Read Phom Naga JOSHUA 22 Bible Online

JOSHUA 22 - Phom Naga bible

JOSHUA 22

¹Hapheikü Joshua-i Reuben, Gad hatü bhaosheipü Manasseh jat nyükei jomphong kü,

²“SHEMBÜPA chongphobü Mosai epükei ammi lemphü dükteke, hatü ngei epü peü ammi ven danei dükteke.

³Nyuyang kübü shaang thahshi kü ammi ammei jeihinaüthü mechemao netuhphong, shejao SHEMBÜPA, ammei Kahvangi am kü yahphopü dousho kenhingei dükei heihteke.

⁴Shaang, SHEMBÜPA, ammei Kahvangi ammei jeihinaüthü kü büpai lahpükei nyiushemmei shuohteke, sheyü SHEMBÜPAlei chongphobü Mosai Jordan yungdangei am kü yahphopü kahdokei nyokei leituh.

⁵Shejao SHEMBÜPA, ammei Kahvang kü bamhen, büpalei lemthü kü kamhen, büpalei shahkungthü banghen, büpa kü wongshongi shuonghen hatü ammei mongdang hatü laangha kempai büpa chongphohen shingvaishi SHEMBÜPAlei chongphobü Mosai am kü shuohpü shahkungthü kenhingei noteituh” shei e.

⁶Hapheikü Joshua-i jom kü moihimantü leishih, hatü jom jomei shemei leidai.

⁷Bhaosheipü Manasseh jat kü Mosai Bashanei kahdok shuoh, hatü bhaosheipü jat kü Joshua-i Jordan yung heshüphi lemei jeihinaüthü mü kahdokü shuohteke. Mechem Joshua-i jom leishihpa, büpai jom kü,

⁸“Mop longi koei yemhimak longi müei, hon, ngin, melangnyiam, nyiam hatü ashakviha longi koei shemei leituh, hatü vepa leipü aetpü mopthü ammei jeihinaü mü hanteituh” shei moihimanei etü leishihteke.

⁹Hanangkü Reuben, Gad hatü bhaosheipü Manasseh am Israel am mü yanei Kanan kahdok Shiloh kübü SHEMBÜPAi jom kü Mosa homei shuohpü Gilead kahdokei nyokei lei.

¹⁰Mechem jom leiyei Kanan kahdok Jordan yopailei Geliloth ngoipa, hatü bhaosheipü Manasseh jat, Reuben hatü Gad jatthüi Jordan heshüphi kü moidü longpü hük ling.

¹¹Mechem jomi Israel kahdok lemei Jordan yopailei Kanan viong Gelilothlei moidü hük lingteke shei Israel ami danpa,

¹²Israel am khong kemei Shilohlei jom mü khüei hokhen thaiteke.

¹³Hahepak kü Israel ami Gilead kahdokei bhaosheipü Manasseh, Reuben, Gad jatthü touei ngongpa Eleazarlei cheha Phinehas shom.

¹⁴Büpa mü jomi Israel jatthü mükhiphang hanpü ieyei kübü mübü hükbaong jeyei jom an shomteke.

¹⁵Mechem jomi Gilead kahdokei heih-ei bhaosheipü Manasseh jat, Reuben hatü Gad jatthü mü pongteipa, jomi hathü kü,

¹⁶“SHEMBÜPAlei nanglakthü kempai hapakei enyüke, ‘SHEMBÜPABÜPA khüei shinnyih am nyingi moidü lingei SHEMBÜPA phei müpü kübü lepdaihen mü Israel Kahvang khüei ammi mehekei mang dou dükpa?

¹⁷Peorlei nyushi thahpü mangi mong nehamang je? SHEMBÜPAlei nanglakthü cham peilangmao, shinnyih thahshi jen kübü hapa mang mangchapih.

¹⁸Hatü shaang amü SHEMBÜPAleipü lepdainyu je? Shinnyih ammi SHEMBÜPA khüei yaongjema, ngenyih SHEMBÜPAi Israel am kemei kü mongshihkahen.

¹⁹Ammei kahdok nedaüang shei deihjema, SHEMBÜPAlei ashakshem nyupü SHEMBÜPAlei kahdokei heihkei, hatü hamei kahdok hanei yahhahtuh. Shejao ammi SHEMBÜPA, jenei Kahvangei ashakshem mü lenei am nyingi am shing moidü lingei SHEMBÜPA nevaijü ham khüei teyaong.

²⁰Mechem Zerahlei cheha Akhani douthü kemei mangtüktuh shei epü nebangi dükpai mang thahpa, hapa mangi Israel am khong kemei neponghah-angpü je? Büpalei mang nangkü büpa mon nemahangpih’ ” shei e.

²¹Hahepak kü bhaosheipü Manasseh jat, Reuben hatü Gad jatthüi Israel am phang kü shangjingthü kü,

²²“Jeiyongpayü Kahvang! Büpayü SHEMBÜPA! Jeiyongpayü Kahvang hih! Büpayü SHEMBÜPA! Hami mekei dükpa, ha büpai nyingnyeih, hatü ammiyao ha nyingtuh. Hapayü khüei nevaijü SHEMBÜPA kü hingnelemi dükpü vaijema, shinnyih ammi ham yemmü tetuhphong.

²³SHEMBÜPAleipü lepdaihen shingvaishi ham nyingi moidü lingei, halei jakpü moila, hahying moila, nevaijü mongjempü moila shuohhen lingpü vaijema, SHEMBÜPAi shinnyih-üng ham kü hanghi nyemshuoh.

²⁴Hami hapa dükpeyü ammei hühihathüi hammei hühihathü kü, SHEMBÜPA, Israel amei Kahvang mü am mehe linghen.

²⁵SHEMBÜPAi Jordanü jen aa kü viong lingtüktekeam Reuben hatü Gad am; SHEMBÜPA mü am meheyao hean neshiüpih” shei ephahen kü nyemei dükpeih. Hapa keiha ammei hühihathüi hammei hühihathü SHEMBÜPA kü nekhümhühen.

²⁶Hanangkü ammi, “Jakpü moila, nevaijü lebü moilathü shuohhen nevai,

²⁷shejao am hatü ham aa kü, hatü pheinaü den shingvaishi hamao jakpü moila, lebü moilathü hatü mongjempü moila koshi SHEMBÜPAlei moidülei chongphonyeih shei nyinghühen, hatü ammei hühihathüi hammei hühihathü kü ngoikahen nyih kü, ‘Ammi SHEMBÜPA mü hean nenyupih’ shei ne-ehen shangmü denpü vaihen shingvaishi moidü lingshah shei eteipeih.”

²⁸“Hatü hami, ‘Jomi jen kü, nevaijü jenei hühihathü kü hapakei ephüjema, jakpü moila shuohhen nevai, nevaijü lebü moila shuohhen nevai, shejao am hatü ham aa kü denpü vaihen shingvaishi hammei bühipai lingpü SHEMBÜPAlei moidü lajei kü veituh’ shei ehen shangmü jen aa kü denpü vaishi moidü lingshah shei eteipeih” shei e.

²⁹“SHEMBÜPA khüei yaonghen, shinnyih büpa phei müpü kübü lepdaihen, SHEMBÜPAlei ashakshem mü lenei moidü lingei halei jakpü moila, hahying moila nevaijü lebü shuoh-ei lepdaihenü deih-eiyao neshiüpih” shei e.

³⁰Mechem ngongpa Phinehas hatü Israel phangthü kü shangjingthü, khong mübüthüi Reuben, Gad hatü Manasseh jatthüi ha epü danpa, jomi monghamei deihteke.

³¹Eleazar ngongpalei cheha Phinehas-i Reuben, Gad hatü Manasseh jatthü kü, “Shinnyih jen mü SHEMBÜPA omshi nyüke shei nyingnyüke; mehenangkü hapa nangkü shei SHEMBÜPA kü hingnelemi dükei mang nethahang. Shaang ami SHEMBÜPAlei lak kübü Israel am yangteke” shei e.

³²Hapheikü Eleazar ngongpalei cheha Phinehas hatü mübüthü Reuben, Gad hatü Manasseh jatthü mü Gileadei heüteitü Kananei leiyei Israel am kü shah-om aokjateke.

³³Jomi hapa shah-om danei SHEMBÜPA kü menvih shuoh, hatü jomi Reuben hatü Gad am nyupü kahmükei peiyei hokhen jung hajük kü ne-etei.

³⁴Reuben hatü Gad ami hapa moidü kü, “SHEMBÜPAyü Kahvang, büpayü jen aa kü denpü” shei nyükteke.