Read Phom Naga SHAHPHENBÜTHÜ 13 Bible Online

SHAHPHENBÜTHÜ 13 - Phom Naga bible

SHAHPHENBÜTHÜ 13

¹Shao Israel ami SHEMBÜPA touei mang thah; hanangkü SHEMBÜPAi jom Philistia amei lak kü vangbong pinyi shingvaishi shuohtük.

²Hahepak kü Zorah am shennyak hük Dan phang am meni Manoah shei nyu. Büpalei chenyühayü hapeü nebüh-i nyülan vaishi nyu.

³SHEMBÜPAlei vangsho phongshan pinnyü touei peiyei, “Nüngü nyülan khih, shejao nüng büm nekongi leihen hatü yeshang hük bühhen.

⁴Hanangkü nüngi yiü teying, nevaijü nedaünelangpü hahying meheyao tehah;

⁵mehenangkü nüng büm nekongi leihen hatü yeshang hük bühhen. Büpalei sho lanshei nekuphen; mehenangkü hapa naü-ü bühhinüng Kahvang kü lanei shuohtükpü Nazirit shennyak hük vaihen, hatü büpai Philistia amei lak kübü Israel am yanghen chongpangkahen” shei e.

⁶Hahepak kü hapa nyühai chepaha touei heih-ei büpa kü, “Kahvang shennyak hük ngei touei peiküpeih, hatü büpayü veiheni Kahvangei phongshan kei nyemshi shüke; büpa kü meleipü peiküpa shei ngei nepheshuoh-angpih, hatü büpai büpalei men ne-ephaangpih;

⁷shejao büpai ngei kü, ‘Nüng büm nekongi leihen hatü yeshang hük bühhen hih. Shaang mü leitü yiü teying, nevaijü nedaünelangpü hahying meheyao tehah; mehenangkü naü-ü bühpü nyih kübü dipü thahshi Kahvang kü lanei shuohtükpü Nazirit shennyak hük vaihen’ shei ephopeih” shei ejateke.

⁸Hahepak kü Manoah-i SHEMBÜPA kü, “SHEMBÜPA, nüngi shompü Kahvang shennyak shao ham touei shomshih, hatü anghen nyupü naü mekei jungeilangei laonghen ha ham kü nyuhshih” shei phopei e.

⁹Kahvangi Manoah-i epü dan, hatü pinnyü kahlei nyushingkü Kahvang phongshan shao pinnyü touei pei, shejao chepaha Manoah pinnyü mü nenyu.

¹⁰Hanangkü nyühanyüi mokei chepaha kü, “Nyih hük ngei touei peiküpü shennyak hammü nyüke” shei eshuohteke.

¹¹Manoah-i layaongei chenyüha pheikü mü, hatü hapa shennyak touei peiyei büpa kü, “Ngelei shembünyü mü shah eteipeyü nüng hiang?” shei phe. Büpai, “Ngei hih” shei jangei e.

¹²Hanangkü Manoah-i büpa kü, “Nüngi epü shahthü mechem dhaümkahen, hapa naü-ü mekeipü yangnyu nyuhen hatü mehe dou dükkahen?” shei phe.

¹³SHEMBÜPAlei phongshani Manoah kü jangei, “Ngei epü lemphüli anyühai kenhingei dükhütuh.

¹⁴Nyalingngupai kübü vampü meheyao pinnyüi nehahhen, nevaijü nedaünelangpü hahying meheyao nehahneyinghen. Ngei epü lemphüli pinnyüi dükhen vongbong” shei eteke.

¹⁵Manoah-i SHEMBÜPAlei phongshan kü, “Henji-i yum cheha hük jüei nemnokününg nüng danei chongkütuh” shei e.

¹⁶Shejao SHEMBÜPAlei phongshani Manoah kü, “Nüngi ngei danei tuhhahjao ngei ammei hahying meheyao nehahpih, shejao nüngi jakpü moila shuohhüjema, SHEMBÜPA kü yah-eishuoh” shei e. (Mehenangkü hapayü SHEMBÜPAlei phongshan khih shei Manoah-i nenying.)

¹⁷Hahepak kü Manoah-i SHEMBÜPAlei phongshan kü, “Nüngi epü shahthü jiüei dhaümküjü nüng kü dhüm huhen shingvaishi nüngei men mekeiang?” shei phe.

¹⁸Shejao SHEMBÜPAlei phongshani büpa kü, “Nüng ngelei men mehekei phenya? Hapa nyinghenü longi thamabenüng nyüpeih” shei e.

¹⁹Hanangkü Manoah-i yum cheha hük yah-ei hahying moila mü yaongnyü hük shangkü SHEMBÜPA kü moila shuoh, hatü Manoah hi chenyüha nyi veishi nyushingkü SHEMBÜPAi yashanyale dou dük.

²⁰Mechem moidü leipü awlom vangsho lemei aongpa, SHEMBÜPAlei phongshanao awlom mü lepei aongdai. Ha eeyei Manoah hi chenyüha nyi kahdokei aümei sha.

²¹SHEMBÜPAlei phongshan sheyü Manoah hi chenyüha nyi touei nepeija. Hapheikü mon hapayü SHEMBÜPAlei phongshan khih shei Manoah-i nying.

²²Manoah-i chenyüha kü, “Jiyü dihen shepü khih; mehenangkü ji-i Kahvang eepü khih” shei ejateke.

²³Shejao chenyühai jangei, “SHEMBÜPAi ji jütükhen vailangmeyü jenei lak kübü jakpü moila hatü hahying moila neyahlangphahen vaipeih, nevaijü büpai ji kü ha douthü nehuphahen nevaijü hapa keipü shah ne-ephahen” shei eteke.

²⁴Hapa nyühai yeshang hük büh, hatü büpa kü Samson shei men. Hapa naü longteke, hatü SHEMBÜPAi moihiman,

²⁵hatü mechem büpa Mahaneh-Danlei Zorah hi Eshtaol nyi aa kü nyupa, SHEMBÜPAlei laanghai büpa kü dou dükhen chongpang.