Read Phom Naga 2 THESALONIKA 3 Bible Online

2 THESALONIKA 3 - Phom Naga bible

2 THESALONIKA 3

¹Dohpülei jeihinaü hatü nyahinaüthü, SHEMBÜPAlei shahjangmei lomi yanei deishihhen, hatü ammi yahpükei hapa dhüm kohshi yahhen shingvaishi ham shing phopshih,

²hatü ham nemeipü hatü shennyaktenthü kübü yanghen phopshih, mehenangkü peü payü vaipü am nevai.

³Shejao SHEMBÜPAyü hingshangpü, hatü büpai am wong kohhühen, hatü ten kübü yangphahen.

⁴Hami epü douthü ammi düknyüke, hatü nedoh-i dükkahen shei SHEMBÜPA kü monglempü nyüpeih.

⁵SHEMBÜPAi ammei mong Kahvangei bampü hatü Khristai shuohpü nenteiaokpü lemei nyemmüma.

⁶Jeihinaüthü, nehetpü jeihinaüthü hatü ammi ham leipü yahpü shahjangmei aimü nenyupüthü kübü khaatei nyutuh shei SHEMBÜPA Jisu Khristalei men kü hami am kü shahkung shuohnyeih.

⁷Mehenangkü mekei ammi hamei yangnyu lappü kü mühen, ha am nyingi nyingei nyüke. Ham am mü nyushi neheti nenyu,

⁸nevaijü lop neshuoh-i hami üamei hahyingao nehah, shejao amphong üpa kao hami hanggovih neshuohhen shingvaishi nyakhingai thüngei hami dou dükpeih.

⁹Hami ha dükpeyü hami henüng keipü sheühpü yahhen jiüpü nevai shei nevai, shejao ammi mühen shingvaishi hami lappü hük leihen nangkü dükpeih.

¹⁰Mechem ham am mü nyupa, hami am kü ha shahkung shuohpeih: “Shennyak hüki dou nedükjema, büpa hah-ao nehahhen vongbong.”

¹¹Amphong khongkü haneiyü neheti nyunyüke. Jomphong nang nekoh-i nevai, shejao aung nelei-i nyunyüke shei hami danpeih.

¹²Hapa keipü shennyakthüi chongkhenei nyutuh hatü jomei shünyü langei nyutuh shei SHEMBÜPA Jisu Khrista kü hami shahkung shuoh-ei enyeih.

¹³Jeihinaü nyahinaüthü, amphongi jiüpü dükpü kü teteng.

¹⁴Shennyak hanei ami hami ha lai kü nyangpü shah nebangjema, büpa meishi veiyei tuhtuh. Büpa veü nyemdangnüng ammi büpa mü tejemtei.

¹⁵Shejao ammi büpa kü vepa hük kei tedeih, shejao jeihinaü hük leshi shahvüng shuohtuh.

¹⁶Shaang chingmeivangmei SHEMBÜPA büpai-üng hepak peü kü hatü lem peü kü am kü chingmei nyemyahpha. SHEMBÜPA am peü mü nyute.

¹⁷Ngei, Paul, ngelei laki hapa selam lai nyangnyeih. Hapakei ngelei lai peü kü ngei füoshang shüngei nyangnyeih.

¹⁸Jenei SHEMBÜPA Jisu Khristalei phahji am peü mü nyute.