Read Phom Naga JOSHUA 3 Bible Online

JOSHUA 3 - Phom Naga bible

JOSHUA 3

¹Nepphei Joshua hatü Israel am kemei lomi Shittim kübü layaongei daiyei Jordan ngoi hatü halei yungdang homhen shekü baümtap veteke.

²Nyih jem pheikü lakchongbüthüi baümtap peü kü,

³daiyei nanglakthü kü ngeükhüam shuoh-ei e: “Mechem ammi SHEMBÜPAlei Vangpüshuwpü Pela Levi am ngongpathüi paitü daiyei eehenshang, ammi laophü nyushing kübü layaongei hapa phei mütuh.

⁴Shejüang am chemao hapa lem kü mangdaipü nangkü mepa lem kü daihen nyinghen. Shejao hapa Vangpüshuwpü Pela hi am aa kü kilometer hükshing taiteishi tuhtuh, hatü hapa yopailei teheih.”

⁵Hapheikü Joshua-i nanglakthü kü, “Amphong laophü laophüi daüeilangei dantuh; mehenangkü ngenyih am touei SHEMBÜPAi yashanpü dou dükkahen” shei eteke.

⁶Hatü Joshua-i ngongpathü kü, “Vangpüshuwpü Pela paituh hatü nanglakthü shekü kamtuh” shei eteke. Hanangkü jomi Vangpüshuwpü Pela paitü nanglakthü shekü dai.

⁷SHEMBÜPAi Joshua kü, “Ngei Mosa mü nyupükei nüng mao nyunyu khih shei nyinghen shingvaishi shinnyih ngei nanglakthüi eeshi nüng shangei longei anshihhen.

⁸Nüngi Vangpüshuwpü Pela paipü ngongpathü kü, ‘Mechem am Jordan yungkung ngoihenshang, halei yaongshi dantuh’ shei ngeükhüam shuohhen eteke”.

⁹Hahepak kü Joshua-i Israel am kü, “Hatouei heihkei, hatü SHEMBÜPA, ammei Kahvangei shah bangtuh.

¹⁰Hapa keiha vanyangyem Kahvang am mü nyüke, hatü büpai hingmei am toueipü Kanan am, Hit am, Hiv am, Perizz am, Girgash am, Amor am hatü Jebus am changtükphahen shei ammi nyinghen.

¹¹Veituh, kahdok peü shak kübü SHEMBÜPAlei Vangpüshuwpü Pela am shekü Jordan yung homei daihen.

¹²Hanangkü shaang, jat ieyei kübü hükbaong shei Israel am jat kübü shennyak anpünyi jetuh.

¹³Mechem kahdok peü shak kü SHEMBÜPAlei Vangpüshuwpü Pela paipü ngongpathüi Jordan yung kü la shuophenshang, Jordan yungsho phileipü shapü yung nesha-i yaongdaihen hatü düei leiyei shing hük mü shüngdaihen” shei eteke.

¹⁴Mechem nanglakthüi Jordan yung homhen shingvaishi layaongei daipa, ngongpathüi Vangpüshuwpü Pela paitü jom shekü daiteke.

¹⁵Shaang hatvet yangkemei Jordan yung longpü phaang küpei nyuteke. Shejao mechem Vangpüshuwpü Pela paipü ngongpathüi Jordan yung kü jomei la shuohpa,

¹⁶yungsho phileipü yung nesha-i longi taishi Zarethan toueipü Adam chingnyü thahshi düei leiyei shüngdai, hatü Dipü Yungching philei yenpü yungü phenei shadai hatü nanglakthü Jeriko yopailei yungdang homteke.

¹⁷Mechem nanglakthüi kahvan kü yungdang homei daipa, ngongpathüi SHEMBÜPAlei Vangpüshuwpü Pela paitü Jordan yung jiamei kahvan kü yaongshi nyuteke.