Read Phom Naga HEBREW 11 Bible Online

HEBREW 11 - Phom Naga bible

HEBREW 11

¹Shaang hinglempeyü jeni monglempü douthü lekpü, ne-eepü douthü mongkü pongpü nyüke.

²Jenei bühipathüi hinglempü nangkü Kahvangi mong hahpeih.

³Kahdoknyü-ü Kahvangei shah-i lingpeih shei hinglempai jeni nyingnyüke. Hanangkü mehe jeni ee, hayü ne-eepü douthü kübü lingteke.

⁴Hinglempai Abeli Kain mao nyeinya Kahvangi yahbenüng moila shuoh. Hapa homei büpayü daülangpü shennyak shei yah, hatü Kahvangi büpalei moila kü mong hah; büpa didai shejao büpai hinglempü homei shaangao shah enyüke.

⁵Hinglempai Enokh-ü dipü ne-eehühen shingvaishi yemmü yahlang, hatü üpaiyao büpa nedang; mehenangkü Kahvangi büpa yahlangteke. Mehenangkü büpai Kahvang mong hahhüpeih shei büpa yahlang shekü denpü shuohteke.

⁶Hinglempü neshiüi Kahvang mong hahhühenü neaokbenüng; mehenangkü üami büpa touei peihenshang, büpa nyüpeih shei hinglemhen vongbong hatü büpa yempüthü kü laklei shuohnyeih.

⁷Hinglempai Noah-i ne-eejao peikahen vongshüh nang Kahvangi shahvüng shuohpü nangkü hapa shahvüng kü dhüm shuoh-ei jom shem yanghen jahas hük ling; ha homei büpai kahdoknyü nyonghü hatü hinglempai daülangshemshepülei mükjüp leiteke.

⁸Hinglempai Abrahami ven danei büpai mükjüp vaishi danghen shei epü shingei nyükshingkü layaongei dai; büpa melei dainya, nenyingi layaongei dai.

⁹Hinglempai büpai kung kahdokei yenpa hük keiha hapa lahpü kahdokei bükhishem veyei nyu; büpa Isak hi Jakob nyi mü ashakshemei nyu, hatü jijinyiyao aihük lahpü Kahvang leipü dang.

¹⁰Mehenangkü büpai Kahvangi lingtükpü hatü vetükpü chongnyiam nyupü chingnyü kü ongyangei veiteke.

¹¹Hinglempai büpa viüdaijao hatü Sarah nyülan leidaijao hapeü anghen wong dang; mehenangkü hapa lahpü jiühühen büpai Kahvang kü hinglem.

¹²Hanangkü shennyak hük dipü lanei nyudaipü kübü vangsho lithathü kei hatü yungching bhihhiphang kei hühihathü bühteke.

¹³Ha shennyakthü peü jom dipü thahshi hinglempü kü nyu. Jomi lahtükpü douthü nedang, shejao jomi tailuei hathü dou peijapü eeyei mongong. Jomi hapa kahdoknyü kü jomphongü yenpa hatü benha shei deih;

¹⁴mehenangkü nanglak üami hapakei enya, jomi laophülei lompü kahmük yemnyeih shei lekei hunyüke.

¹⁵Jomi paoh jomi tuhphongpü kahdok deihlangmeyü jom halei nyokei leidaihen aokshi shepeih.

¹⁶Shejao jomi meipü kahmük ongyang, lappai, vangsho amei kahmük. Hanangkü Kahvangü jomei Kahvang shei nyükhen kü veüei nedeih; mehenangkü büpai jom shing chingnyü hük temshuohteke.

¹⁷Kahvangi Abraham kü dokshingkü hinglempai büpai Isak jakpü moila shuoh. Üpai lahtükpü dang, büpai hashong moilom moila shuohtükhen mü nyu.

¹⁸Kahvangi büpa kü, “Isak homei mon ngei lahtükpü hühihathü nüngi danghen” shei eteke.

¹⁹Kahvangi hanei am didaipü kübüao yangei leiaokhen shei Abrahami hinglem, hatü hingmei büpai Isak dipü lanei nyokei dang.

²⁰Hinglempai Isaki Jakob hatü Esau nyi shing ngoikahen nangkü moihiman yüshuoh.

²¹Hinglempai didaihen mü nyushi Jakobi büpalei lenshuoh kü shongtü aümei khümtü Josephei hapeü nyi kü moihimanshuoh.

²²Hinglempai Joseph-i büpalei yangnyu dohpülei Israel am mülanghen jung e, hatü büpalei mahngvang nangkü mehe dükhen ha eteke.

²³Hinglempai Mosa bühpheikü chenyü chepai lenyang jem thahshi joei tuh; jomi naü-ü nethe meishi ee, hatü jomi ongpalei shahkung kü nenyem.

²⁴Hinglempai mechem Mosa nethe leipa, Pharaohlei yiükhalei ha shei nenyükhahhü,

²⁵shejao shaang dohdaihen mang mongongmongle kü mongong leimeyü Kahvangei nanglakthü mü shangponghen jehah.

²⁶Ijip amei mop leimü Khristalei men kü shangponghen nyeinya longpü mop shei büpai deih; mehenangkü büpai shesha leipü laklei kü veishi nyuteke.

²⁷Hinglempai büpai ongpai mongshihpü kü nenyemi Ijip tuhphong; mehenangkü büpai müki ne-eepü Kahvang eepheikei munenei nyu.

²⁸Hinglempai büpai Hompü Mo hah, hatü iy nyioei tuh; hanangkü hashongpathü jüpübai Israel amei hashongpathü nejütük.

²⁹Hinglempai nanglakthüi kahvan kü kei kamei Hakla Yungching homei dai, shejao mechem Ijip amao hapakei dük, jom yungi lümlang.

³⁰Hinglempai jomi nyih nyet shonpheikü Jeriko bhamthü laamdai.

³¹Hinglempai büm yupü Rahabi ven nedanpüthü mü nemah; mehenangkü pinnyüi gühshuk peipüthü mongongshi yah.

³²Shao meshük nyeishi ngei ehen? Gideon, Barak, Samson, Jephthah, David hatü Samuel hatü thibüthü jung ehen hepaki nechangang.

³³Jomi hinglempü homei ongchingthü neütük, shahhingi vanglem lem, lahtükpü dang, mailangthülei juao küptük,

³⁴mangpü awlom mettük, yannah kübü yang, wong nekohjao wong dang, vehok kü hampa lei, hatü Kung am veshanthü nyaihütük.

³⁵Nyühathüi jomei mahng yangei leijapü nyokei dang. Lebüthüyü yangei leipü meipü yangnyu ongyangpai shüveidoideipü kübü laiyei nedai-i ponghah-ei di.

³⁶Lebüthüyü ne-ienelempü, üphahpü hatü nyiamvüi shatü khoklatei tuhhahpü pongteke.

³⁷Jomphong kü yaongi shükei, nyi anei püvet longkhoih-i vetei, yani bapei jüteke; jomphong kü mishuw hatü yumshuw yah-ei owhü, taoeinangei shüveiyei hanghiyei angteke.

³⁸Jom shingvaishi kahdoknyü-ü meipü nevai-i nyu. Jom jahpanei, kahshangthülei, yaongsha hatü kahshalei joei longtei.

³⁹Hathü peü shak kü jom hinglempü nangkü mongmeijao Kahvangi mehe lah, ha jomi nedang.

⁴⁰Kahvangi jen shing lemhük meipüba temei nyüke. Hathü nanglakü jen mü chemi mon changpüshapü leihüteke.