Read Phom Naga TITUS 3 Bible Online

TITUS 3 - Phom Naga bible

TITUS 3

¹Nanglakthü kü vanglem lempü hatü wong nopüthü phangkü nyuhen, ven danhen, doumei lemphü tempülempü nyuhen,

²üpa kao ten ne-ehen, depülaopü nenyuhen, inyainyemi nyuhen, hatü peü touei nenteiaokpü huhen eyeishuoh.

³Mehenangkü jenao chemü ngapa, ven nedanpü, lawlüppü hatü yahhahhüpü hatü mongongmongle lemphülei aa vaishi nyuhampeih. Jenao ten dükpü, mükhakpü, jen kao jiühithahpü hatü jeni mih kü jiühitpü kü yangnyu nyuhampeih.

⁴Shejao mechem Kahvang jen Yemleipübalei phahji yahyang hatü bampü shakei vampa,

⁵büpai jen yangpeih. Hapayü jeni daülangpü dou dükpü nangkü nevai, shejao hapayü büpalei phahji shangshi Laangha Daülangpai jen ja bühpü kü daütüktü jen ja leihüei yangpeih.

⁶Jisu Khrista jen Yemleipüba homei büpai ha Laangha jen kü changshi khüppeih;

⁷hanangkü phahjipai jen dahshakhüei nedohnetenpü yangnyu monglempü kü mükjüp yahpü am leihüpeih. Hapa shah-ü hingshangpü.

⁸Üami Kahvang kü hinglemei pei, hathüiyao doumei kü lanei shuohhen shingvaishi nüngi hathü kü dhaümshi dükkahen ngei nanyüpeih; hathü dou longi meipeih, hatü peü shing nanglei nyüpeih.

⁹Shejao ngashah shükteipü, bülem yemteipü, dehilao hatü shahkung nangkü depülaopü peü tuhtüktuh; mehenangkü hathüyü nanglei hatü yahlak neshiü.

¹⁰Hanteipantei vamhüpü shennyak kü chem nyipa shahvüng shuohtuh, hapheikü büpa mü meheyao te-etei.

¹¹Hapa keipü shennyakü tendaipü hatü mang, laophü nyingi nyonghahnyeih shei nüngi nyingei nyüke.

¹²Mechem ngei nüng touei Artemas nevaijü Tekhikus shomphahenshang nüngi ngei yemei Nikopolislei heihkahen kentuh; mehenangkü ünyüyang kü ngei halei nyuhen shei deihshi nyüpeih.

¹³Shahphenbü Zemas hatü Apollos nyi shomphahen khetuh, hatü meheiyao neshanghahhen mü veishuohte.

¹⁴Nyihjeih nadang lanaokhen shingvaishi, hatü meheyao nanglei neshiüi nenyuhen shingvaishi doumei kü lanei shuoh-ei dükhen nanglakthü kü nyinghütuh.

¹⁵Ngei mü nyupüthü peüi selamja. Hinglempai jen kü bampüthü peü kü selam ejate. Phahji am peü mü nyute.