Read Phom Naga JOSHUA 10 Bible Online

JOSHUA 10 - Phom Naga bible

JOSHUA 10

¹Shaang Jerusalem ongpa Adoni-zedeki Joshua-i Jeriko ching hatü haleipü ong kü dükpükei Ai ching hahtü chemjalak kü mangtük hatü haleipü ongpa-ao jütük, hatü Gibeon ami Israel am mü chingmei lingei nyunyuja shei dan.

²Büpa hatü nanglakthüi ha kü longi nyem; mehenangkü ong nyupü lebü chingthü keiha Gibeon amü longpü chingnyü; hapayü Ai mü longshi hatü haleipü shennyakthü-ü hampathü mon nyuteke.

³Hanangkü Jerusalem ongpa Adoni-zedeki Hebron am Hoham ongpa, Jarmuth am Piram ongpa, Lakhish ong Japhia, hatü Eglon ong Debir kü shah shomei,

⁴“Gibeon ching hahnüng aongkütuh hatü ngei kü sheühshih; mehenangkü jomi Joshua hatü Israel am mü uwmei lem lingteke” shei eteke.

⁵Hahepak kü Amor am ongpathü jom nga — Jerusalem, Hebron, Jarmuth, Lakhish hatü Eglon shei thaitü veshanthü kemei aongei shing lingtü hahteke.

⁶Gibeon ami Gilgal baümtapei Joshua kü shah shomei, “Ammei chongphobüthü teyakphong. Lomi aongei ham yangshih; mehenangkü phaüshang kahdok leipü Amor ongthü thaitü ham khüei hokhen temnyüke” shei e.

⁷Hanangkü Joshua-i büpalei veshanthü, hampathü-ao omshi mütü Gilgal baümtap kübü layaongei aong.

⁸SHEMBÜPAi Joshua kü, “Nüngi jom kü tenyem; ngei nüngei lak kü jom shuohtepih. Jom üpayao am khüei neyaongaokpih” shei e.

⁹Vangnyak Gilgal kübü aongei Joshua hatü veshanthüi vangphashi ngangahük kü hahtükteke.

¹⁰SHEMBÜPAi hathü Israel am touei longi nyemhü. Israel ami Gibeonei jom longi jü, hatü Israel ami Beth-Horonei daipü lemyangkü jom changei shanei Azekah hatü Makkedah thahshi jüteke.

¹¹Jomphong Israel am kü nyemei Beth-Horon kübü Azekah thahshi nyaihepak kü SHEMBÜPAi jom kü shüyaong longi vüshih, hatü Israel ami jüpü meyü shüyaongi nyeishi shükei jüteke.

¹²Ha nyih SHEMBÜPAi Israel amei lak kü Amor am shuohteke; Israel am peü nyushi Joshua-i SHEMBÜPA kü e: “Oh vanghenyü, Gibeon touei, Oh lennyü, Aijalon kahji touei yaongdaituh.”

¹³Hanangkü Israel ami vepathü mangneü thahshi vanghenyü yaongdai hatü lennyü shinei nedai. Hapayü Jashar Laitap kü nyangei nyüke. Vanghenyü vangshang jiam kü yaongdai, hatü nyih hükshing vanghe neshüi nyuteke.

¹⁴SHEMBÜPAi hangkulei shah bangpü hapa nyih kei mechemao shelei nenyu, hatü ha nyih mü leitü nenyu. Hingmei SHEMBÜPAi Israel am khüambakei hokteke.

¹⁵Hapheikü Joshua-i Israel am peü müei Gilgal baümtapei lei.

¹⁶Hahepak kü Amor am ongpathü nga nyaiyei daiyei Makkedahlei yaongsha hükei joshi dangteke.

¹⁷Mechem Amor am ongthü Makkedah yaongshalei joshi dangteke shei Joshua kü eshuohpa,

¹⁸Joshua-i e, “Yaong longpü hük ngowei deiyei yaongsha kü hathü nedidaihen mü dhüh-eishuoh; hatü halei shennyak hanei yomphongtuh,

¹⁹shejao amphong payü hatouei tenyu; ammei vepathü kü changei daituh, hatü ngaümpheilei müshi changei jütuh; jom laophülei chingei te-anshih; mehenangkü SHEMBÜPA, ammei Kahvangi hathü ammei lak kü shuoh-ei nyüke.

²⁰Mechem Joshua hatü Israel ami kempü vaishi jüpa, shejao haneipa nyaiyei daiyei chingnyü penyüsha mongei shüdai.

²¹Veshanthü kemei Makkedahlei Joshua touei meishi leiyei ngoikemteke hatü üpaiyao Israel am khüei shah phahükao ne-e.”

²²Hahepak kü Joshua-i, “Yaongsha aptuh hatü ongpathü jom ngaphen ngei touei deikei” shei e.

²³Hanangkü yaongsha aptü haleipü Jerusalem, Hebron, Jarmuth, Lakhish hatü Eglon amei ongthü müei deijateke.

²⁴Mechem jomi ongpathü Joshua touei müei deijapa, Joshua-i Israel am kemei nyük, hatü büpa mü daipü veshanthü kü, “Yopailei heihkei, hatü ha ongthülei üng kü ammei la-i shouptuh” shei e. Hanangkü jom heih-ei üng kü la-i shoupteke.

²⁵Hahepak kü Joshua-i jomphong kü, “Am tenyem nevaijü tehan. Am wongkoh monglongtuh. Ammi hokpü vepathü peü kü SHEMBÜPAi hapakei mon dükhen” shei e.

²⁶Hapheikü Joshua-i ongpathü jü, hatü pü nga kü jomphongei mahng om dhüshi sheüphong.

²⁷Vanghe shüshingkü Joshua-i ngeükhüam shuoh, hatü hathülei mahng yah-ei shelei jom jopü yaongshalei yakphong; jomi yaong longpü yah-ei deiyei yaongsha kü dhühphong hatü ha shinnyih thahshi nyüke.

²⁸Ha nyih Joshua-i Makkedah ching hahteke. Büpai hapa chingnyü hatü haleipü ong hatü shennyakthü hükao aoei netuh-i jütükkem. Büpai Jeriko ongpa kü dükshuohpükei Makkedah ongpa kao dükshuohteke.

²⁹Hapheikü Joshua hatü veshanthü kemei Makkedah kübü Libnahlei heih, hatü Libnah ching hahteke.

³⁰SHEMBÜPAi hapa ching hatü haleipü ongpa Israel amei lak kü shuoh; jomi hükao aoei netuh-i shennyak peü jütükkem. Büpai Jeriko ongpa kü dükshuohpükei hapa ongpa kao dükshuohteke.

³¹Shao Joshua hatü veshanthü kemei Libnah kübü heih-ei Lakhish ngoi, hatü hapa ching shümtü hahteke.

³²SHEMBÜPAi Lakhish am Israel amei lak kü shuoh; büpai Libnah am kü dükshuohpükei hükao aoei netuh-i nyih nyipabü kü jütükkem.

³³Hahepak kü Gezer am Horam ongpai Lakhish am kü sheühhen aong, shejao Joshua-i büpa hatü büpalei veshanthü neü, hatü hükao aoei netuh-i jütükkem.

³⁴Lakhish kübü Joshua hatü veshanthü Eglonlei heih, hatü jomi hapa ching shümei shennyakthü jü.

³⁵Jomi ha nyih-üng hapa ching hah, hatü büpai Lakhish am kü dükshuohpü keiha shennyakthü peü jütükkem.

³⁶Hapheikü Joshua hatü veshanthü Eglon kübü Hebronei aong hatü jomi hapa ching hah.

³⁷Jomi hapa ching hahshingkü haleipü ongpa, ching am peü jütük; büpai Eglon am kü dükshuohpükei shennyak hükao aoei netuh-i jütük.

³⁸Hapheikü Joshua hatü veshanthü peü Debir lemei nyokei leiyei hapa ching hah.

³⁹Büpai hapa ching, haleipü ongpa hatü hapa yopai leipü chingthü kemei hahtük; büpai Hebron am hatü Libnah hatü haleipü ongpa kü dükshuohpükei Debir hatü haleipü ongpa kao dük.

⁴⁰Hanangkü Joshua-i phaüshang kahmük hatü Negeb, heshüphi kahshangla hatü kahji kahshang kemei hah. Büpai hükao yemmü aoei netuh-i jütükkem. SHEMBÜPA, Israel amei Kahvangi epükei ngü heepü hükao aoei netuh-i peü jütük.

⁴¹Joshua-i Kadesh-Barnea kübü Gaza thahshi hatü Goshen kübü Gibeon moidoithü kemei hahtük.

⁴²Joshua-i hathü ong kemei hatü jomei kahmükthü ve shanhük kü hahtükkem; mehenangkü SHEMBÜPA, Israel amei Kahvangi Israel am khüambakei hokteke.

⁴³Hapheikü Joshua hatü veshanthü kemei Gilgal baümtapei leidai.