Read Phom Naga TITUS 2 Bible Online

TITUS 2 - Phom Naga bible

TITUS 2

¹Shejao nüng payü nyuhpüvenpü kü mehe jiütei, ha nyuhtuh.

²Pajeithü kü jiübaong kü nyuhen, mong shuohpü, ungei-aeipü hatü hinglempü, bampü hatü munenpü kü meishi nyuhen etuh.

³Hapa keiha nyüyongthü kao nyingnyoi kü dhüm kohshi nyuhen etuh; ühing itpü am nevai, nevaijü yiülei aa nevai; jomi mehe mei ha nyuhhen vongbong,

⁴shejüang jomi nelathü kü laophülei baha hatü hapeüthü kü bamhen mongnang thongaokhen,

⁵ungei-aeihen, daüeilangei nyuhen, shemong meishi shümaokhen, bampü, laophülei baha phangkü shüaokpü am leihen, shejüang Kahvangei shah dhüm neshiüi neleihen.

⁶Hapa keiha nethethü kao ungei-aeihen etuh.

⁷Doumei peü kü nüng nyingi lappü meipü hutuh, hatü nüngi nyuhpü kü shahhing, hatü mih yepei leiaokhen mü nyuhtuh,

⁸hatü meipü shah mechemao nyonghününg neaok; shejüang jen kü khüpüthüi ten ehen meheyao neshiüi jom veühen.

⁹Aathü kü laophülei shembü phangkü shühen, hatü lemphü kü jom hüshemhühen etuh; jomi shah kü neleiteihen vongbong,

¹⁰hatü jomei douhinang kü neyomyaihen, shejao hingshangi nyupü kü den ngoipü hatü changpüshapü huhen, shejüang lemphü kü Kahvang jen Yemleipübalei nyuhpüvenpü kü doumong leiaokhen.

¹¹Mehenangkü peü kü yemleipü koei peipü Kahvang shakei vamteke.

¹²Hapai jen kü Kahvang nenyingpü yangnyu, kahdoknyü lümpü vaüpü kübü yanhen nyuhnyüke, hatü shaangpü den kü ungei-aeipü yangnyu, kangshangpü hatü Kahvang nyingpü yangnyu nyuei,

¹³moihimanpü monglem hatü jenei longpü Kahvang hatü Yemleipü Jisu Khristalei müknyinshekhang shakei vamküpü danhen enyüke.

¹⁴Büpai jen mang peü kübü angei leihen, hatü büpai laophü shing lompü vaihen nangkü doumei dükhüpü nanglakthü daühühen shingvaishi büpai jen shing laophülei yangnyu shuoh.

¹⁵Hathü dou nüngi nyuhtuh. Nüng kü shuohpü wong kempai noei nangthongtuh, hatü loheishuoh. Üpaiyao nüng kü ne-ienelemi noteihen mü tenyu.