Read Phom Naga SHAHPHENBÜTHÜ 16 Bible Online

SHAHPHENBÜTHÜ 16 - Phom Naga bible

SHAHPHENBÜTHÜ 16

¹Nyih hük Samson Gazalei heihshingkü halei büm yupü nyüha hük heüei pinnyü mü paümteke.

²Gaza ami, “Samson halei nyüke” shei baongteitü thaiyei hapa shing shinei yaongtü vangnyak büpa vamjahen shei peshadenei yomshi paümteke. Jom vangnyak ngeü nemoh-i, “Vangngaijü jeni büpa jühen” shei eteitü paümteke.

³Shejao Samsoni halei nyak jiam thahshi mon paümtü büpai paoei chingnyü penyüsha kü düktü ha mü chemi shaden, shemnyü halei yüppü tala peü omshi leühteke. Büpai hathü büpalei bhagchongei paitü Hebron philei meepü shangtaolei aong.

⁴Hapheikü Samsoni Sorek Kahjilei nyupü nyüha hük meni, Delilah mü bamteiteke.

⁵Philistia am ongthü jom nga peiyei pinnyü kü, “Samson mekei etü meleipü wong dangnya, hapa shahjo nüngi büpa kü yawh-ei nyingkütuh; shejüang jeni büpa yepei shahen, hatü jeni büpa wong nekoh-i leitükhen. Nüngi hapakei dükjema ham peüi nüng kü ngin haja hük mü kho hükbaong yahphahen hih” shei eshuohteke.

⁶Hanangkü Delilah-i Samson kü, “Nüngi hajük wong meleipü dangnya, hapa shahjo ngei kü eshih. Hanei ami nüng yepei shatü wong nekoh-i leitükhüjü mekei mekei dükhen eshih” shei eteke.

⁷Samsoni pinnyü kü, “Hanei ami ngei kü nevanpü pülahvü nyet yah-ei shaphüjema, ngeiyü lebü shennyak kei-üng wong nekoh-i leikahen hih” shei e.

⁸Hanangkü Philistia am ongthüi nevanpü pülahvü nyet yah-ei peiyei Delilah kü shuoh, hatü pinnyüi Samson kü meishi shateke.

⁹Pinnyüi dungnukei shennyak hanei joei tuhtü pinnyüi, “Samson! Philistia am peikünyüke!” shei büpa kü nyük. Shejao aw kü jakjü vilah phenpükei hapa pülahvü phendai. Hanangkü jomphongi büpa kü wong meleipü vamnya, neyepaok.

¹⁰Shao Delilah-i Samson kü, “Nüngi ngei kü lueilemnyu khih; nüngi ngei kü shahshem epü khih; nüng kü mekei shahen eshih” shei e.

¹¹Büpai pinnyü kü, “Hanei ami ngei kü chemao mangshapü vü yah-ei shaphüjema, ngeiyao lebü shennyak kei-üng wong nekoh-i leikahen hih” shei e.

¹²Hanangkü Delilah-i vü ja hanei yah-ei büpa kü meishi shateke. Pinnyüi dungnukei shennyak hanei joei tuhtü pinnyüi, “Samson! Philistia am peikünyüke!” shei büpa kü nyük. Shejao büpai hapa vü vilah phenpükei phentük.

¹³Delilah-i Samson kü, “Nüngi shaang thahshi ngei kü shahshem peilei ephünyu khih, hatü shahhing ne-ephünyu” shei e. Büpai pinnyü kü, “Nüngi ngelei sho lem nyet vü mü lepei bhawtü deiyei kojal kü nyeanei shatükjema, ngeiyao lebü shennyak kei-üng wong nekoh-i leikahen hih” shei eteke.

¹⁴Hanangkü mechem büpa shidaipa, Delilah-i büpalei sho lemnyet vü mü lepei bhawtü, kojal kü nyeanei shateke. Pinnyüi büpa kü, “Samson! Philistia am peikünyüke!” shei büpa kü nyük. Shejao büpa paoshingkü vü mü kojalao leüh-ei paoteke.

¹⁵Hahepak kü pinnyüi büpa kü, “Nüngi ngei kü bamnyeih shei mekei enya? Hapai jempabü nüngi ngei kü shahshemi lueilempeih hatü nüngi wong mekei dangnya, ha ngei kü ne-epeih” shei eteke.

¹⁶Hapa keiha nyihaongale pinnyüi büpa kü dihen mü tengao tengshi yawhteke.

¹⁷Hanangkü büpai pinnyü kü lemphü shahjo eteke. “Ngelei sho chemao mangkup; mehenangkü ngeiyü bühhinüng hayaoha Nazirit shei Kahvang shingvaishi lanei shuohtükpü yangnyu hih. Ngelei shuo kuptükjema ngelei wong mahdaihen hatü ngei lebü shennyak kei-üng wong nekoh-i leikahen hih” shei eteke.

¹⁸Mechem büpai shahjo ngaiyei hingshangi eteke shei Delilah-i nyingpa, pinnyüi Philistia ongthü touei phongmokbüthü shomei, “Chem shao peikütuh; büpai ngei kü lemphü ekütepih” shei nyük. Hanangkü Philistia am ongthüi ngin hütü nyokei peiteke.

¹⁹Delilah-i yawh-eiyangei pinnyülei shüngdok shangei Samson shinshihtü shennyak hük nyükei büpalei shodü nyetphen kuptük, hatü büpa wong nekoh-i lei; mehenangkü büpalei wong mahdai.

²⁰Hahepak kü pinnyüi, “Samson! Philistia am peikünyüke!” shei büpa kü nyük. Büpa shipü pao, hatü sheleipü kei-üng daiaokhen shei deihshejao Kahvang büpa toueipü yandaiteke shei büpai nenying.

²¹Hahepak kü Philistia ami büpa yepei sha, hatü mük luktüktü Gazalei müei yiü. Büpa kü melangnyiam vü shatü khoklatei kon kü hah ngümhüei angteke.

²²Shejao büpalei sho kuptükpheikü shao shangjing kü sho neenteke.

²³Shaang Philistia am ongthüi jomei Dagon kahvang kü moila longpü shuohhen hatü mongongteihen shingvaishi thai. Jomphongi, “Jenei kahvangi jenei vepa Samson jenei lak kü yahphüteke” shei kesho lok.

²⁴Mechem nanglakthüi büpa eepa, jomi jomei kahvang kü menvih-ei eteke: “Jenei kahmük lomohhüpü hatü nanglak longi jütükpü jenei vepa, jenei kahvangi jen kü shuohteke.”

²⁵Mechem jom mongongmongleyei nyupa, jomi, “Samsoni jen kü nyemnyienkününg müei ankei” shei e. Hanangkü jom khoklat leipü Samson nyükei anei Samsoni jomphong kü nyienjateke. Jomi büpa shemnyü hi shemnyü nyi aa kü yaonghü.

²⁶Samsoni büpa kü laki düktü müteipü naüha kü, “Ngei nyaanghen shingvaishi hapa shem kü shoungpü shemnyüthü touei deishih” shei e.

²⁷Hapa shem kü nyüha baha maei thaiyei nyu; Philistia amei ongthü peü halei nyu, hatü shem adokei Samsoni nyienjapü kü veiyei shennyak nyüha baha haja jem hükshing nyuteke.

²⁸Hahepak kü Samsoni SHEMBÜPA kü, “Oh Jeiyong SHEMBÜPA, ngei deih-ei dangtuh. Oh Kahvang, chingmeilemlingei ngei kü shao chem wong yahshih; ngelei mük nyiphen luktükpü nangkü ngei shao chem Philistia am kü bhüh yemshah” shei phop.

²⁹Hahepak kü Samsoni shem kü shoungpü jiam shemnyü nyi aa kü lak hük hüki shemnyü hükbaong kü dük,

³⁰hatü ngeüwong anei, “Ngeiyao Philistia am mü nyemdidai!” shei etü büpalei wong kempai hungshuohteke, hatü hapa shem shemmei shaei halei nyupü ongthü hatü nanglakthü peü kü chetteke. Samsoni büpa yemmü nyushi jüpü mü büpa dishingkü nyeishi shennyakthü jüteke.

³¹Hahepak kü büpalei jeihinaüthü hatü chepa amei shem am kemei büpalei mahng yahnüng yiü. Jomi büpalei mahng yah-ei leiyei chepa Manoahlei mahngchongei Zorah hi Eshtaol nyi aa kü vü. Büpai vangbong kukha thahshi Israel am shahphenteke.