Read Phom Naga JAKOB 2 Bible Online

JAKOB 2 - Phom Naga bible

JAKOB 2

¹Ngelei jeihinaü hatü nyahinaüthü, ammi baong hanei noyaki hingmei ammi jenei müknyinshekhangpü SHEMBÜPA Jisu Khrista kü hinglemnyu je?

²Shennyak hük hon lakshep sheptü ow meipü owtü am thaishingei peiküjü, hatü taopa hük owten owtü peiküjü,

³hatü ammi owmei owpü shennyak nyingei, “Ha shing meipülei uotuh” shei etü taopa kü nüngi, “Antolei yaongtuh” nevaijü “Ngelei la touei uotuh” shei ejema,

⁴ammi am khongkü baong hanei nenonyu je, hatü chudeih teni shahphennyu nevaipü je?

⁵Ngei bampü jeihinaü nyahinaüthü, bangtuh. Kahvangi kahdoknyü kü taopathü hinglempü kü shemmei vaihen, hatü büpa kü bampüthü kü büpai lahpü ongching mükjüp vaihühen nejeangpü je?

⁶Shejao ammi taopathü kü dhüm neshuohnyu. Am kü shüveipeyü shemmeithü nevaipü je? Shahphen shingei am müei deipeyü hathü nevaipü je?

⁷Am kü shuohpü meipü men thaüvaütükpeyü hathü nevaipü je?

⁸Ammi Laihingei nyupü ongpa shahkung, “Amphongi laophülei chingyow kü laophü kü kei bamtuh” shei epü hingshangi jiüshi dükjema ammi jiüpü düknyüke.

⁹Shejao ammi baong hanei nojema, ammi mang thahnyüke hatü shahkungnyüi pungpüthü shei yepnyüke.

¹⁰Mehenangkü üami shahkungnyü peü düktü hük kü dangkao huluh shuohhenshang, peü mangtükpü kei pungnyüke.

¹¹“Ammi mükbongjuyung tedük” shei epü hüki shao, “Ammi tejü” shei eteke. Shaang ammi mükbongjuyung nedüki mih jüjema, ammü shahkungnyü kü pungpü leiteke.

¹²Bümei shuohpü shahkungi shahphenphahen khih shei nyingei etuh hatü düktuh.

¹³Üpai phahji nehuhenshang shahphenpeyü phahji nehu-i nyuhen; phahji-i shahphenpü shak kü aokpü dangnyeih.

¹⁴Ngelei jeihinaü nyahinaüthü, am kü vaipü nyüpeih shei etü dou neshiüjema, ha kü mehe mei nyüpa? Vaipai am yanghen je?

¹⁵Jeihinaü nevaijü nyahinaü hük bümkong, nehahneyingi eetü,

¹⁶amphong khongkü hüki hathü kü, “Daituh, meishi nyutuh, shaamluki nyutuh hatü moh-ei hahtuh” shei etü ammi jomei büm shing nadang neshuohjema, ha kü mehe meipü nyüpa?

¹⁷Hanangkü vaipü monhai ha kü dou neomjema mahngchang khih.

¹⁸Shejao hanei ami, “Nüng kü vaipü nyüke hatü ngei kü dou nyüpeih” shei ehen. Nüngi dou neomi ngei kü nüngi vaipü hushih, hatü ngei ngelei doui nüng kü ngei vaipü huphüshah.

¹⁹Kahvangü hük mon shei nüngi hinglemnyüke, meiteke. Shepethüi dangkao hapakei hinglemnyeih, hatü nyemei kheünyeih.

²⁰Ngapathü, dou neomi vaipeyü angsha shei huhahhüpü je?

²¹Jenei bü Abrahami cheha Isak moidülei jakpü moila shuohshingkü büpa dou homei dahshakpü nevaipü je?

²²Büpalei dou mü vaipü dou chemi nyuteke, hatü vaipeyü dou homei changhüpeih shei eenyüke.

²³Hapakei Laihing jiühüteke shei enyüke: “Abrahami Kahvang kü hinglem, hatü hapai büpa kü daülangpü shei ieyeilem, hatü büpa kü Kahvangei mongjempa shei nyük.

²⁴Shennyak hük vaipai mon nevai, dou homei dahshakhünyeih.

²⁵Ha leshi büm yupü Rahabi phongshanthü nyükei shütü jomphong lebü lemei deishihpai dou homei pinnyü dahshakpü nevaipü je?

²⁶Mehenangkü laangha neshiüi bümü mahng vaipü keiha, dou neomi vaipeyü mahngchang khih.”