Read Phom Naga SHAHPHENBÜTHÜ 1 Bible Online

SHAHPHENBÜTHÜ 1 - Phom Naga bible

SHAHPHENBÜTHÜ 1

¹Joshua didaipheikü Israel ami SHEMBÜPA kü, “Kanan am khüei hokhen shingvaishi üam jat shong daihenang?” shei phe.

²“Judah am shong daituh; ngei jomei lak kü hapa kahdok shuohtüktih” shei SHEMBÜPAi eteke.

³Judah ami jomei jeihinaü Simeon am kü, “Ham kü shuohpü kahdokei chemi aongshah, hatü Kanan am khüei hokshah, shao hamao am mü aongkahen” shei e. Hanangkü Simon am jom mü dai.

⁴Hapheikü Judah am aongei hok, hatü SHEMBÜPAi jomei lak kü Kanan hatü Perizz am shuoh, hatü Bezeklei jomi shennyak haja an jüteke.

⁵Halei jomi Adoni-bezek heüei büpa khüei hok, hatü Kanan hatü Perizz am neütük.

⁶Adonibezek laongei lüdai, shejao jomphongi büpa kü changei daiyei yep, hatü lakphiennyü hatü laphiennyü dehtükteke.

⁷Hahepak kü Adoni-bezeki, “Ngelei nükdü phangei ongthü pejempüan jomei lakphiennyü hatü laphiennyü dehtüktü nükkuk homei hahshi nyuhampeih. Ngei mehe hathü kü dükshuohpa, shaang Kahvangi ha ngei kü nyokei yahphopü khih” shei e. Jomphongi büpa Jerusalemei yah-ei lei, hatü büpa halei didai.

⁸Judah ami Jerusalem ching hah, hatü omei yahteke. Jomi haleipü shennyakthü jütüktü ching kü aw haptük.

⁹Hapheikü Judah ami phaüshang kahmük Negeb hatü pehephi kahshangla kü nyupü Kanan am mü hokhen dai.

¹⁰Judah ami Hebronei nyupü Kanan am mü (shelei jom kü Kiriath-Arba shei nyükhamteke) hokhen dai, hatü Sheshai, Ahiman hatü Talmai am neütükteke.

¹¹Haleipü shao Judah ami Debir (shelei jom kü Kiriath-Sepher shei nyükhamteke) ching hahhen aong.

¹²Hahepak kü Kalebi, “Üpai Kiriath-Sepher ching hah-ei neüaokhenshang ngelei yiükha Akhsah mü büpa shem yemhühen” shei e.

¹³Kalebei chenaü Kenazlei cheha Othnieli hapa ching hah-ei neüteke. Hanangkü Kalebi büpalei yiükha Akhsah büpa kü doi deishihteke.

¹⁴Mechem nyih hük pinnyü Othniel am shemei yiük dhiüpa, Othnieli pinnyü kü ampa kü kahdok yükütuh shei nyeanteke. Mechem pinnyü gadu dokshang leipü shühjapa, Kalebi pinnyü kü, “Nüng mehe napa?” shei phe.

¹⁵“Ngei kü thintho hük yahshih; nüngi ngei kü yahphopü Negebü yung neshiüpü kahdok khih; hanangkü ngei kü yungkukthü yahshih” shei eteke. Hanangkü Kalebi yungkuk dokpa hatü maaipa nyiphen shuoh.

¹⁶Mosalei shembünyülei chepalei hühihathü Ken am Jeriko leipü Arad yopai leipü Negebei nyupü Judah amei koshoya kahdokei nyuhen shingvaishi Judah am mü chemi aong. Halei jom Amalek am mü nyuteke.

¹⁷Judah am chenaü Simeon am mü aongei Zephahlei nyupü Kanan am neütük, hatü hapa chingnyü chemjalak kü mangtük. Hanangkü hapa ching kü Hormah shei nyük.

¹⁸Judah ami Gaza, Ashkelon hatü Ekron chingnyüthü mü kahmükao omei yah.

¹⁹SHEMBÜPA, Judah am mü nyu, hatü phaüshang kahmükthü yahteke, shejao kahjilei nyupü shennyakthü nechangtükaok; mehenangkü jomei lakei nyiam shihtükpü vehok koyeithü nyuteke.

²⁰Mosai lahpükei Hebronü Kaleb kü shuoh, hatü büpai haleipü Anakei chehathü phang jem changtük.

²¹Shejao Benjamin ami Jerusalemei nyupü Jebus shennyakthü nechangtük; hanangkü ha nyih mebü Benjamin amü Jebus shennyakthü mü shinnyih ngoishi chemi nyunyüke.

²²Ephraim hatü Manasseh jat nyi-i Bethel (shelei hapa kü Luz shei nyükhamteke) chingnyü hah, hatü SHEMBÜPA jom mü nyu.

²³Mechem jomi Bethel kahdok kü gühshuk shompa,

²⁴gühshuk peipüthüi chingnyü mongeipü shennyak hük vamja-i ee, hatü jomi büpa kü, “Ham kü hapa chingnyü mongei shühen lem hushih hatü hami nüng kü meheyao ten nedükpih” shei e.

²⁵Hanangkü büpai jom kü chingei aonghen lem hushuoh, hatü jomi hapa chingnyü hah, shejao jomi hapa shennyak hatü jom shem am peü yangei tuh.

²⁶Hanangkü hapa shennyak Hit kahdokei daiyei chingnyü hük ling, hatü hapa kü Luz shei men, hatü shinnyih thahshi hapa men nyüknyüke.

²⁷Manasseh jati Beth-Shean, Taanakh, Dor, Ibleam hatü Megiddo chingnyüthü kü nyupü nanglakthü nechangtük; Kanan am nedoh-i halei nyu.

²⁸Mechem Israel am wong koh-ei leipa, jomi Kanan am kü ngaüngei douwong dükhü shejao kahdok kübü payü nechangtük.

²⁹Ephraim jati Gezer chingnyü kü nyupü Kanan am nechangtük shejao Kanan amao jom mü chemi Gezerlei angteke.

³⁰Zebulun jati Kitron hatü Nahalol chingnyü nyi kü nyupü nanglakthü nechangtük, shejao jom mü chemi Kanan amao angteke, hatü ngaüngei jomi dou dükhü.

³¹Asher jati Akko, Sidon, Ahlab, Akhzib, Helbah, Aphek hatü Rehob chingnyüthü kü nyupü nanglakthü nechangtük.

³²Asher ami halei nyupü Kanan am nechangtükpü nangkü jom mü chemi angteke.

³³Naphtali jati Beth-Shemesh hatü Beth-Anath chingnyü nyi kü nyupü nanglakthü nechangtük, shejao halei nyupü Kanan am mü chemi nyu, shejao ngaüngei jomei dou dükhü.

³⁴Amor ami Dan jat kahjilei neyühah-i phaüshang kahmükei tuh.

³⁵Amor ami nedoh-i Aijalon, Shaalbim hatü Heres Kahshangei nyu, shejao mechem Ephraim hatü Manasseh jat nyi wong koh-ei leipa, Amor amü ngaüngei jomei dou dükhü.

³⁶Amor amei viongü Akrabbim lembaong kübü aongpü Sela peih-ei nyuteke.