Read Phom Naga HEBREW 8 Bible Online

HEBREW 8 - Phom Naga bible

HEBREW 8

¹Shaang hami epü shah shongnyüyü hapa hih: Vangsholei Lenangpalei ong uoshing kü jenei ngongchong lakdah philei uoshi nyüpeih;

²shennyaki nevai, shejao SHEMBÜPAi lingpü daülangpü hatü hingshangpü ashakshemei chongphobü hük nyüpeih.

³Mehenangkü ngongchong peü thinthothü hatü jakpü moila shuohhen shingvaishi jenyeih; hanangkü hapa ngongchongiyao lemhük payü shuohhen nadang nyüke.

⁴Büpa kahdoknyülei nyulangmeyü büpayü lanshei ngongpa nevaihen; mehenangkü shahkung kü nyupükei thinthothü shuohhen ngongpathü nyüke.

⁵Jomi daülangpü shingei khümnyüke, hayü vangsholei nyupü dükhiling lajei nyuh-ei düknyüke. Hanangkü Mosai ashakshem vehen nyushingkü hapakei shahvüng shuohteke, “Kahshangei nüng kü hupü düklem kei linghen kentuh.”

⁶Shejao shaang Jisu-ü chah-ei meipü chongphopü dousho dangteke; hatü vangpüshuwpü mepa kü büpa lembü lei, hapayü lahpü kü laphentü lingei nyüke.

⁷Mehenangkü shongpü vangpüshuwpü kü pungpü nenyulangmeyü nyipabü lebü hük yemhen napü neshiü.

⁸Shejao Kahvangi laophülei nanglakthü kü pungpü dangei büpai hapakei enyüke: “Hingmei nyihthü peikünyüke, ngei Israel phang, hatü Judah am phang mü vangpüshuwpü ja hük linghen shei SHEMBÜPAi enyüke;

⁹hayü ngei Ijip kahdok leipü mülangpü ngelei laki müei daipü nyih chebü chepa mü lingpü vangpüshuwpü kei nevai; Mehenangkü jomi ngelei vangpüshuwpü kü nedoh-i nenyu; Hanangkü ngei jom baong neyemi tuhpeih shei SHEMBÜPAi enyüke.

¹⁰Hathü nyih pheikü ngei Israel am phang mü hapa vangpüshuwpü linghen shei SHEMBÜPAi enyüke: Ngei ngelei shahkungnyü jomei sholi kü shihshuohhen, hatü jomei mongdang kü nyanghen, ngei jomei Kahvang vaihen, hatü jomphongü ngelei nanglak vaihen.

¹¹Jom hüki hük kü nenyuhteihen, nevaijü hüki hük mü, ‘SHEMBÜPA nyingtuh’ shei ne-eteihen; Mehenangkü jom peü maanpü kübü longpü thahshi ngei nyinghen.

¹²Mehenangkü ngei jomi pungpü kü phahjihen, hatü hajük kü ngei jomei mang deih-ei nedanghen.”

¹³Büpai “Vangpüshuwpü Ja” shei etü shongpeyü nenotei-i yaktükpeih, hatü mehe nenotei hatü chang leidainya, hayü lomi mahdaihen.