Read Phom Naga SHAHPHENBÜTHÜ 10 Bible Online

SHAHPHENBÜTHÜ 10 - Phom Naga bible

SHAHPHENBÜTHÜ 10

¹Abimelekh didaipheikü phaüshang kahmük Ephraim kü Shamirlei nyupü Issakhar am phang Dodolei cheha Puah, Puahlei cheha Tola-i Israel am yanghen vam.

²Büpai Israel am vangbong hapüjem thahshi müteke; hapheikü büpa di, hatü Shamirlei mangh vüteke.

³Büpa pheikü Gilead am Jair vam, hatü büpai Israel am vangbong hapünyi thahshi müteke.

⁴Büpalei yeshangthü hapüan nyu, hatü jom peüi gadu hapüan müteke. Gilead kahdokei nyupü ching hapüan thahshi jomphongei lakmongei nyu, hatü hapa chingthü kü Havvoth-Jair shei shinnyih thahshi nyüknyüke.

⁵Jair di, hatü büpa Kamonlei mangh vüteke.

⁶Shao Israel ami SHEMBÜPA touei mepa mang, ha dük, hatü Israel ami Baal hatü Astartes kahvangthü, Aram amei kahvangthü, Sidon amei kahvangthü, Moab amei kahvangthü, Ammon amei kahvangthü hatü Philistia amei kahvangthü kü khüm. Israel ami SHEMBÜPA betüktü büpa chongnephopü nangkü,

⁷büpai jom kü mongshih, hatü Philistia hatü Ammon ami jom neütük,

⁸hatü jomi hapa vangbong Israel am ngümei hanghi shuoh. Amor kahdok Jordan heongphi Gileadei nyupü Israel am kemei kü vangbong anpüshet thahshi hanghi shuoh.

⁹Ammon ami Judah, Benjamin hatü Ephraim phangthü mü hokhen Jordan yung homei heih, hatü Israel am longi hanghi kü nyu.

¹⁰Hahepak kü Israel ami SHEMBÜPA kü, “Hamphongi nüng khüei mang thahteke; mehenangkü hamphongi hamei Kahvang tuhphongtü Baal kahvang khümteke” shei e.

¹¹SHEMBÜPAi Israel am kü jangei, “Mechem Ijip am, Amor am, Ammon am, Philistia am,

¹²Sidon am, Amalek am, hatü Maon ami amphong kü shüveipa, hatü ammi ngei kü nyükshingkü ngei jomei lakmong leipü am neyangangpü je?

¹³Shejao ammi ngei yakphongtü lebü kahvangthü chongphopü nangkü ngei hajük kü amphong neyangpih.

¹⁴Daiyei ammi jehahpü kahvangthü kü nyükeishuoh; am ponghahpü nyih jomi am nyemyangpha” shei e.

¹⁵Shejao Israel ami SHEMBÜPA kü, “Ham mang thahteke; nüng kü mepa mei, ha dükshih, shejao shinnyih ham yangshih” shei e.

¹⁶Hanangkü jomphong jom toueipü kung amei kahvangthü yaktüktü SHEMBÜPA kü khüm, hatü büpai Israel am ponghahpü kü veishi nenyuaok.

¹⁷Hahepak kü Ammon ami vehok phunglang temtü Gileadei baümtap ve; Israel amao chemi peiyei Mizpahlei baümtap ve.

¹⁸Gilead am veshan mübüthü hüki hük mü, “Ammon am mü hokhen üpai shong panghenang? Hapa shennyakü Gilead am peü shak kü shangjing vaihühen” shei etei.