Read Phom Naga 2 THESALONIKA 1 Bible Online

2 THESALONIKA 1 - Phom Naga bible

2 THESALONIKA 1

¹Paul, Silas hatü Timoti leipü Kahvang, jenei Pa hatü SHEMBÜPA Jisu Khrista kü Thesalonikalei nyupü attoi touei:

²Pa Kahvang hatü SHEMBÜPA Jisu Khrista leipü phahji hatü chingmei nyute.

³Jeihinaü hatü nyahinaüthü, am shingvaishi hami düngei Kahvang kü menvih shuohhen vongbong nyüke, hatü ha jiüphei; mehenangkü am hinglempü nyeinya nyeinya longnyüke, hatü am hüki hük kü bamteipü nyeinya danyüke.

⁴Hanangkü ammi shüveidoidei hatü hanghi pongpü peü munenei am hinglempü nangkü Kahvangei attoithü khongkü am nangkü ham changmeiyei deihnyeih.

⁵Kahvang shahphenpeyü shahhing shei hapai hunyüke, hatü Kahvang ongching mepa shingvaishi amphong shangpong, hapa kü amphong changpü shei ie-aokhen.

⁶Kahvangü shahhing: Büpai am kü shanghah shuohpüthü kü shanghah,

⁷hatü shangpongpü amphong kü nyiushemmei shuohhen, hatü ha hamphong kao shuohhen, hatü hapayü mechem SHEMBÜPA Jisu vangsho leipü büpalei wong kohpü vangsho phongshanthü mü awlom kei peihenshang ha vamhen.

⁸Hapayü Kahvang nenyingpüthü hatü jenei SHEMBÜPA Jisulei shahjangmei nebangpüthü kü bhüh yemhen.

⁹Hathüyü SHEMBÜPA, hatü büpalei müknyinshekhang ngan kübü yanei nedohnetenpü mahpü hanghi danghen,

¹⁰hatü hapayü mechem büpa laophülei daülangpü nanglakthüi büpa kü müknyinshekhanghühen, hatü büpa kü hinglempüthü leipü dhüm yahhen yiühenshang ha vamhen. Ha kü amao omei nyüpeih; mehenangkü hami am kü epü shahjangmei kü ammi hinglemteke.

¹¹Hapa mongkü tuhtü hami düngei am shingvaishi Kahvangi am kü nyükpü shangshi ieyeilemhen, hatü mei tempü peü hatü hinglempü dou peü büpalei ngani jiühühen shingvaishi hami phopnyeih,

¹²shejüang jenei Kahvang hatü SHEMBÜPA Jisu Khristalei phahji shangshi jenei SHEMBÜPA Jisulei men am kü müknyinshekhanghen, hatü ammi büpa kü müknyinshekhanghen shingvaishi hami phopnyeih.