Read Phom Naga JOSHUA 11 Bible Online

JOSHUA 11 - Phom Naga bible

JOSHUA 11

¹Mechem Hazor ongpa Jabini Israel am aokpü dangpü jung danpa, büpai Madon ongpa Jobab, Shimron ong hatü Akhshaph ong,

²hatü apshaphi phaüshang kahmük kübü ongthü hatü pehephi Khinneroth kü Arabah Kahshangla kü, hatü heshüphi Naphoth-Dor kü,

³heshü hatü heongphi kü nyupü Kanan am, Amor am, Hit am, Perizz am, hatü phaüshang kahmük kü nyupü Jebus am, hatü Mizpah kahdok Hermon Kahshangla kü nyupü Hiv am touei shah shom.

⁴Jomi jomei veshanthü kemei hatü vehok koyei hatü koyei kharithü yungching bhihhiphang kei ienüng neaoki vam.

⁵Hapa ongpathü kemei jomei veshanthü khong hük vaihütü jomi chem kü Israel am mü hokhen shingvaishi Merom yungyenei baümtap veteke.

⁶SHEMBÜPAi Joshua kü, “Ammi jom kü tenyem, ngenyih shaang kei jom kemei jüei Israel am kü shuohhen; ammi jomei vehok koyeithülei laphei chah langtüktuh hatü koyei kharithü aw kü jaktüktuh” shei e.

⁷Hanangkü Joshua-i büpalei veshanthü peü mütü Merom yungyenei heih-ei ngangahük kü vepathü jüteke.

⁸SHEMBÜPAi jom Israel amei lak kü shuoh; Israel ami jom jü, hatü Longpü Sidon kübü Misrephothmaim thahshi hatü heongphi Mispeh kahji thahshi changei shan. Jomi hükao yemmü netuh-i mangjükem thahshi nedoh-i hokteke.

⁹SHEMBÜPAi epükei Joshua-i jom kü dük; büpai vehok koyeithülei laphei chah langtük hatü koyei kharithü aw kü jaktük.

¹⁰Hapheikü Joshua-i nyokei leiyei Hazor hah hatü haleipü ongpa jü. Hazor-ü lebü ongchingthü peü mü wong kohpü ongching nyuteke.

¹¹Jomi haleipü shennyakthü hükao yemmü netuh-i jütük hatü hapa chingnyü awi haptük.

¹²SHEMBÜPA chongphobü Mosai epükei Joshua-i chingnyüthü neütük, haleipü ongthü kemei jütük.

¹³Shejao Joshua-i Hazor awi shamtükpü mü lenei Israel ami shangtao kü nyupü chingnyüthü neshamtük.

¹⁴Israel ami laophü shingvaishi haleipü douhinang hatü yemhimak kemei shetei leidai, shejao shennyakthü kemei hükao yemmü aoei netuh-i jütükkem.

¹⁵SHEMBÜPAi büpa chongphopü Mosa kü epükei, Mosai Joshua kü e, hatü SHEMBÜPAi Mosa kü epü peü lemhükao nedüki netuh-i Joshua-i dükteke.

¹⁶Hanangkü Joshua-i ha kahdokthü kemei yah: Phaüshang kahmük, Negeb kemei, Goshen kahmük kemei, heshüphi kahjishong, Arabah hatü Israel amei kahshangthü mü kahjishongao omshi,

¹⁷Halak Kahshang kübü Seir philei heihdaipü Hermon Kahshang phangkü Lebanon kahji Baal-gad thahshi yahteke. Büpai jomei ongthü kemei yepei lei, hatü deh-ei jütükkem.

¹⁸Joshua-i jomei ongthü mü hepak luangi hokteke.

¹⁹Gibeonei nyupü Hiv am mü lenei üamiyao Israel am mü chingmeivangmei nenyu; kemei mü hokteke.

²⁰SHEMBÜPAi Mosa kü epükei phahji neshiüi bhanghili mahtükhen, chemjalak kü jütükhen shingvaishi Israel am mü khüei hokhen SHEMBÜPAi jom mahmong longhüteke.

²¹Hahepak kü Joshua daiyei phaüshang kahmük: Hebron, Debir, Anab, Judah hatü Israel phaüshang kahmükthü kü nyupü Anakim am kemei jütükkem.

²²Israel kahdok kü Anakim am hükao aoei netuh; maani mon Gaza, Gath hatü Ashdod kü aoei nyuteke.

²³SHEMBÜPAi Mosa kü epükei Joshua-i kahdok kemei yah; hatü Joshua-i Israel jat ieyei kü hapa kahdok mükjüp hanei shuoh. Hapheikü mon kahdok kü hokpüheipü dohteke.