Read Phom Naga HEBREW 9 Bible Online

HEBREW 9 - Phom Naga bible

HEBREW 9

¹Shaang shongpü vangpüshuwpü kü khümhen nangkü shahkungnyü nyüke, hatü shennyak laki lingpü khümshing nyüke.

²Mehenangkü ashakshem hük veteke. Shongpü dung kü awdük shemshing, haüdü, hatü Kahvang kü moilapü hahying nyuteke, hatü hapa kü Daülangpü Shing shei nyükteke.

³Nyipabü haenpü ashak mongeipü dung kü Longi Daülangpü Shing shei nyükteke.

⁴Hapa mongei ayingshü jakhen hon moidü hatü Vangpüshuwpü Pela kü shing peü lemei honi jümtü halei hondük kü manna shihtü, hatü Aaronei lenshuoh kü nien vamei hatü vangpüshuwpü yaongshungthü nyuteke.

⁵Ha shangkü müknyinshekhangpü cherubimi mang tükpü shing kü dhümshi nyuteke. Ha douthü nangkü jeni shaang peü lekei ne-eaokhen.

⁶Hapa keiha tempülempü lingtü ngongpathüi nedoh-i shongpü dungei jomei khümpü dousho dükhen shünyüke;

⁷shejao nyipabü dungeiyü ngongchongi bong kü chem mon büpa shing hatü nanglakthüi nenyingi thahpü mang shing shuohpü moilalei iy yah-ei shühamteke.

⁸Hapa homei shongpü dung nyupü thahshi Longi Daülangpü Shingei shühen lem ne-ap shei Laangha Daülangpai hunyüke.

⁹Hapayü shinnyih jen shing lappü hük nyüke, hatü hahepak kü thinthothü hatü jakpü moila Kahvang kü shuohpai Kahvang kü khümpü shennyak meishi payü nedaühüaok shei hapai hunyüke.

¹⁰Hathüyü Kahvangei lem ja mangpei thahshi hahhen yinghen hatü hayaoha daüeilangpü büm shingvaishi shuohpü shahkungthü nyüke.

¹¹Shejao mechem Khristayü peiyei nyupü doumeithülei ngongchong kei peipa, laki nelingpü, lappai, hapa lingpü kahdoknyü kü neompü longpü hatü den ngoipü ashakshem mongei büpa shüteke.

¹²Büpai halei yum nevaijü mohoh iy homei neshü, shejao büpai laophülei iy homei jen shing nedohnetenpü yemleipü dangei den shing chem mon Longi Daülangpü Shingei shüpeih.

¹³Yum hatü mohoh iy, hatü mohoh cheha jakpü awnih yah-ei haijü nedaüpüthü daüdaijema,

¹⁴nedohnetenpü Laangha homei laophü nyingi Kahvang kü kawhikang neshiüpü moila shuohpü Khristalei iy homei didaipü douthü kübü vanyangyem Kahvang kü khümhen shingvaishi jenei chudeih mongdang meshük nyeishi daütükphahen!

¹⁵Ha tata kü Kahvangi nyüklangpüthü nedohnetenpü lahtükpü mükjüp danghen shingvaishi Khristayü vangpüshuwpü ja kü lembü leiteke. Shaang shongpü vangpüshuwpü phangkü mang thahpüthü bümei leihühen nangkü ha shemhen büpa diteke.

¹⁶Mechem shennyak hük dihen, büpai lahteipü hük tuhnyeih. Shejao hapa lahpü lingpü shennyak didaiteke shei nanglakthüi lekhen vongbong.

¹⁷Hapa lahpü lingpü shennyak yemmü nyupü thahshi hapa lahpü dou neleinyih. Hapa shennyak dipheikü mon noteiaokhen.

¹⁸Iy neomi shongpü vangpüshuwpü dangkao dou nelei.

¹⁹Mechem Mosai shahkungnyülei nyupükei shahkungthü peü nanglakthü kü ekempa, büpai mohoh hatü yum iy yah-ei yung kü vuk, hatü ha kü iyshüm keipü mimum hatü hyssop pükao dakei ha kü hüngtü laidü hatü nanglakthü kü haiteke.

²⁰Büpai, “Hapayü Kahvangi am kü noteihen shingvaishi shuohpü vangpüshuwpü iy” shei eteke.

²¹Hapa aihük mü büpai ashakshem hatü khümshing kü noteipü haleipü douthü kü iy-i haiteke.

²²Hingmei shahkungnyü phangkü iy yah-ei lemphüli daühüteke, hatü iy nehaipheikü mang tükpü neshiü.

²³Vangsho amei dou nyuh-ei dükpeyao jakpü moila homei daühühen nadang nyuteke, shejao vangsho amei douthüao hathü mü meipü jakpü moila nanyüke.

²⁴Mehenangkü Khristayü hingshangpü hük nyuh-ei hangkulei laki lingpü Longi Daülangpü Shingei neshü, shejao büpa vangsholei shüpeih; shaang jenei men kü Kahvang touei nyüke.

²⁵Nevaijü büpai vangsholeiyü ngongchong hük bong ieyei laophülei nevaipü kü iy noshi Longi Daülangpü Shingei shüpükei büpa laophülei yangnyu leiyei leiyei moilahen neshü.

²⁶Hakei vailangmeyü kahdoknyü linghinüng Khrista leiyei leiyei shangponghen vaipeih. Shejao shaang büpai hapa dohpü den kü büpa laophü nying moila shuohpai mang yaktükhen shingvaishi den shing chem mon peipeih.

²⁷Shennyak hük mekei chem mon dihen demtük, hatü hapheikü shahphenpü nyüpa,

²⁸hapa keiha Khrista-ao nanglak longilei mang yah-ei lüdaihen shingvaishi chem mon moila shuohpeih. Büpa nyipabü yiükahen, hayü mangthü mü eteihen nangkü nevai, shejao büpa omdanpüthü kü yemleipü koei yiükahen.