Read Phom Naga 1 PETER 1 Bible Online

1 PETER 1 - Phom Naga bible

1 PETER 1

¹Peter, Jisu Khristalei phongshani, Pontus, Galatia, Kappadokia, Asia hatü Bithynia kü haidaipü,

²Pa Kahvangi jelangpüthü hatü Jisu Khrista kü ven danhen hatü büpalei iy-i haiyei Laanghai daütükpüthü touei: Phahji hatü chingmei am mü bhashahshi nyute.

³Kahvang hatü jenei SHEMBÜPA Jisu Khristalei Pa moihimantuh! Jisu Khrista dipü kübü yangei leipü homei büpa phahji longpai büpai jen kü yangnyuyem monglempü kü jen kü ja bühpü hük shouhteke,

⁴hatü nemahnemenpü, nesheihpü, hatü nekaupü mükjüp hük am shing vangsholei jaoshi nyüke;

⁵hayü dohpü hepak kü hinglempü homei Kahvangei ngani yangpüthü touei shakei vamhen temtükpü yemleipü nyüke.

⁶Shaang amphong kansho hük shing dokpü longi homei shangponghen nyujao ha kü am mongongtuh.

⁷Honü mahdaihen dou vaijao awi doknyüpeih. Am hinglempeyü hon mao nyeinya douvang vaipü nangkü mechem Jisu Khrista shakei vamhen, menvih, müknyinshekhang, hatü dhüm kohshi eehen shingvaishi kentuh.

⁸Ammi büpa ne-eejao büpa kü bamnyüke, hatü ammi shaang büpa ne-eejao, ammi büpa kü hinglemnyüke hatü eyei neaokpü hatü müknyinshekhang mongongi am mongongnyüke;

⁹mehenangkü ammi hinglempü kübü vampü laangha yemleipü ammi dangnyüke.

¹⁰Hapa yemleipü nangkü thihivam üami am touei peihen phahji nang epa, ha kenhingei yem hatü pheteke.

¹¹Khrista shangponghen hatü hapheikü müshi müknyinshekhanghen nang jomi tetshingkü jom kü nyupü Khristalei Laanghai hupü hapa hepak hatü laphen yemei danghen kheteke.

¹²Thihivamthüi jom shing chongphonyu nevai, shejao vangsho leipü shompü Laangha Daülangpai am kü shahjangmei chongvenpü ami am kü shaang ephopü douthü jung epai jomi am chongphoteke. Hathü dou vangsho phongshanthüi dangkao veihen ongyangnyüke.

¹³Hanangkü dou dükhen nüngei mong shan temtuh; laophü nying ungei-aeituh; büpa shakei vampü nyih Jisu Khristai koei yiükahen phahji kü am monglempü tuhtuh.

¹⁴Ven danpü hashihthü keiha nenyingi shelei am kü nyupü ten yahhahhüpü kü tevukdai.

¹⁵Haleimü am kü nyükpüba daülangi nyupü keiha ammei dükhiling peü kü am daülangi nyutuh;

¹⁶mehenangkü hapa nyangei nyüke, “Am daülangi nyutuh; mehenangkü ngeiyü daülangpü.”

¹⁷Shennyak peü kü laophülei dou aimü baong nehani shahphenpü Pa kü ammi nyükjema, wüpküpei nyushi ammi nyemei dhüm shuohpükei nyutuh.

¹⁸Ammei bühipa kübü dangpü yangnyu lem kong kübü am angei leipeih shei ammi nyingei nyüke, hatü hayü mahdaihen hon hi ngin homei nevai,

¹⁹shejao kawhikang hatü eela neshiüpü Mi Cheha, Khristalei iy homei angei leipeih.

²⁰Büpayü kahdoknyü lingshekü jepeih, shejao ammei men kü dohpü nyih kü shakei vamteke.

²¹Üpai büpa dipü kübü yangei leishih, hatü büpa müknyinshekhanghü, büpa homei ammi Kahvang kü hinglempeih, hanangkü ammi hinglempü hatü monglempü Kahvang kü nyüpeih.

²²Shaang ammi shahhing shah kü ven danpai ammei laangha daüdaiteke, hatü ammei jeihinaü nyahinaüthü kü hingshangpai bamhen mü vamteke; mongdang kübü vamei chüloh-i hüki hük mü bamteituh.

²³Amphongü mahbenüng nevai, nemahbenüng li Kahvangei yangnyu yem hatü nedohnetenpü shah homei nyipabü angteke.

²⁴Laihingi hei enyüke: “Shennyak peü phenha vunglak leangke, hatü jomei müknyinshekhangü chübongale leangke; phenha vunglak kaudainyeih, hatü chüthü vüdainyeih,

²⁵shejao SHEMBÜPAlei shah düngei nyuhen, hatü hapayü am kü chongvenpü shah.”