Read Phom Naga HEBREW 7 Bible Online

HEBREW 7 - Phom Naga bible

HEBREW 7

¹Hapa Melkizedekü Salem amei ong, hatü Chaipüba Kahvangei ngongpa nyuteke. Ong ali neütüktü Abraham leijapü pongei büpai moihimanshuoh,

²hatü Abrahami büpa kü lemphü kübü ankhong shuoh. Shongpü kü büpalei menü, “daülangshemshepü ongpa,” nyipabü kü büpayü Salem amei ongpa, ha lappai, “chingmei ongpa” nyuteke.

³Pa neshiü, nyü neshiü, bülem neshiü, yangnyu pangpü nevaijü dohpü nyih neshiü, shejao Kahvang Ha leshi büpa den kü ngongpa hük nyüke.

⁴Büpa meshük longpüang veihümao! Men-e bühipa Abrahami dangkao büpai vehok kübü leipü lemphü kübü ankhong shuohteke.

⁵Abraham kübü phaakpü vaijao Levilei hühihathü ngongdou dükhen dangpüthüi laophülei nanglak, lappai, laophülei jeihinaüthü leipü ankhong thaihen shahkungnyü kü eyei nyüke.

⁶Shejao hapa shennyakü jomei bülem kübü phaakpü nevaijao Abraham leipü ankhong yah, hatü Kahvang leipü lahpüthü dangpü Abraham kü moihimanshuoh.

⁷Maanpüba kü longpübai moihimanpü kü jü-ühen shah neshiü.

⁸Lemhükei ankhongü didaihen shennyak ngongpathüi thaiteke, shejao Melkizedek nang keyü den kü nyupü hüki Abraham leipü ankhong yahteke shei Laihingi enyüke.

⁹Levi-i ankhong thaijao Abraham homei ankhong shuohpeih shei hanei ami ehen aok,

¹⁰mehenangkü mechem Melkizedeki Abraham pongpa, Levi-ü Abrahamei büm kü nyuteke.

¹¹Shaang Levi ngonglem homei hapa ngonglem phangkü shahkung dangpü nanglakthü shingvaishi changpüshapü dangaokhen vaijema, Aaron ngonglem aimü hük nyudai pheikü shao nedoh-i Melkizedek aimü lebü ngongpa hük vamhen nang eteihen mehe nadang nyüpa?

¹²Mehenangkü mechem ngonglem jeihen, shahkungnyüao jeihen nadang nyüke.

¹³Shaang üpa nang hathü douthü jung eteinya büpayü lebü jat kübü, hatü hapa jat kübü üpaiyao mechemao moidülei chongnepho.

¹⁴Mehenangkü jenei SHEMBÜPAyü Judah jat kübü pei, hatü ha jat nangkü Mosai ngongpathü nang meheyao eyei neshiü.

¹⁵Melkizedek aimü lebü ngongpa hük vamshingkü hami epü nyeinya leknyüke.

¹⁶Büpa ngongpa vaipeyü iyhiphai kü bülem phikü shahkungnyüi yüpü homei nevai, shejao nemahnemenpü yangnyu ngan homei vamteke.

¹⁷Laihingi büpa nang hapakei denpü shuohnyüke: “Melkizedek aimü nüngü düngei ngongpa vaihen.”

¹⁸Lemhükei shahkungnyü changü nüngtükteke; mehenangkü hapayü wong nekoh hatü yahlak neshiü;

¹⁹(mehenangkü shahkungnyüi meheyao changpüshapü neleihüang); hatü phihükei meipüba monglem hük vamteke, hapa homei jen Kahvang yopailei peinyüpeih.

²⁰Hapayü lahpü hük homei dükpeih. Lebüthü peü lahpü neyah-i ngongpa vaipeih,

²¹shejao Jisu-ü lahpü hük homei ngongpa vaipeih, hatü büpa kü Kahvangi eteke: “SHEMBÜPAi lahteke, hatü büpalei mong neyeiyahen: ‘Nüngü den kü ngongpa.’ ”

²²Hapa lahpü nangkü Jisu-ü meipü vangpüshuwpü shuohbü leiteke.

²³Anyei vaishi sheleiyü ngongpathü longi nyuteke; mehenangkü jomi ngongdou nedoh-i dükei nyuhenü dipai bangtükteke,

²⁴shejao Jisu payü den den kü nyupü nangkü mih kü neshuoh-i büpai den kü ngongdou düknyeih.

²⁵Hanangkü büpa homei Kahvang touei peipüthü peü den kü yangei tuhhen aoknyüpeih; mehenangkü büpai den kü jom shing phopnyüke.

²⁶Mehenangkü jeni daülangpü, eela neshiüpü, nesheihpü, mangthü kübü yanei nyupü, hatü vangshothü shak kü longei aongpü hapa keipü ngongchong anghen jiüpeih.

²⁷Lebü ngongpathü kei nevai; büpai nyihjeih shongpüba kü laophülei mang shing; hapheiküang nanglakthü shing jakpü moila shuohteihen napü neshiü; büpai hapayü laophülei yangnyu shuohpai den shing chem mon shuohtük.

²⁸Mehenangkü shahkungnyüi wong nekohpüthü ngongchongthü vaihen jepeih, shejao lahteipü shah mepa shahkungnyü pheikü peipa, hapai den kü changpüshapü Ha hük jepeih.