Read Phom Naga 1 TIMOTI 1 Bible Online

1 TIMOTI 1 - Phom Naga bible

1 TIMOTI 1

¹Paul, jen Yemleipüba Kahvang hatü jenei monglem Khrista Jisulei shahkung homei Khrista Jisulei phongshan toueipü,

²Vaipü kü ngelei mong hahpü hapeü Timoti touei: Pa Kahvang hatü jenei SHEMBÜPA Khrista Jisu leipü phahji, yahyang hatü chingmei nyute.

³Nyuhpüvenpü lebü meheyao nenyuhhen shingvaishi nüngi shennyak hanei kü nyuhhen nangkü ngei Macedonia lemei daishingkü ngei nüng kü epükei nüng Ephesialei nyutuh shei ngei enyüpeih,

⁴hatü jom nyingi bütetpavan yimpila hatü dohpü neshiüpü bülem phukteipai, hinglempai nyingpü Kahvangei küpjan nevai, neshetnephen vamhünyeih.

⁵Shejao hapakei nyuhpüvenpü mükhongü daülangpü mongdang, mongdeih meipü hatü kenhingei vaipü kübü vampü bampü nyüpeih.

⁶Shennyak haneiyü hathü kübü keüei daiyei yahlak neshiüpü langmaanshapshü lemei daiyei,

⁷jomi mehe enya hatü mehe douthü jung enya ha nenyingi shahkung nyuhbüthü leihüei lepdaiteke.

⁸Shaang hanei ami jiüshi dükjema shahkungnyü-ü meiangpeih shei jeni nyingnyüke.

⁹Ha lappai shahkungnyü-ü neshaipüthü shingvaishi netem shei nyingnyüke, shejao shahkung mangpü, ven nedanpü, Kahvang nenyingpü hatü mangthü, nedaünelangpü hatü sheihdaipü, laophülei nyü nevaijü pa jüpüthü, shennyak jüpüthü,

¹⁰iyjeiphaileipüthü, bahai baha mü hatü yemhimak mü mükbongjuyungpüthü, aa yupüthü, shahshem epüthü, shahshem denbüthü shingvaishi,

¹¹hatü ngei kü shuohpü moihimanpü Kahvangei müknyinshekhang shahjangmei kü jiüshi nyuhpüvenpü meipü khüei nyupüthü shingvaishi shahkungü lingpeih.

¹²Ngei wong kohhüpü Khrista Jisu, jenei SHEMBÜPA kü ngei mongongnyeih; mehenangkü büpai ngei hingshangi nyüke shei nyingei ngei büpalei dousho kü jeteke.

¹³Chem ngei büpa kü ten eyei, shüveipü am, hatü iy-aongmashahüpü am nyu, shejao ngei kü phahji hupeih; mehenangkü ngei ha nenyingi hatü hingnelempai dükteke.

¹⁴Khrista Jisu kü nyupü bampü hatü hinglempü mü jenei SHEMBÜPAlei phahji ngei kü changshi khüpphopeih.

¹⁵Hapayü dhao mü yah-aokbenüng hingshangpü shah: Khrista Jisu-ü mangthü yangnüng kahdoknyülei yiü, ha khongkü ngei peü mü nemeipüba.

¹⁶Shejao ha tata kü üami büpa kü hinglem yangnyuyem danghen shei Khrista Jisui nedohnetenpü büpa nenteiaokpü lappü hük huhen shingvaishi ngei keipü nemeipü mang shennyak kü phahji hupeih.

¹⁷Shaang dohpü neshiüpü, ongpa, nemahnemenpü, ne-eeaokpü büpa mon Kahvang kü dhüm hatü müknyinshekhang den den kü nyute, Amen.

¹⁸Timoti, ngelei hapeü, nüng nangkü shelei tetpüvanpü shahthü keiha nüngi hathü mü kamei vehok meipü hok-aokhen shingvaishi ngei hapa nyuhpüvenpü nüng kü shuohnyeih,

¹⁹hatü hinglempü nyuei mongdeih meipü nyutuh. Hapa mongdeih meipü yaktükpü homei shennyak haneiyü jom vaipü kü beneilangei leidaiteke.

²⁰Hathü khongkü Hymenaeus hatü Alexander nyi Kahvang khüei ne-eelahen shingvaishi ngei kahshih kü lanei shuohtüktih.