Read Phom Naga 1 JOHAN 5 Bible Online

1 JOHAN 5 - Phom Naga bible

1 JOHAN 5

¹Üpai Jisu-ü Khrista shei hinglem, büpayü Kahvangi bühpü, hatü üpai nyühipa kü bam hapeü kao bamnyeih.

²Mechem jeni Kahvang kü bamnya hatü büpalei shahkungnyüthü bangnya, hapa homei jeni Kahvangei hapeüthü kü bamnyüke shei jeni nyingnyüke.

³Büpalei shahkungthü bangpeyü Kahvang kü bampü hih, hatü büpalei shahkungthüyü hanggovih nevai;

⁴mehenangkü mepa mepa Kahvangi büh kahdoknyü neüaoknyeih. Kahdoknyü neüei aokpü dangpeyü jen hinglempü hapa hih.

⁵Kahdoknyü neüaokpeyü üpaang shei shejema Jisu-ü Kahvang Ha shei hinglempü shennyak hih.

⁶Hapayü yung hatü iy homei peipü Jisu Khrista, yungi mon nevai, shejao yung hatü iy homei. Hatü hapa kü denpü shuohpeyü Laangha; mehenangkü Laanghayü shahhing nyüke.

⁷Denpü jem nyüke.

⁸Laangha, yung hatü iy hatü hathü jemphen aihük mü denpü shuohnyüke.

⁹Jeni hangkulei denpü yahjema, Kahvangei denpeyü longpüba; mehenangkü hapayü büpai laophülei Ha kü denpü shuohpü Kahvangei denpü nyüke.

¹⁰Üami Kahvang Ha kü hinglem jomei mongdangei denpü nyüpeih. Üpai Kahvang kü hingnelem, Kahvangi laophülei Ha nangkü denpü shuohpü kü hingnelempai büpa shahshem leitükteke.

¹¹Denpeyü hapa hih: Kahvangi jen kü yangnyuyem shuohpeih, hatü hapa yangnyuyemü büpalei Ha kü nyüke.

¹²Üami Ha ang, yangnyuyem nyüke; üami Kahvang Ha ne-ang, yangnyuyem neshiü.

¹³Am kü yangnyuyem nyüke shei nyinghühen nangkü Kahvang Ha kü hinglempüthü kü ngei hathü dou jung nyangnyeih.

¹⁴Büpai mongpü aimü jeni lemhük dangkao yüjema büpai jeni epü dannyeih shei jeni büpa kü monglempü nyüpeih.

¹⁵Jeni mepa yü büpai jeni epü dannyeih shei jeni nyingjema, jeni büpa kü yüpü dangteke shei jeni nyingnyüke.

¹⁶Ammi laophülei jeihinaü hatü nyahinaü dibenüng nevaipü mang thah-ei eejema, ammi phopeishuoh, hatü Kahvangi büpa kü yangnyu shuohhen. Dibenüng nevaipü mang nang ngei enyeih. Dibenüng mang nyüke, hatü henüng nangkü ammi phoptuh shei ngei ne-enyih.

¹⁷Nejiüi dükpü peü mang, shejao dibenüng nevaipü mang nyüke.

¹⁸Kahvangi bühpüthü mang thah-ei nenyunyih shei jeni nyingnyüke, shejao Kahvangi bühpü shennyak yangei tuhnyeih hatü kahshih-i büpa kü lak nehingnyih.

¹⁹Jenphongü Kahvangei hapeüthü shei jeni nying, shejao kahdoknyü kemei kahshihlei ngan phangkü nyüke.

²⁰Jeni büpayü shahhing shei nyinghen shingvaishi Kahvang Ha peiyei jen kü danaokpü shuohpeih shei jeni nyingnyüke. Jenphongü üpa shahhing büpa kü nyüke — hapayü büpalei Ha Jisu Khrista. Büpayü hingshangpü Kahvang hatü yangnyuyem.

²¹Bampü hashihthü, am nyingi lajeithü kübü yanei nyutuh.