Read Phom Naga 1 JOHAN 3 Bible Online

1 JOHAN 3 - Phom Naga bible

1 JOHAN 3

¹Jenphong kü Kahvang hathü shei nyükhen mü Opai mekeipü bampü jen kü shuohpa veituh, hatü jenphongü hakei-üng vaitei. Kahdoknyüi jen nenyingpeyü jomi büpa nenyingpü nangkü nyüke.

²Bampü küphüthü, shaang jenphongü Kahvangei hapeüthü nyüke; hatü jen mehe vaihen shao-üng shakei mangvam. Jeni nyingpeyü ha khih: mechem büpa shakei vamhenshang, jenphongü büpa kei nyuhen; mehenangkü büpa mekei nyu, hapakei jeni büpa eehen.

³Hapa monglem nyupüthü peüi büpa daülangi nyupükei laophü nyingi daülangi nyutuh.

⁴Üpai mang thahnya shahkung mangnyüke; mehenangkü mangü shahkung mangpü nyüke.

⁵Büpayü mang yah-ei lüdainüng shakei vampeih shei ammi nying, hatü büpa kü mang neshiü.

⁶Büpa kü nyupü üpaiyao mang nethahnyih; mang thahpü üpaiyao büpa ne-ee, nevaijü nenying.

⁷Maanpü hashihthü, üpaiyao am lemnyong kü temühü. Büpa daülangi nyupükei üpai jiüpü dük, büpa daülangpü nyüke.

⁸Mang thahpü peü kahshihlei hapeüthü; mehenangkü chongpanghinüng kahshih-i mang thahhampeih. Kahshihlei dou mangtükhen mükhong kü Kahvang Ha shakei vampeih.

⁹Kahvangi bühpü üpayao sheüshi mang nethahnyih; mehenangkü Kahvangei sheili büpa kü nyunyeih; büpa Kahvangi bühpü nangkü büpai nedoh-i mang thah-ei nenyunyih.

¹⁰Üpa Kahvangei ha, üpa kahshihlei ha hapakei jeni nyingdainyeih: Üpai jiüpü nedük nevaijü laophülei jeihinaü hatü nyahinaüthü kü nebam, büpayü Kahvangei ha nevai.

¹¹Mehenangkü jen hüki hük mü bamteihen vongbong shei chongpangpülei ammi hapa shahjang danteke.

¹²Jenphongü laophülei naüpeü jütükpü kahshih leipü Kain kei nevaihen khih. Mehekei büpai chenaü jüpa? Mehenangkü büpai dükpü dou nejiü, shejao chenaüi dükpü dou jiüshi nyuteke.

¹³Jeihinaü hatü nyahinaüthü, kahdoknyüi am kü jiühitpü kü am tethama.

¹⁴Jen hüki hük mü bamteipü nangkü jen dipü kübü yangnyuyem touei daiteke shei jeni nyingnyüke. Üpai nebamnya, dipü kü nyunyüke.

¹⁵Jeihinaü hatü nyahinaü kü jiühitpeyü shennyak jüpü am, hatü shennyak jüpü am kü yangnyuyem nenyupih shei ammi nyingei nyüke.

¹⁶Jeni hapai bampü nyingnyüke: büpai jen shing büpalei yangnyu lanei shuoh, hapakei jeniyao hüki hük shing yangnyu lanei shuohteihen vongbong.

¹⁷Hanei ami kahdoknyü mop angtü laophülei jeihinaü hatü nyahinaü taopü eetüktü nesheühjema mekei etü Kahvang bampü büpa kü nyuhen?

¹⁸Maanpü hashihthü, jeni shah-i nevaijü epai mon nebamshah, shejao shahhing kü hatü doui bamteishah.

¹⁹Hapa homei jenü shahhing kübü shei jeni nyinghen hatü büpa touei jen monglemhen.

²⁰Mechem jenei mongi jen nyonghühen, jen Kahvang touei monglongpü nyüke hatü büpai peü nyingei nyüke.

²¹Bampüthü, jenei mongi jen nenyonghüjema, jen Kahvang touei monglongpü nyüke.

²²hatü jeni mehe yü, jeni büpa leipü dangnyeih; mehenangkü jeni büpalei shahkungthü bangnyeih hatü büpai monghahbenüng düknyeih.

²³Hapayü büpalei shahkungnyü: büpai jen kü shahkung shuohpükei jeni Cheha Jisu Khristalei men kü hinglemhen hatü hüki hük mü bamteihen vongbong.

²⁴Büpalei shahkungnyü bangpü peü büpa kü nyüke, hatü büpa jom kü nyunyeih, hatü büpai jen kü shuohpü Laangha homei büpa jen kü nyunyeih shei hapai jeni nyingnyüke.