Read Phom Naga 2 TIMOTI 3 Bible Online

2 TIMOTI 3 - Phom Naga bible

2 TIMOTI 3

¹Dohpü nyih kü shangpong yakyingpü hepak peikahen, nüngi ha nyingtuh.

²Mehenangkü shennyakthüi laophü kü mon bampü, lop bampü, daühingam epü, changmeipü, deyeinaamei epü, nyühipalei ven nedanpü, menvih neshuohpü, nedaünelangpü,

³hangku kü nebampü, mang netükteipü, ühingpü, dehilao vamhüpü, ungei-aeiyei neaokpü, meimongnyahmong jükpü, mei kü jiühitpü,

⁴vaipü kübü yandaipü, jiüjiükei dükpü, awdapü, Kahvang kü bamhen nangjei mongongmongle kü bampü,

⁵shakdoki Kahvang nyingnyu kei shejao hingshangpü büpalei ngan yaktükpüthü vamkahen. Hathü kübü khaatei nyutuh.

⁶Jomphong khongkü haneiyü shemthülei peiyei wong nekohpü nyühathü yepei yahtü jomei mang hanggo kohünyüke, hatü jomi lümpü lemphü lemei dainyüke.

⁷Ha nyühathüi düngei dannyüke, shejao shahhing nyingpü touei nepeinyu.

⁸Jannes hi Jambres nyi-i Mosa khüei yaongpükei sholi mongdang tendaipü hatü shahshemi vainyeih shei epüthüi shahhing khüei yaongnyüke.

⁹Shejao jom ahshi daei nedaiküpih; mehenangkü hapa shennyak nyi keiha jomei ngadou peüi nyingdaikemhen.

¹⁰Shaang nüngi ngei nyuhpüvenpü, ngelei dükhiling, yangnyu kü ngelei mükhong, ngei hinglempü, munenpü, ngei bampü hatü ngei wongshongi yaongpü,

¹¹hatü Antiokh hatü Ikonium hatü Lystralei ngei shüveidoidei ponghahpü munenpü nüngi eeteke. Shejao SHEMBÜPAi hathü peü kübü ngei yangpeih.

¹²Hingmei, üami Khrista Jisu kü Kahvang nyingpü yangnyu nyuhünya peüi shüveidoideipü ponghen.

¹³Shejao nemeipü hatü mih kü vinei dükpüthü, mih kü lawlüppüthü nemeipü kübü nemeipüba leidaihen.

¹⁴Shejao nüng payü nüngi mehe dan, hatü wongshongi hinglem, ha kü nedoh-i nyutuh; mehenangkü nüngi hathü meleipü nyingpa ha nüngi nyingei nyüke,

¹⁵hatü hashih mebü nüngi Daülangpü Laihing, mepai nüng kü Khrista Jisu kü hinglempü homei yemleihen shingvaishi nyuhhen aoknya, ha nüngi nyingei nyüke.

¹⁶Laihing peü Kahvangi ngü mü duei ehüpeih, hatü hapayü nyuhhen venhen, pungpü kü lohhen, nejiüpü kü yeanhen hatü daülangi nyuhen nangkü nyuhpü venpü nyüke,

¹⁷shejüang Kahvangei shennyakthü peü doumei peü shingvaishi dükaokhen temtüktü nyuhen nyüke.