Read Phom Naga 1 TIMOTI 6 Bible Online

1 TIMOTI 6 - Phom Naga bible

1 TIMOTI 6

¹Üami aalei pang phangkü nyüpa, peüi laophülei shembü kü dhüm shuohtuh, shejüang Kahvangei men hatü nyuhpüvenpü kü ne-eelahen.

²Aathü, üam vaipü shembüthü nyüpa, jomphong kü dhüm neshuoh-i tenyu; mehenangkü jomphongao jeihinaüthü nyüke. Shejao jomi hathü meipüba kü chongphohütuh; mehenangkü jomei dou kübü nanglei dangpeyü bampü vaipüthü nyüke. Hathü dou jung nüngi jomphong kü nyuh-ei etuh.

³Jenei SHEMBÜPA Jisu Khristalei meipü shahthü hatü Kahvang nyingpü lem kü nyuhpüvenpü kü nejiüi lemhük kei üami nyuhnya,

⁴hayü changmeipü, danaokpü neshiüpü shejao venpü shah nangkü shah shükteihüpü hatü dokteihüpü nyüke. Henüng kübü mükhühpü, dehilao, yaüeilungpü, ten kohshi mongnelemteipü,

⁵hatü sholi mongdang tendai, shahhing neshiüi düngei dokteikhaungkhei vamnyeih. Kahvang yempeyü mop danghen lem shei jomi deihnyüke.

⁶Hingmei, Kahvang nyingpü kü mongongpü omshi nanglei longpü nyüpeih;

⁷mehenangkü hapa kahdoknyülei meheyao koei neyiü, hakei-üng jeni haleipü meheyao yah-ei nedai-aokpih;

⁸shejao büm-ow hatü hahying nyuphei keyü jeni hathü kü mongmeishi nyuhen.

⁹Shejao üami shemmei leihünya dokpü kü vühen, hatü nanglakthüi lomohpü hatü mahpü sholi neshiüpü hatü yemei dihen taikon kü mandainyeih.

¹⁰Mehenangkü lop kü bampeyü mang peüei tünglang, hatü shemmei leihüpü nangkü hanei amü vaipü kübü yanei lüdaiteke, hatü mongmang longpai jomei mongdang mangdaitü nyüke.

¹¹Shejao Kahvang shennyak nüng payü hathü peü yaktüktuh; daülangshemshepü, Kahvang nyingpü, hinglempü, bampü, munenpü, inyainyempü changei daituh.

¹²Hinglempü vehok meipü hoktuh; vanyangyem kü shoungtuh; hapa shingvaishi nüng nyükpeih, hatü denpü longi omshi nüngi lahpü meipü lingpeih.

¹³Peü kü yangnyu shuohpü Kahvang touei, hatü Khrista Jisu, üpai Pontius Pilat touei denpü shuohshingkü lahpü meipü lingpa,

¹⁴ha jenei SHEMBÜPA Jisu Khrista mangyiü thahshi kawhikang hatü eela neshiüi hapa shahkungnyü dükhen ngei nüng kü hannyeih,

¹⁵mepa Kahvangi büpalei hepak kü koei peihen — büpalei Kahvang, moihimanpü hatü vanglem lembü, ongthü khongkü Ongpa, shembüthü khongkü SHEMBÜPA,

¹⁶büpa monha nemahnemenpü, hatü üpaiyao nenei neheih-aokpü vangngai kü nyunyeih; üpaiyao büpa ne-ee hatü ne-eeaokhen, büpa kü dhüm hatü wong düngei nyute. Amen.

¹⁷Shaangpü kahdoknyü kü nyupü shemmeithü kü nechangmeihen, nevaijü shaang nyutü nenyuhen mop kü mongnelemhen etuh, shejao jen hüshemhen shingvaishi lemphü mop changshi shuohpü Kahvang kü monglemhen etuh.

¹⁸Doumei dükhen, doumei kü shemmei leihen; nekaungi mih mü hanteihen temei nyuhen etuh.

¹⁹Hapakei dükpai ngoikahen den shingvaishi wong kohpü chongnyiam keiha jomi laophü shing mop jaohen, shejüang jomi yangnyu mepa hingshangpü yangnyu nyüpa, ha kü shoungaokhen.

²⁰Timoti, nüng kü mehe kophopa, ha yomtuh. Ten vapvappü, hatü mepa hanei ami pungei, “Kihikon” shei eshi neshetnephen ngashah shükteinya, henüng kübü khaatdaituh;

²¹henüng eyei haneiyü vaipü kübü yandaidaiteke. Nüng mü phahji nyute.