Read Phom Naga 2 THESALONIKA 2 Bible Online

2 THESALONIKA 2 - Phom Naga bible

2 THESALONIKA 2

¹Jenei SHEMBÜPA Jisu Khrista yiükahen nang hatü jen büpa mü chemi thaihen nangkü jeihinaü hatü nyahinaüthü,

²SHEMBÜPAlei nyih ngoiteke shei hamphong leipü peipeih shei eshi thihivam shah, nevaijü shah mü, lai mü peiyei nyujema am mong nejenlenhen nevaijü mongneshanghen shingvaishi khümei enyeih.

³Hapa keiha üpaiyao amphong telutelemhü; mehenangkü mahhen demtükpü hük, khüei yaongpü shongei mangpei thahshi hatü shahkung mangpü mangvam thahshi hapa nyih nepeiküpih.

⁴Büpai khüei yaonghen hatü büpa laophü nyingi kahvang shei epü hatü khümpü dou lemphü shak kü longei aonghen, shejüang büpai kahvang hih shei eshi Kahvang phopshemei uohen.

⁵Ngei am mü nyushi hathü douthü peü ngei am kü epü nedeihnyu je?

⁶Shaang mepai büpa shoungei tuhnya ha ammi nyingei nyüke, shejüang mechem büpalei hepak ngoihen, büpa shakei vamkahen.

⁷Mehenangkü shahkung benpü joshi nyupü ngaiyei dou dükei pangdaiteke, shejao shaang shoungei nyupü mangyahlang thahshi mehe vamhen nyu, ha nevamkahen.

⁸Hapheikü shahkung benpü hük shakei vamkahen hatü SHEMBÜPA Jisulei ju kübü ngü vampai noei shüktükhen hatü büpa yiüpü müknyinshekhangi büpa mahtükhen.

⁹Shahkung benpü hükü Satanei ngan notü lemphüli shahshemi yashanyale, nyangeihepü hatü thamapü douthü dükkahen,

¹⁰hatü ten lemphü yah-ei mahdaihen nyupüthü kü lueilemhen; mehenangkü jomi shahhing kü bamhen nemong hatü yemleipü yaktük.

¹¹Ha vaipü nangkü jomi shahshem kü hinglemhen shingvaishi Kahvangi jom kü wong kohpü shahshem shompeih,

¹²shejüang shahhing kü hingnelempüthü shejao mang kü mongongpüthü nyonghühen.

¹³Shejao SHEMBÜPAi bampü jeihinaü nyahinaüthü, hami düngei am shingvaishi Kahvang kü menvih shuohhen vongbong nyüke; mehenangkü Kahvangi amphongü daühüpü Laangha dou homei hatü shahhing kü hinglempü homei yemleihen shingvaishi shongpü betjük vaihen jelangpeih.

¹⁴Hapa nangkü ammi jenei SHEMBÜPA Jisu Khristalei müknyinshekhang yahhen shingvaishi hami venpü shahjangmei homei büpai am nyükpeih.

¹⁵Hanangkü jeihinaü nyahinaüthü, ju kübü vamei epü shah vaijao lai mü nyangpü vaijao hami am kü nyuhpü nyuhpüvenpü kü wongshongi yaongtuh hatü shoungtuh.

¹⁶Shaang jenei SHEMBÜPA Jisu Khrista hatü jenei Pa Kahvang, üpai jen kü bam, hatü büpalei phahji homei jen kü nedohnetenpü nyiumei, hatü monglemhen meipü shuohpa,

¹⁷ha homei ammei mong nangthongteituh, hatü doumei hatü shah peü kü am wong kohhütuh.