Read Phom Naga PHILEMON 1 Bible Online

PHILEMON 1 - Phom Naga bible

PHILEMON 1

¹Paul, Khrista Jisu kü khoklatei küppü hatü Timoti jenei jeihinaü nyi-i, Jeni bampü küphü hatü chemi chongphopü Philemon,

²jenei nyahinaü Apphia, jenei küphü veshan Arkippas, hatü ammei shemei thaiteipü attoi am touei,

³Jenei Pa Kahvang hatü SHEMBÜPA Jisu Khrista leipü phahji hatü chingmei am mü nyute.

⁴Ngei phoppü kü nüng deih-ei ngei düngei Kahvang kü menvih shuohnyeih;

⁵mehenangkü SHEMBÜPA Jisu kü nüngi hinglempü hatü daülangpüthü kü bampü jung ngei dannyüpeih.

⁶Khrista kü jeni angpü doumei peü kemei nyinghen shingvaishi nüng hinglempü wong kohshi hanteihen ngei phopnyeih.

⁷Nüngi bampai ngei kü mongong hatü mongnang thongpü longpü shuohpeih; mehenangkü jeihinaü nüng homei daülangpüthülei mong thahümahüpeih.

⁸Ha vaipü nangkü ngei nüng kü nüngei dousho düktuh shei Khrista kü monglongei shahkung shuohaokjao,

⁹ngei bampü kü laphentü nüng kü khümei enyeih — hatü ngei, Pauli hapayü pajei hük leshi hatü Khrista Jisu kü khoklatei küppü hük keiha enyeih.

¹⁰Ngei ngelei hapeü Onesimus shingvaishi nüng kü khümnyeih; ngei khoklatei nyushi ngeiyü büpalei pa leipeih.

¹¹Sheleiyü büpa nüng touei yahlak neshiüi nyuhampeih, shejao shaangü büpayü jiphen shingvaishi nanglei nyüpeih.

¹²Ngei büpa, üpa ngelei mongdang kei nyu, nüng touei nyokei leiphünyeih.

¹³Ngei shahjangmei nangkü khoklatei küppü hepak kü nüng leimao ngei kü nyemsheüphanüng ngei mü anghüei deihpeih,

¹⁴shejao nüngi bampü doumei dük, hayü kangeishongei nevai shejao nüngei mong kübü vampü vaihen nangkü ngei nüngi nemongpü kü meheyao nedükhü.

¹⁵Üpai nyingpa, ha vaipü nangkü nüngi den kü büpa leiyei anghen shingvaishi büpa nüng toueipü kansho hük shing lüdaipü vaihen aokpeih.

¹⁶Hajük keyü aa hük kei nevai, shejao aa hük mao nyeipüba, bampü jeihinaü hük, anyei vaishi ngei kü, shejao nyeinya nüng kü phai hatü SHEMBÜPA kü nyüpeih.

¹⁷Hanangkü nüngi ngeiyü nüng mü sheühteipü shei iejema, nüngi ngei yahnyu kei büpa mongongshi nyokei yahtuh.

¹⁸Büpai lemhük kü dangkao shaiphaei nevaijü lemhük hang nüng touei nyujema, ha ngei kü yüshih.

¹⁹Ngei, Pauli ha ngelei laki nyangphünyeih: Ngei ha shemhen; nüngei yangnyui ngei touei mehe shemhen nyu, ngei ha jung meheyao ne-enyih.

²⁰Hih, jeihinaü, SHEMBÜPA kü ngei nüng leipü ha nanglei dangshah! Khrista kü ngei mongdhüng vamhütuh.

²¹Ngei epü mao nyeishi nüngi nyingei ven bangei dükkahen shei monglemei ngei nüng kü hapa nyangnyeih.

²²Shao shah hük — ngei ngoihen shing hük temtuh; mehenangkü ammi phoppü homei ngei am touei leikahen shei monglemnyeih.

²³Khrista Jisu kü ngei mü chemi khoklatei küppü Epaphras-i selamja,

²⁴hatü chemi chongphopü Mark, Aristarkas, Demas hatü Luk hathüi selamja.

²⁵SHEMBÜPA Jisu Khristalei phahji ammei laangha mü nyute.