Read Phom Naga JOSHUA 13 Bible Online

JOSHUA 13 - Phom Naga bible

JOSHUA 13

¹Mechem Joshua viüei vangbong longi daipa, SHEMBÜPAi büpa kü, “Sheyü nüng longi viüdaiteke shejao shao-üng mangyahpü kahdok moidoi longi nyüke.

²Shaang mangyahpü kahdok hathü nyüke: Philistia hatü Geshur amei kahdokthü kemei,

³‘Ijip kü heongphi Shihor kübü apshaphi Ekron viong thahshi, hathü kü Kanan am shei enyüke; halei Philistia am ongthü, Gaza, Ashdod, Ashkelon, Gath hatü Ekron kü nyüke’, hatü Avvim amei kahdokthü,

⁴apshaphi kü Kanan kahdok kemei, Sidon kü Mearah kübü Amor kahdok Aphek thahshi,

⁵hatü Gebal amei kahdok, hatü heongphi kü Lebanon kemei, Hermon Kahshang pehephi Baal-gad kübü Lebo-Hamath thahshi nyüke” shei e.

⁶“Phaüshang kahmük kü nyupüthü Lebanon kübü Misrephothmaim, ha lappai Sidon am kemei, ngei Israel am toueipü changtükhen; ngei nüng kü epükei kahdok mon Israel am kü jomei lompü vaihen haneishuoh.

⁷Hanangkü hapa kahdok jat shü kü hatü bhaosheipü Manasseh jat kü haneishuoh” shei eteke.

⁸Bhaosheipü Manasseh phang, Reuben hatü Gad phangthüi Jordan heongphi kü SHEMBÜPA chongphobü Mosai jom kü shuohpü aimü mükjüp dangteke.

⁹Hapayü Aroer kübü Arnon kahji jung, hatü hapa kahji jiam kübü chingnyü, hatü Medeba kahji kübü Dibon ngoishi,

¹⁰hatü Heshbonei vanglem lempü Amor am Sihon ongpalei chingnyüthü kemei Amor amei viong thahshi;

¹¹hatü Gilead omei, Geshur hi Maakah amei kahdok omei, Hermon Kahshang peü hatü Bashan kemei Salekah thahshi;

¹²hatü Rephaim ongching kü shomei Ashtaroth hatü Edrei kü vanglem lempü Og ongpalei ongching kemei omei yahteke. Mosai jom neütü changtük, hatü jomei kahdokthü yahteke.

¹³Shejao Israel ami Geshur hatü Maakah nanglakthü nechangtük; hanangkü jom shinnyih thahshi Israel am mü chem kü nyuei dainyüpeih.

¹⁴Shejao büpai Levi am phang kü mükjüp nehan; mehenangkü SHEMBÜPA, Israel amei Kahvang kü jakei shuohpü moilayü jomei phaihan vaihen shei büpai jom kü eteke.

¹⁵Mosai Reuben jat kü phang phang aimü mükjüp hapakei hanteke:

¹⁶Aroer kahdok kübü Arnon kahji jung, hatü hapa kahji hanteke: Aroer kahdok kübü Arnon kahji jung, hatü hapa kahji jiam kübü chingnyüthü, hatü Medeba kahji kemei heih-ei,

¹⁷Heshbon hatü hapa kahji kübü chingnyüthü kemei, Dibon, Bamoth-Ball, Beth Baal-meon,

¹⁸Jahaz, Kedemoth, Mephaath,

¹⁹Kiriathaim, Sibmah, hatü kahjishong Zereth-shahar,

²⁰Pisgah kahshong Beth-Peor, hatü Beth-Jeshimoth,

²¹hatü kahji kübü chingnyüthü peü hatü Heshbonei vanglem lempü Amor am Sihon ongpalei ongchingthü kemei shuoh. Mosai Sihon hatü büpa mü sheühteiyei vanglem lempü Midian am Evi, Rekem, Zur, Hur, hatü Reba hathü neütük.

²²Vehok kü jüpüthü mü omei Israel ami phongyomteipü Beorlei cheha Balaamao jütük.

²³Reuben amei viongü Jordan yungkung nyuteke. Hathü chingnyü chinghathüyü Reuben amei mükjüp phang phang kü hanpü nyuteke.

²⁴Mosai Gad jat kao phang phang aimü mükjüp hanteke.

²⁵Jomei kahdokü Jazer, Gilead amei chingnyüthü kemei, Rabbah kü apshaphi Aroer thahshi Amon amei kahdok hükkeishing;

²⁶hatü Heshbon kübü Ramath-Mizpeh hatü Betonim, hatü Mahanaim kübü Debir kahdok ngoishi;

²⁷hatü kahjilei Beth-Haram, Beth-Nimrah, Sukkoth hatü Zaphon mü Heshbon am Sihon ongpalei ongching aopü kemei, Jordan apshaphi Khinnereth yungching dohpü ngoishi omei shuoh.

²⁸Hathü chingnyü chinghathüyü Gad amei mükjüp phang phang kü hanpü nyuteke.

²⁹Hapayü Mosai bhaosheipü Manasseh jat kü, Manassehlei hühihathü kü phang phang aimü mükjüp shuohteke:

³⁰Jomei kahdok Mahanaim kübü Bashan thahshi, Bashan am Og ongpalei ongching kemei Bashan leipü Jair am nyushing kemei, ching pejem,

³¹Gilead kahdok hükkeishing hatü Ashtaroth hatü Edrei, Bashan kü Og ongpalei ongchingthü kemei omei shuoh. Hathüyü Manassehlei cheha Makirlei hühihathü, Makir kü phaakpü hühihathü phang kü hanpü mükjüp nyuteke.

³²Hapayü Jordan homei Jeriko heongphi kü Moab kahjilei nyushi Mosai hanshuohpü mükjüp nyuteke.

³³Shejao Levi am phang kü Mosai mükjüp nehan; büpai jom kü epükei SHEMBÜPA, Israel Kahvang jomei mükjüp nyuteke.