Read Phom Naga HEBREW 2 Bible Online

HEBREW 2 - Phom Naga bible

HEBREW 2

¹Hanangkü jeni mehe dan, ha kübü yanei nedeilanghen shingvaishi jeni longi kenhingei mong shuohhen khih.

²Mehenangkü vangsho phongshanthü homei epü shahjang hingshangpü vaijema, hatü mang thahpü nevaijü ven nedanpü peü jiüpü hanghi dangjema,

³hajük longpü yemleipü yaktükjema jen mekei etü yanghen? Hapayü shongpü kü SHEMBÜPA homei baong, hatü hapayü büpa leipü danpüthüi jiüpeih shei ham kü lekhünyüke.

⁴Kahvangiyao hapa kü nyangeihepü, thamapü hatü yashanyale longi, hatü büpai mongpü aimü Laangha Daülangpü thinthothü shuohpü homei denpü shuohnyüke.

⁵Jeni shaang eteipü ngoikahen kahdoknyü jung Kahvangi vangsho phongshanthü kü lanei neshuohangpih.

⁶Shejao melei shangkü hanei ami denpü shuoh-ei nyüke: “Nüngi büpa kü hajük mong hahhen mü, hatü nüngi büpa kü junghen mü shennyak ha meheang?

⁷Nüngi büpa vangsho phongshanthü mü kansho hük shingvaishi maani phangpa kü ling; nüngi büpa kü müknyinshekhang hatü dhümi athen thenhü,

⁸hatü lemphü douthü büpalei la phangei tuhteke.” Shaang lemphü douthü büpa phangkü tuhtü Kahvangi mepa-ao büpa phangkü nenyui netuhphong. Shejao shaang payü jeni lemphüli büpa phangkü nyupü ne-eenyu.

⁹Shejao Jisu, üpa kanja shing vangsho phongshanthü mü maani phangpa kü ling, shaang jeni büpa dipü ponghahpü nangkü müknyinshekhang hatü dhümi athen thentü eenyüke; hanangkü Kahvang phahji homei büpai peü shing dipü ponghah.

¹⁰Kahvang, üpa shing hatü üpa homei kahdoknyü nyunya, hapeüthü longi müknyinshekhang touei mühen shingvaishi jomei yemleipüba shangpong homei changhüshahühen jiüpü nyuteke.

¹¹Mehenangkü daühüpüba hatü daütükpüthü peüei Pa hük nyüke. Ha tata kü Jisui jomphong peü kü jeihinaü hatü nyahinaüthü shei nyükhen neveünyu.

¹²Büpai enyüke: “Ngelei jeihinaü hatü nyahinaüthü kü ngei nüngei men baonghen; thaipü khong chi kü ngei nüngei men longhen.”

¹³Hatü shao, “Ngei hinglempü büpa kü nyuhen.” Hatü shao, “Ngei hatü ngei kü Kahvangi shuohpü hapeüthü hammü nyüpeih.”

¹⁴Hanangkü hashihthüi iy hatü phai kü hean yahpükei büpai laophü nyingi jom kei hangku nyingnyoi yah. Büpai hapayü büpa dipü homei dipü shak kü wong nyupü Kahshih mahtükhen nangkü dükpeih,

¹⁵hatü dipü kü nyempai aa vaishi küpei tuhpü jomei yangnyuthü bümei leihüpeih.

¹⁶Mehenangkü büpayü vangsho phongshanthü kü sheühhen neyiü, shejao Abrahamei hühihathü kü sheühhen yiüpü lekei eenyüke.

¹⁷Hanangkü lemphü phikü büpayü laophülei jeihinaü hatü nyahinaüthü kei leihen mü vam, shejüang nanglakthülei mang tükhen shingvaishi jakpü moila leihen büpayü phahji kohpü hatü hingshangpü Kahvang chongphopü dousho kü ngongchong leihen mü vamteke.

¹⁸Mehenangkü büpa ponghahpai büpa kao dok; üami dokpü pongnya, büpai hathü kü sheühhen aokshi nyüke.