Read Phom Naga 1 PETER 2 Bible Online

1 PETER 2 - Phom Naga bible

1 PETER 2

¹Hanangkü am kübü ten dükpü, lueilempü, akhümmong-üm, mükhühpü, hatü ten epü lemphü tuhphongtuh,

²Naüja keiha daülangpü laangha amma yinghen kentuh, shejüang am yemleipü kü longhen.

³Shaang ammi SHEMBÜPAyü meiangpeih shei jepei veiteke.

⁴Hangkui yaktükjao Kahvangi jepü hatü büpa touei douvang yangnyuyem yaong, büpa touei peituh;

⁵amphongao yangnyuyem yaong keiha daülangpü ngongli vaihen hatü Jisu Khrista homei Kahvangi yah-aokbenüng laangha moila shuohhen nangkü am nyingi laangha shem vepü kü noteihütuh.

⁶Laihingi ha enyüke: “Veituh, ngei Zionlei jetükpü, hatü douvang yaong hük tuhnyeih, hatü üpai büpa kü hinglem, mechemao veü neponghen.”

⁷Shaang am meshüki hapa yaong kü douvang shei hinglem, hapayü douvang, shejao üami ha kü hingnelem, hathü shingvaishi hapayü, “Shem vepüthüi yaktükpü yaong peü mü shongnyü shoukbaong yaong leipeih.”

⁸Shao lebü lai kü hapakei enyüke: “Jom huluh shuohhüpü yaong, hatü jom dohüpü yaongnyü-ü hapa hih.” Jom huluh shuohpeih; mehenangkü jomi ha shah nebang; jomi hapa dükhen demtükpü am nyuteke.

⁹Shejao amphongü vangnyak kübü thamapü vangngai touei am nyüklangpü büpalei yashanpü douthü jung baonghen nyükei jelangpü li, ongpalei ngongli, daülangpü jat hatü Kahvangei nanglakthü nyüke.

¹⁰Chem amphongü nanglak nevai-i nyupeih, shejao shaangü Kahvangei nanglakthü; chem amphongü phahji nedangi nyuhampeih, shejao shaang amphongi phahji dangteke.

¹¹Bampü küphüthü, kahdoknyü kü yenpa hük keiha ngei am kü enyeih, laangha khüei hokpü phai-i yahhüpü peü kübü yanei nyutuh.

¹²Kung am touei ammi dhüm kohshi düktuh; jomi am kü ten dükpü am shei ejao büpa shahphenhen yiüshingkü jomi ammei dhüm kohbenüng doumei eeyei Kahvang müknyinshekhanghen.

¹³SHEMBÜPAlei men kü hangku shak kü vanglem lempüthü phangkü nyutuh; peü mü longpeyü ongpa vaihütuh,

¹⁴nevaijü nejiüpü dükpüthü kü hanghihühen hatü jiüpü dükpüthü kü menvih shuohhen büpai shompü governor phangkü shütuh.

¹⁵Mehenangkü jiüpü dükpü homei ngapathüi nenyingi epü ammi nentükhühen hapayü Kahvangi mongpü nyüke.

¹⁶Bümei nanglakthü kei nyutuh, shejao ammei bümei hean mang küptükhen shingvaishi tenotei; Kahvang chongphobüthü kei nyutuh.

¹⁷Peü kü jiüshangi dhüm hutuh. Vaipü küphüthü kü bamtuh; Kahvang kü nyemtuh hatü ongpa kü dhüm hutuh.

¹⁸Aathüi laophülei shembü kü dhüm shuoh-ei phangkü shütuh; meipü hatü inyainyempüthü touei mon nevai, shejao lohmangpüthü toueiyao hapakei düktuh.

¹⁹Kahvang nyingpü nangkü shennyak hüki ponghen nejiüpü shangpong nenjema, hayü mongongbenüng nyüke.

²⁰Ammi nejiüpü dükpü nangkü üphahtü ha nenjema, ha kü mehe menmei nyüpa? Shejao ammi jiüpü dükpü kü shangpongjema Kahvangi am kü hapa shing moihimanhen.

²¹Ha shingvaishi amphong nyükpeih; mehenangkü Khrista am shing shangpong; amphongi büpalei mien dhaümhen shingvaishi am kü lappü hük tuh-ei nyüke.

²²“Büpai mang nethah, hatü büpalei ju kübü shahshem hükao nevam.”

²³Mechem jomi büpa kü yaüeilungei epa, büpai ha kü nekhang; mechem büpa shangpongpa, büpai nyemneshao, shejao shahhing shahphenbü kü büpa lanei shuoh.

²⁴Mang kübü bümei leiyei jen daülangi nyuhen shingvaishi büpai shophang shangei laophülei büm kü jenei mang koteke; büpa mashapü homei jen meiteke.

²⁵Mehenangkü amphongü mi keiha lemnyongei daiyei nyuteke, shejao shaang mi yombü hatü ammei laangha yombü touei nyokei leiteke.