Read Phom Naga HEBREW 5 Bible Online

HEBREW 5 - Phom Naga bible

HEBREW 5

¹Hangku khong kübü jepü ngongchongü jomei men kü Kahvang mü shenteipü douthü dükhen, thinthothü shuohhen, hatü mangthü shing jakpü moila shuohhen nangkü jenyüpeih.

²Mehenangkü büpaiyao wong nekohpü am vaipü nangkü büpai nenyingpü hatü lemnyongei daipüthü mü inyainyemi eteiaoknyeih;

³hatü ha vaipü nangkü büpai laophü shing hatü nanglakthülei mang shing jakpü moila shuohhen vongbong.

⁴Üpaiyao hapa dhüm laophü nyingi jeyei neyahnyih; shejao büpayü Aaron kü nyükpü keiha Kahvangi nyükpü mon vaihen vongbong.

⁵Hapa keiha Khristaiyao büpa nyingi ngongchong vaihen müknyinshekhang neyah. Shejao Kahvangi büpa kü eteke: “Nüngü ngelei Ha; Shinnyih ngei nüngei Pa leitepih.”

⁶Shao büpai lebü shingei hei enyüke, “Melkizedek aimü nüngü düngei ngongpa vaihen.”

⁷Kahdoknyülei Jisu yangnyu nyushi dipü kübü büpa yangaokhen Kahvang kü wong mü lenei mükphi yenei phopei yüteke, hatü büpai dhüm shuoh-ei yüpü homei büpa kü jangteke.

⁸Büpayü Ha vaijao büpa shangpongpü homei büpai ven danhen nying;

⁹hatü büpa changpüshapü leihütü, büpayü büpalei ven danpüthü peü shing nedohnetenpü yemleipü shuohbü lei,

¹⁰hatü Melkizedek aimü Kahvangi büpayü ngongchong leihü.

¹¹Hami hapa nang ehen longi nyüke, shejao ammi danhen wongpü nangkü ha nih-ei ehen wongteke.

¹²Shaang keiyü amphongü nyuhbüthü leidaitü nyuhen jiüpeih, shejao shaang thahshi am kü lapjapü Kahvang shah nyuhhen hanei am nanyüke. Amphongü vaanpü hahying nevai, amma nanyüke.

¹³Üami amma yingei nyunya, shaang thahshi aküngnaüha vaipü nangkü daülangshemshepü jung venpü shah hah-ei neaoknyu.

¹⁴Shejao vaanpü hahyingü behe shingvaishi, hatü üami ha nedoh-i noteinya laophü nyingi ten kübü mei jehen baong hanei nyingdainyeih.