Read Phom Naga JOSHUA 4 Bible Online

JOSHUA 4 - Phom Naga bible

JOSHUA 4

¹Mechem jat kemei Jordan yungdang homei kempa, SHEMBÜPAi Joshua kü,

²“Jat ieyei kübü bahük baong shei shennyak anpünyi jetuh,

³hatü ngongpathü yaongpü shing Jordan yung jiam kübü yaong anpünyi homtuh, hatü ha yah-ei sheya am paümpü shingei shüngei tuhhen eyeishuoh” shei eteke.

⁴Hanangkü Joshua-i Israel am jat ieyei kübü jepü shennyak anpünyi nyükei thaitü,

⁵jomphong kü, “Jordan yung jiamei SHEMBÜPAlei Vangpüshuwpü Pela touei heih-ei am peüi yaong hükbaong paiyei leituh,

⁶hatü hapai am shingvaishi nyangeihepü hük nyukahen. Ammei hühihathüi, ‘Hapa yaongthü lappü meheang?’ shei pheilei phephüshingkü,

⁷ammi jom kü, ‘SHEMBÜPAlei Vangpüshuwpü Pela yungdang homshingkü Jordan yung nesha-i yaongdaipeih’ shei eyeishuoh. Ha yaongthüyü Israel am kü denden deih-ei danghen shingvaishi nyukahen” shei eteke.

⁸Hanangkü Joshua-i epükei Israel ami dük. SHEMBÜPAi Joshua homei epükei Jordan yung jiamei heih-ei Israel jat ieyei shing yaong hükbaong homei jomei paümtap touei leiyei shüngei tuhteke.

⁹Shao Joshua-i Vangpüshuwpü Pela paitü yaongpü ngongpathülei la toueipü yaong anpünyi thaiyei Jordan yung jiamei shüngei tuhteke. Hathü yaong shinnyih thahshi nyüke.

¹⁰Mosai Joshua homei nanglakthü kü dükhen epü dükei mangkem thahshi ngongpathüi Vangpüshuwpü Pela paitü Jordan yung jiamei yaongshi nyuteke. Nanglakthüi shüshülangi yungdang homei heih.

¹¹Nanglakthü peü yungdang homei kemhinüng ngongpathüi Vangpüshuwpü Pela paitü nanglakthü yeiyei dai.

¹²Mosai hupükei Reuben, Gad hatü bhaosheipü Manasseh jat ve-ow temtü Israel am shekü homei daiteke.

¹³Hokhen shingvaishi ve-ow temtü veshan haja pinyi hükshing SHEMBÜPA mü Jeriko kahji ngoiteke.

¹⁴Ha nyih SHEMBÜPAi Israel am peüi eeshi Joshua shangei longei anshih, hatü jomi Mosa kü dhüm shuohpükei büpalei yangnyu den kemei kü dhüm shuohteke.

¹⁵Hahepak kü SHEMBÜPAi Joshua kü,

¹⁶“Vangpüshuwpü Pela paipü ngongpathü kü Jordan yungyen leipü vamdaikei” shei ehen eshuohteke.

¹⁷Hanangkü Joshua-i, “Jordan yung leipü vamdaikei” shei e,

¹⁸hatü mechem SHEMBÜPAlei Vangpüshuwpü Pela paipü ngongpathü yung leipü vamei yungphang kü la shuoppa, sheleipü keiha yung bhümei leiyei phaang küpei shateke.

¹⁹Shongpü len nyih anpabü kü nanglakthüi Jordan yung homei Jeriko kü heongphi viong Gilgalei baümtap veteke.

²⁰Hatü Jordan leipü houmpü yaong anpünyi Joshua-i Gilgalei shüngei tuh,

²¹hatü büpai Israel am kü, “Pheilei ammei hühihathüi am kü, ‘Hathü yaong lappü meheang?’ shei pheshingkü,

²²‘Israel am kahvan kü Jordan yung homei daipeih’ shei etuh.

²³Jen yung homei mangkem thahshi SHEMBÜPAi Hakla Yungching ütükpükei SHEMBÜPA, jenei Kahvangi jen manghomkem thahshi Jordan yungao ütükpeih.

²⁴Büpai hapayü kahdoknyü kübü hangkuli peüi SHEMBÜPAyü wong longpü shei nyinghen, hatü ammi SHEMBÜPA, ammei Kahvang kü düngei dhüm shuohhen shingvaishi dükpü khih” shei ehen eshuohteke.