Read Phom Naga JOSHUA 9 Bible Online

JOSHUA 9 - Phom Naga bible

JOSHUA 9

¹Mechem Jordan yungdang heshüphi kahshang hatü kahshangla hatü Mediterranean yungkung kahjishong kübü Lebanon apshaphi thahshi nyupü Hit, Amor, Kanan, Perizz, Hiv hatü Jebus ongthüi Israel ami vehok neüpü jung danpa,

²jomi Joshua hatü Israel am khüei hokhen shingvaishi thaiyei mongjemteke.

³Shejao mechem Joshua-i Jeriko hatü Ai am kü dükshuohpü jung Gibeon ami danpa,

⁴jomi büpa kü lawlüphen kon ling. Jomi hahying hanei tem, hatü jomei gadu kü dhoila ten jüm, hatü yiü shihpü phaishuwi thapei thüngtü ha shih,

⁵shaakdaiphei lathuh thaptü thuh, hatü ashakten üm; jomi vandaipü hatü shaodaipü hahying mon kotü,

⁶jomi Gilgal baümtap mongei shüei Joshua hatü Israel shennyakthü kü, “Hamphongü tailu kahmük leipü peiküpeih, hanangkü ham mü chingmei lingshah” shei eteke.

⁷Shejao Israel shennyakthüi, “Mehekei hami am mü chingmei linghen? Üpai nyingpa, amü yopailei nyupü am vaihen aokpeih” shei e.

⁸Jomi Joshua kü, “Hamphongü nüng chongphobüthü hih” shei e. Shejao Joshua-i, “Amphongü üamang? Meleipü peiküpa?” shei phe.

⁹Hahepak kü jomi, “Hamphongü tailu kahmük leipü peiküpeih; mehenangkü hami SHEMBÜPA, ammei Kahvangei men danpeih. Mehenangkü büpai mehe Ijip kahdokei,

¹⁰hatü Jordan heongphi kü nyupü Amor am Heshbon ong Sihon, hatü Ashtaroth kü vanglem lempü Bashan ongpa Og, nyi kü mehe dükshuohpa hami ha danpeih.”

¹¹Hamei mübüthü hatü hamei kahmük kü nyupü nanglakthüi hamphong kü, “Am yenlem kü hahhen yinghen temtü daiyei jom mü pongteituh hatü jom kü, ‘Hamü am chongphobüthü hih; hanangkü ham mü uwmeilem lingshah’ shei etuh” shei ephopeih.

¹²“Mechem am mü pongteihen shingvaishi shem kübü hahying temei layaongpa, hamei hapa hahying shaamluki nyuhampeih. Shejao veihümao, shaangü vandai hatü shaodaiteke.

¹³Hatü hami yiü-ü phaishuw ja kü shih-ei daipeih, shejao sheyü shaakdaiteke; hamei lathuh hatü ashakviha kemei tailu yenlem kü kampü nangkü chang leidaiteke” shei eteke.

¹⁴Israel shennyakthüi jomphong leipü hahying hanei yah, shejao SHEMBÜPA kü hapa nang nephe.

¹⁵Hatü Joshua-i Gibeon am mü uwmei lem ling, hatü jom yemmü tuh, hatü Israel am mübüthüi uwmei lem nyuhen shei vangeishuwteke.

¹⁶Gibeon am mü uwmei lem lingtü nyih jem daipheikü Israel ami jomü yopailei nyupü am ja shei dan.

¹⁷Hanangkü Israel am layaongei aongei nyih jempabü kü jom nyupü chingnyüthü: Gibeon, Kephirah, Beeroth, hatü Kiriath-Jearim ngoi.

¹⁸Shejao Israel ami jom ching nehah-aok; mehenangkü SHEMBÜPA, Israel amei Kahvang men kü khong mübüthüi vangeishuwtük. Nanglakthü peüi hapa nang kü eela-ei langmaan.

¹⁹Shejao jomi, “SHEMBÜPA, Israel amei Kahvang men kü hami jom mü vangtüktih; hanangkü jeni jom kü lak nehingaokpih.

²⁰Jeni lahtükpü nangkü jom yemmü tuhhen; jeni lahtükpü mangtükjema Kahvangi jen hanghihühen.

²¹Jom yemmü nyemnyu, shejao jomü jenei pü kakei, yung shohü-ei anghen” shei e. Hanangkü mübüthüi epükei tuhteke.

²²Hahepak kü Joshua-i Gibeon am kü nyükei, “Ammi ham yopailei nyuyaki ham tailu kahmükei nyunyüpeih shei eshi mehekei ammi ham kü lawlüppa?

²³Ammi hapakei dükpü nangkü Kahvangi am thaüvaüteke. Am ngelei Kahvangei shemei aa kei den kü pü kakpü hatü yung shopü nedohpih” shei e.

²⁴Jomi Joshua kü, “Hapa kahdok kü am shekü nyupü nanglakthü kemei thitei mahtüktü hapa kahdok am kü shuohhen shei SHEMBÜPA, ammei Kahvangi büpa chongphobü Mosa homei epü hami ha danpeih. Hamao mahdaihen khih shei am kü nyempü nangkü hami ha dükpeih.

²⁵Hamü ammei lakmongei nyüpeih. Am kü mepa meiangke hatü jiüangke shei deih, ha ham kü dükshihma” shei eteke.

²⁶Hanangkü Israel amei lak kübü Joshua-i jom nejütüki yangei tuh.

²⁷Hapa nyih mü leitü Gibeon amü Israel am shing hatü SHEMBÜPAlei moidü shingei pü kakpüthü hatü yung shopüthü lei, hatü shinnyih thahshi jom hapakei nyüke.