Read Phom Naga JOSHUA 18 Bible Online

JOSHUA 18 - Phom Naga bible

JOSHUA 18

¹Hapheikü Israel am khong kemei Shilohlei thai, hatü halei ashakshem veteke. Jomi vehok neü, hatü kahdok jom phangkü tuh.

²Israel am khongkü shao kahdok mükjüp mangdangpü jat nyet nyuteke.

³Hanangkü Joshua-i Israel am kü, “SHEMBÜPA, ammei bühipa Kahvangi am kü shuohpü kahdok yahhen am meshük lushi danei nyuhenang?

⁴Jat ieyei kübü shennyak jem baong jetuh. Ngei jomphong phaümük doknüng shomhen, hatü jom peüi mükjüp meshük yahhüpa ha nih-ei nyanghen hatü jom peü ngei touei nyokei leikahen.

⁵Jomi kahdokü shing nyet vaishi hanhen, Judah amü jomei kahmük pehephi kü-üng nyuhen, hatü Joseph amü jomei kahdok apshaphi kü-üng nyuhen.

⁶Kahdok shing nyet vaishi hanpü nang meishi nih-ei nyangtü ngei touei hathü deiyei haütü SHEMBÜPA, jenei Kahvang touei ngei amphong shingvaishi phongyomhen.

⁷Shejao Levi amü am kei kahdok nedanghen; mehenangkü jomei mükjüpü SHEMBÜPAlei dousho kü ngongpa kei chongphohen, hatü Gad, Reuben hatü bhaosheipü Manasseh jat Jordan yungdang heong philei jomei mükjüp dangteke. SHEMBÜPA chongphopü Mosai jom kü shuohpü khih” shei eteke.

⁸Shennyakthüi phaümük doknüng layaongei daishingkü Joshua-i jom kü, “Daituh hatü phaümük dokei leikei hatü hapa nih-ei nyangtuh. Hapheikü ngei touei nyokei leikei hatü ngei am shing SHEMBÜPA touei hammü Shilohlei phongyomhen” shei e.

⁹Hanangkü shennyakthü layaongei kahmük doknüng dai. Jomi phaishuw kü hapa nang nih-ei shing nyet kübü jilathü nyangtü Joshua yemei Shiloh paümtapei lei.

¹⁰Hahepak kü Joshua-i Shilohlei SHEMBÜPA touei phongyom, hatü büpai jat hanpü aimü Israel am kü kahdok hanei shuohteke.

¹¹Benjamin phang phang aimü phong hetteke. Jom kü hanpü kahdokü Judah hatü Joseph jat nyi aa kü nyu:

¹²Apshaphi kü jomei viongü Jordan mü pangei heihpü apshaphi Jeriko kahshong peih-ei phaüshang kahmük heshüphi kü heih-ei Beth-Aven yingnyü kü leanshi nyu.

¹³Hatoueipü Luz (hapayü Bethel) kahshong pehephi homei maipa Beth-Horon pehephi kahshang kü Ataroth-Addar thahshi shaei nyu.

¹⁴Hapheikü shao viong lebü lemei daipeyü Beth-Horon mü khangteishi nyupü pehe philei nyupü kahshang kübü pehephi kü heshü lemei nyokei lei, hatü hapayü Judah amei jila Kiriath Baal (hapayü Kiriath-Jearim) kü peiyei nyu. Hapayü heshüphi viong lem nyu.

¹⁵Pehephi kü viongü Kiriath-Jearim haolei pangei Neptoah yung bhaoshing kü peiteke.

¹⁶Viongü Rephaim kahji apshaphi Ben-Hinnom kahji kü dangteishi kahshangla sheetei sha, hatü shao viongü Jebus amei kahshong pehephi kü Hinnom kahji thahshi shadaipü En-Rogel ngoishi nyu.

¹⁷Hapayü shao apshaphi kü nyokei En-Shemesh hatü Adummimei aongpü lem kü khangpü Geliloth thahshi, hatü Reubenei cheha Bohan Yaong thahshi nyu.

¹⁸Hapayü Beth-Arabah kahshong apshaphi kübü nedoh-i heihpü Arabah thahshi yiüei nyu.

¹⁹Hapayü shao Beth-Hoglah kahshong apshaphi kübü heihdaipü Jordan yungsho kü Dipü Yungching apshaphi yungnuk kü peiyei nyu. Hapayü pehephi viong nyuteke.

²⁰Heongphi kü Jordan yungyen mü jomei viong nyu. Hapayü Benjamin jat kü phang phang aimü hanteipü viong lemthü nyu.

²¹Benjamin jat kü phang phang aimü dangpü chingnyüthüyü hathü nyuteke: Jeriko, Beth-Hoglah, Emek-Keziz,

²²Beth-Arabah, Zemaraim, Bethel,

²³Avvim, Parah, Ophrah,

²⁴Kephar-Ammoni, Ophni hatü Geba jila anpünyi mü jomei chingthü nyuteke.

²⁵Gibeon, Ramah, Beeroth,

²⁶Mizpeh, Kephirah, Mozah,

²⁷Rekem, Irpeel, Taralah,

²⁸Zela, Haeleph, Jebus amei chingnyü (hapayü Jerusalem), Gibeah hatü Kiriath jila anpüali mü jomei chingthü nyu. Hathüyü Benjamin jat phang phangei mükjüp nyuteke.