Read Phom Naga HEBREW 1 Bible Online

HEBREW 1 - Phom Naga bible

HEBREW 1

¹Aivang den meyü Kahvangi jenei bühipathü kü lem longi hatü laolao kü thihivamthü homei ehamteke,

²shejao hapa dohpü nyihthü kü büpai jen kü laophülei Ha üpa büpai douthü lemphülei mükjüp vaihen je, hatü üpa homei büpai kahdoknyüthü ling, büpai büpa homei jen kü enyüke.

³Büpayü Kahvang müknyinshekhang khanghüpü hatü Kahvang mekei nyu, büpa meimei anpü, hatü douthü peü büpalei ngan shah-i shümei tuhnyeih. Büpai mangthü daühüpheikü büpa vangsholei Jeiyongpalei lakdah philei uoteke;

⁴hanangkü büpa vangsho phongshanthü mü longpüba lei, hatü büpai mükjüp dangpü menü jomphongei men mü chah-ei meipü nyüke.

⁵Hanangkü mepa vangsho phongshanthü kü Kahvangi hei epa? “Nüngü ngelei Hapeü; shinnyih ngei nüngei Pa leitepih;” Nevaijü shao, “Ngeiyü büpalei Pa vaihen, hatü büpayü ngelei Ha vaihen.”

⁶Hatü shao mechem büpai kahdoknyülei laophülei hashongpa shompa, büpai hei epeih: “Kahvangei vangsho phongshanthü peüi büpa kü khümtuh.”

⁷Vangsho phongshanthü nang büpai ha epeih, “Büpai laophülei vangsho phongshanthü vanglük, hatü laophülei chongphobüthü awlom vaishi lingpeih.”

⁸Shejao Hapeü nang büpai ha epeih, “Nüngei ong uoshing, Oh Kahvang, den den kü nyüke, hatü daülangpü lenshuoh-ü nüngei ongchingei lenshuoh.

⁹Nüngi daülangshemshepü kü bam, mang kü jiühit; Hanangkü Kahvang, nüngei Kahvangi nüngei küphüthü mü nyeishi nüng kü mongongpü mainga-i phupeih.”

¹⁰Büpai shao eteke, “SHEMBÜPA, nüngi pangpülei kahdoknyü chongnyiam ling, hatü vangshothüyü nüngei lakdou;

¹¹Jom mahdaihen, shejao nüng nyuhen; jom peü ashak kei chang leidaihen;

¹²ashak kei nüngi jom dütükhen, hatü ashak kei ow yeiyadaihen, Shejao nüng düngei lakshing, hatü nüngei bongthü nekemdaihen.”

¹³Shejao mepa vangsho phongshanthü kü büpai, “Ngei nüngei vepathü nüngei la shoupshing mangleihü thahshi ngelei lakdah philei uotuh” shei epa?

¹⁴Vangsho phongshanthü peü Kahvang chongphopü laanghathü, yemleipü mükjüp danghenthü touei büpai chongphohen nangkü shompüthü nevaipü je?