei la-i shouppü shing peü am kü yahphahen.

⁴Ammei kahdok jahpan kübü Lebanon thahshi, hatü longpü yingnyü Euphrates kübü Hit amei kahdok peü homei heshüphi kü Mediterranean Yungching thahshi nyuhen.

⁵Nüngei yangnyu den kemei üamiyao am khüei neyaongaokpih. Ngei Mosa mü nyupükei ngei nüng mü nyuhen; ngei nüng kü neshaiphapih nevaijü nüng netuhphongpih.

⁶Nüng wong kohtuh, monglongtuh; mehenangkü ngei jom kü shuohhen shei jomei chebü chepa kü lahpü kahdokei nüngi jom müei daihen.

⁷Nüng wong kohtuh hatü longi monglongtuh. Ngelei chongphobü Mosai nüng kü shuohpü shahkungthü banghen kentuh; nüng dailem peü kü aokpü danghen shingvaishi ha kübü laknyong lakdah shei teleplük.

⁸Hapa shahkungnyü laitap nüngei ju kübü teyanhü; halei nyangei nyupü lemphü dükhen shingvaishi nyihjeih yajeih hapa yemtuh. Shejüang nüngi moihiman hatü aokpü danghen.

⁹Nüng wongkoh monglonghen shingvaishi ngei nüng kü etepih. Nüng tenyem nevaijü mong temaan; mehenangkü SHEMBÜPA, nüngei Kahvang nüng dailem peü kü nyukahen.”

¹⁰Hanangkü Joshua-i nanglak mübüthü kü ngeükhüam shuoh.

¹¹Ammei baümtap shinei daituh hatü nanglakthü kü, “Hahying temtuh; mehenangkü nyih jem mongkü SHEMBÜPA, ammei Kahvangi am kü shuohpü kahdok yahhen shingvaishi Jordan homei daihen” shei eteke.

¹²Shejao Reuben, Gad hatü bhaosheipü Manasseh phang kü Joshua-i eteke,

¹³“SHEMBÜPA chongphobü Mosai am kü shuohpü shahkung deih-ei dangtuh: ‘SHEMBÜPA, ammei Kahvangi am kü nyiushemmei shuohteke, hatü hapa kahdok am kü shuohhen.’

¹⁴Ammei nyühihathü, yemhimak kemei Mosai epükei Jordan yungdangei tuhtuh, shejao ammei veshanthü vehok phunglang ow temtü ammei jeihinaüthü shekü yungdang homei sheühhen heihtuh.

¹⁵SHEMBÜPA, ammei Kahvangi am kü shuohpü kahdok kü am nyiushem meipükei SHEMBÜPAi jom kao nyiushemmei mangshuoh thahshi amphongi ammei jeihinaüthü kü sheühtuh. Hapheikü am nyokei leiyei SHEMBÜPA chongphobü Mosai Jordan apshaphi kü am kü shuohpü kahdokei chongkhenei nyutuh.”

¹⁶Jomi Joshua kü, “Nüngi mehe ehenshang hami ha dükhen hatü nüngi melei shomhen ham halei daihen.

¹⁷Hami Mosalei shah bangpükei, hami nüngi epü kao banghen. SHEMBÜPA, nüngei Kahvang Mosa mü nyupükei nüng mao nyemnyukeima.

¹⁸Üami nüngi epü shahthü khüei yaonghen hatü ha nebanghen, hathüyü jütükhen. Nüng mon wongkoh monglongtuh” shei eshuohteke.