Read Phom Naga JOSHUA 6 Bible Online

JOSHUA 6 - Phom Naga bible

JOSHUA 6

¹Shaang Jeriko chingnyü penyüsha shakhimong kemei Israel am neshühahhen shingvaishi küplang. Üpaiyao vamei nedaiaok nevaijü neshüaok.

²SHEMBÜPAi Joshua kü, “Veituh, ngei nüngei lak kü Jeriko, haleipü ong hatü veshanthü shuohtepih.

³Veshanthü kemei hapa chingnyü shinei nyih kü chem shinhen. Hapakei nyih vok shinhen.

⁴Ngongpa nyet ieyei mi vaung amit notü Vangpüshuwpü Pela shekü kamhen. Nyih nyetpabü kü chingnyü shinei ngongpathüi amit vüngyaki nyetpa shinhen.

⁵Mechem ngongpathüi yüluei amit vüngpü danhenshang, nanglakthü peüi wongmü lenhen, hatü Jeriko chingnyü bham laamkahen, hatü veshanthü peü jiüshangi chingnyü mongei shühen” shei eteke.

⁶Hanangkü Nunei cheha Joshua-i ngongpathü nyükei jomphong kü, “Amphongi SHEMBÜPAlei Vangpüshuwpü Pela paituh, hatü ngongpa nyeti amit nyet notü hapa shekü kamhütuh” shei eteke,

⁷hatü büpai nanglakthü kü, “Sheshalei daituh hatü SHEMBÜPAlei Vangpüshuwpü Pela shekü veshanthü sheshonghütü chingnyü shinei kamtuh” shei ngeükhüam shuoh.

⁸Mechem Joshua-i nanglakthü kü shah eyei kempa, ngongpa nyeti amit nyet notü vüngyaki SHEMBÜPA shekü dai, hatü SHEMBÜPAlei Vangpüshuwpü Pela jomphong pheikü paitü müteke.

⁹Lahhilaong nopü veshanthü amit vüngpü ngongpathü shekü kam, hatü Vangpüshuwpü Pela pheikao veshanthü mü. Hapa hepak yangkemei amit vüngteke.

¹⁰Shejao Joshua-i nanglakthü kü, “Ngei lentuh shei epü nyih mangngoi thahshi ammi men tedhüng nevaijü ngeü te-ankei, hatü shah te-e; hapheikü mon ammi lentuh” shei e.

¹¹Hanangkü SHEMBÜPAlei Vangpüshuwpü Pela paitü chem chingnyü shinei dai, hatü jomi yanüng baümtapei leiyei paümteke.

¹²Joshua-i nepphei lomi pao hatü ngongpathüi SHEMBÜPAlei Vangpüshuwpü Pela paiteke.

¹³Ngongpa nyeti amit nyet notü SHEMBÜPAlei Vangpüshuwpü Pela shekü vüngyaki dai. Lahhilaong nopü shennyakthü SHEMBÜPAlei Vangpüshuwpü Pela shekü hatü ngaümpheilei mü.

¹⁴Hanangkü nyih nyipabü kao jomi chingnyü kü chem shin, hatü baümtapei leiyei paüm. Jomi nyih vok hapakei dük.

¹⁵Nyih nyetpabü jom vangaihinüng layaongei daiyei aihük mü chingnyü kü nyetpa shin; hapa nyih mon jomi chingnyü kü nyetpa shinteke.

¹⁶Nyetpabü shinshingkü mechem ngongpathüi amit vüngpa, Joshua-i nanglakthü kü, “Lentuh; mehenangkü SHEMBÜPAi hapa chingnyü am kü shuoh-ei nyüke” shei e.

¹⁷“Hapa chingnyü hatü halei nyupü lemphüli SHEMBÜPA kü moila keiha tentükhen. Büm yupü Rahab hatü pinnyü mü shemei nyupüthü mon yanghen; mehenangkü pinnyüi jeni shompü gühshukpüthü joei yangpeih.

¹⁸Shejao ammi mangtükhen nyupü douthü meheyao teyah; ammi hapakei dükjema, ammi Israel amei baümtapei shanghah hatü ten koei leihen.

¹⁹Hon, melangnyiam hatü nyiam peü SHEMBÜPAlei vaihen; hatü kemei SHEMBÜPAlei mop tuhshingei leiyei tuhtuh” shei eteke.

²⁰Mechem ngongpathüi amit vüngpa, shennyakthüi amit ngeü mü wongmü len, hatü bham laamdai; hanangkü shennyak peüi jiüshangi mongei shü, hatü jomi chingnyü kaamei yah.

²¹Jomei yani chingnyülei nyupü nyüha, baha, hashih hatü behe peü jütük; jomi mohoh, mi, hatü gaduthüao jütük.

²²Joshua-i hahepak kü gühshuk deishihpü shennyak nyi kü, “Büm yubü Rahabei shemei shütuh hatü anji-i pinnyü kü lahpükei pinnyü hatü pinnyülei shem am peü müei ngailangkei” shei e.

²³Hanangkü jiji mongei shüei Rahab, chepa, chenyü, jeihinaüthü hatü aopü pinnyülei shem am peü ngailang. Jom müei deiyei Israel amei baümtap hao shing hükei tuh.

²⁴Jomi chingnyü hatü halei nyupü lemphüli awi haptük; hon hi ngin, melangnyiam hatü nyiam yungshongthü mon yah-ei leiyei SHEMBÜPAlei dou tuhshingei tuh.

²⁵Shejao Joshua-i Rahab büm yubü, pinnyülei shem am peü yang; mehenangkü Jeriko chingnyü gühshukhen Joshua-i shompü shennyak nyi pinnyüi joei yangteke. Ha nyih mü leitü jomei shemong Israel kahdokei nyuei dai.

²⁶Hahepak kü Joshua-i hapakei vangeishuwei eteke: “Hapa Jeriko chingnyü üpai leiyei linghen yaongnya, büpa kü SHEMBÜPAlei thaüvaü hettuh. Büpai laophülei hashong lomohhütü mon hapa chingnyü chongnyiam linghen; Laophülei hashong lomohhütü mon büpai hapa chingnyü penyüsha linghen.”

²⁷Hanangkü SHEMBÜPA Joshua mü nyu, hatü büpalei men kahdoknyü peü lemei yaüei daiteke.