Read Phom Naga JOSHUA 7 Bible Online

JOSHUA 7 - Phom Naga bible

JOSHUA 7

¹Shejao Israel ami mangtükhen epü dou meheyao teyah shei SHEMBÜPAi epü nebang. Judah am jat kübü Zerahlei cheha Zimri, Zimrilei cheha Karmi, Karmilei cheha Akhani dou hanei joei yahteke. Hanangkü SHEMBÜPA mongshihpü Israel am khüei vam.

²Shaang Joshua-i Jeriko leipü shennyak hanei Bethel heongphi Beth-Aven yopailei nyupü Ai chingnyülei shom, hatü jomphong kü, “Aongtuh hatü hapa kahmük gühshuktü leikei” shei eteke. Hanangkü shennyakthü aongei Ai chingnyü gühshukteke.

³Jomi Joshua touei leiyei büpa kü, “Nanglak peü aonghen napü neshiü; haja nyi nevaijü jem hükshing aongjoong hapa Ai chingü hah-aokhen khih. Jom nanglak maani mon nyüke; hanangkü nanglak peü nyiueinangei te-anshih” shei eteke.

⁴Hanangkü shennyak haja jem hükshing mon anshih; shejao Ai am kü nyemei nyaiteke.

⁵Ai ami jom hapüanpüvok hükshing jütük. Ai ami Israel am chingnyü penyüsha kübü Shebarim thahshi changei shanei kahjidhongei jüteke. Israel am nyempai mong mahdai.

⁶Hahepak kü Joshua-i laophülei ashak shaaktük, hatü om dhüshi SHEMBÜPAlei Vangpüshuwpü Pela touei kahdok kü dhe shüshi nyuteke. Israel am behethüiyao hapakei dük hatü shangjing kü bhihla nyioteke.

⁷Hatü Joshua-i, “Oh SHEMBÜPA Kahvang, mehekei nüngi ha nanglakthü Jordan yung homei Amor ami jütükhen shingvaishi jomei lak kü shuohhen müei deipa? Jordan yungdangei nyudailangmeyü meihah shepeih!

⁸Oh SHEMBÜPA, Israel amü vepathü kü nyemei nyaiyei leiyei nyüke; ngei mehe ehenang?

⁹Kanan am hatü lebü kahmükthü kübü shennyakthüi hapa jung danlanghen, hatü jomi ham shonlanghen hatü hamei men kahdoknyü kübü thittükhen khih. Nüngei men longpü nyuhen shingvaishi nüngi mehe dükhenang?” shei e.

¹⁰SHEMBÜPAi Joshua kü, “Yaongtuh! Nüng mehekei kahdokei dhe shüshi lemshi nyunya?

¹¹Israel am mang thahteke; jom kü ngei dükhen eshuohpü ngelei vangpüshuwpü mangtükteke. Jom kü ngei teyah, mangtüktuh shei epü dou hanei yah-ei nyüke; jomi gühteke; shahshem eteke; jomi hapa dou laophülei douthü mü tuh-ei nyüke.

¹²Hanangkü Israel ami vepathü khüei neyangaoki nyemei nyaipü khih; hanangkü jomphongao mahhen shangteke. Ngei teyah shei epü dou amphongi nemangtükpü thahshi ngei am mü nenyuküpih!

¹³Daituh, nanglakthü daütüktuh, hatü jom kü laophü nyingi ngenyih shingvaishi daütüktuh; mehenangkü SHEMBÜPA, Israel Kahvangi, ‘Oh Israel, amphong khongkü ngei mangtüktuh shei epü dou haneilei nyüke; am kübü hapa mangyaktük thahshi am vepa khüei neyaongaokpih’ shei hapakei enyüke.

¹⁴Nepnüng dhom mü jat jat peihen etuh. SHEMBÜPAi mongnelemi deihpü jat kübü phang phang peihen; SHEMBÜPAi mongnelemi deihpü phang kübü mük mük peihen; hatü SHEMBÜPAi mongnelemi deihpü mük kübü palom palom peihen.

¹⁵Üpa shennyakei hapa gühdou danghenshang, büpa hatü shem am, hatü büpai angpü lemphüli aw kü jaktükhen; mehenangkü büpai SHEMBÜPAlei vangpüshuwpü mangtükteke hatü Israel kü veü koei leiteke” shei eteke.

¹⁶Nepnüng dhom mü Joshua-i Israel am jat jat peihü, hatü büpai Judah jat loukei ngai.

¹⁷Büpai Judah jat kübü phang phang deiteke, hatü Zerah am phang loukei ngai. Hapheikü büpai Zerah am phang kübü mük mük deiteke, hatü Zimri am mük loukei ngai.

¹⁸Büpai shao Zimri am mük kübü palom palom deiteke, hatü Judah jat kübü Zerahlei cheha Zimri, Zimrilei cheha Karmi, Karmilei cheha Akhan loukei ngai.

¹⁹Hahepak kü Joshua-i Akhan kü, “Ngelei hapeü, Israel amei Kahvang kü müknyinshekhang shuohtuh hatü ngaiyei lahtuh. Nüngi mehe dükpa ha ngei kü eshih; ha ngei kü tejo” shei e.

²⁰“Hayü hingmei-üng! Ngei SHEMBÜPA, Israel amei Kahvang khüei mang thahteke. Ngei hapa dükpeih:

²¹Jeni yahpü douthü khongkü ngei Babylon amei bhagthuh meipü hük, ngin dok nyi hükshing, hatü hon dokbhao shei ahshi-üng mükhühshi eepü nangkü ngei hathü yahpeih. Hathüyü hamei ashakshemei kahdok shotü ngin peü mü phangei shihtü dungshi shepeih” shei Akhani e.

²²Hanangkü Joshua-i shennyak hanei shom, hatü jomphongi ashakshemei mokei heih, hatü douthü kemei ashakshem mongei kahdok shotü ngin peü mü phangei shihtü dungshi chongjateke.

²³Jomi ha shem leipü douthü yah-ei Joshua hatü Israel am peü touei dei, hatü SHEMBÜPA touei ha laiteke.

²⁴Hahepak kü Joshua hatü Israel am peüi Zerahlei cheha Akhan, ngin, bhagthuh, hon, büpalei hapeüthü, büpalei mohoh, gadu hatü mi, büpalei ashakshem hatü büpalei nyupü lemphü yah-ei Akhor Kahjilei deiteke.

²⁵Joshua-i, “Mehekei nüngi ham kü henüng shanghah koei peihüpa?” shei eteke. SHEMBÜPAi shinnyih nüng kü shanghah koei peikünyüke. Hahepak kü Israel am kempai Akhan hatü shem am kemei yaongi shükei jü, hatü aopü lemphüli aw kü jaktük.

²⁶Jomi Akhanei mahng kü yaong longi thaiyei chetphong hatü hathü shinnyih thahshi nyüke. Hanangkü ha nyih mü leitü hapa shing kü, “Shanghah Kahji” shei nyüknyüke.