Read Phom Naga JOSHUA 23 Bible Online

JOSHUA 23 - Phom Naga bible

JOSHUA 23

¹Hepak longi daipheikü SHEMBÜPAi Israel am kü jom shinei nyupü vepathü peü kübü nyiumei shuoh, hatü hahepak kü Joshuayü longi viüdaitü nyu,

²hatü büpai Israel am behethü, mübüthü, shahphenbüthü, hatü lakchongbüthü nyükei jom kü eteke, “Ngeiyü sheyü viüdai, hatü bong longi daiteke.

³SHEMBÜPA, ammei Kahvangi ammei med kü hathü jatthü kü mehe dükshuohpa, ha am nyingi eeteke; hapayü SHEMBÜPA, amei Kahvangi ammei med kü hokpü khih.

⁴Aoei nyupü jatthülei kahdok hatü Jordan hayü heshüphi Mediterranean yungching aa kü nyupü ngei neütükpü jatthü kemei ngei mükjüp vaishi ammei jatthü kü hanei shuohtepih.

⁵SHEMBÜPA, ammei Kahvangi jom am toueipü hungei leitükhen, hatü am toueipü changtükhen, hatü SHEMBÜPA, ammei Kahvangi lahpükei ammi jomei kahdok yahhen.

⁶Hanangkü ammi kenhingei Mosa shahkung kü mehe nyangei nyu, ha banghen hatü dükhen kentuh, hatü haleipü laknyong nevaijü lakdah melemeiyao teleptei;

⁷am mü nyupü jatthü mü tejemtei; jomei kahvangei men tenotei nevaijü vangeishuwei te-e. Ammi hapa kü chongtepho nevaijü tekhüm.

⁸Shejao am shaang nyupükei-üng SHEMBÜPA, ammei Kahvang kü wongshongi shuongtuh.

⁹Mehenangkü SHEMBÜPAi am toueipü longpü hatü wong kohpü jatthü changtükteke, hatü shinnyih thahshi üamiyao am khüei neyaongaok.

¹⁰Büpai lahpükei SHEMBÜPAi amei med kü hokteke hatü am shennyak hüki-üng haja hükao changtükaok.

¹¹SHEMBÜPA, ammei Kahvang kü bamhen ammi longi kentuh.

¹²Shejao ammi büpa toueipü yanei daiyei am mü yangei aoei nyupü jatthü mü küeijemei, yiükeilaei nyeteinyangjema,

¹³SHEMBÜPA, ammei Kahvangi am touei nyupü jatthü nechangtükphahen shei nyingtuh. Haleimü, SHEMBÜPA, ammei Kahvangi am kü shuohpü kahdok kübü mangmahkem thahshi jomü ammei hühhihang, tailok; ammei dok kü bheipü nevaijü mük kü shoungpü hühhihang vaikahen.”

¹⁴“Sheyü ngei shaangü didaihen mon aoteke. SHEMBÜPA, ammei Kahvangi am kü lahpü meipü hükao neshai-i dhaümteke shei ammei müki mongi eeteke; lahpü kemei dhaümteke, hükao neshaidaiang.

¹⁵Shejao SHEMBÜPA, ammei Kahvangi lahpü meipü kemei mekei neshai-i dhaümei peipa, hapa keiha büpai am kü shuohpü kahdok kübü am mangmahkem thahshi SHEMBÜPAi nemeipü douthü kemei koei peikahen.

¹⁶Ammi SHEMBÜPA, ammei Kahvangi shuohpü vangteishuwteipü mangtüktü daiyei lebü kahvangthü chongphoei hathü kü khümjema, SHEMBÜPAi am khüei mongshih vamhen, hatü büpai am kü shuohpü kahdok kübü lomi mahtükkemhen” shei e.