Read Phom Naga SHAHPHENBÜTHÜ 18 Bible Online

SHAHPHENBÜTHÜ 18 - Phom Naga bible

SHAHPHENBÜTHÜ 18

¹Hathü nyih kü Israel kü ong nenyuham, hatü hathü nyih kü Dan am phangi jom nyuhen shinghiphei yemei longtei; mehenangkü hapa nyih thahshi Israel jatthü nyuhen shinghiphei hanei nenyu.

²Hanangkü Dan am jati monglongpü shennyak nga jom shemthü kübü jeyei kahdok veihen Zorah hatü Eshtaol kübü shom, hatü jomi hathü kü, “Daituh, hatü kahdok veiyei leikei” shei eteke. Hathü shennyakthüi phaüshang kahmük Ephraim thah-ei Mikah am shemei ngoiteke hatü ha ya halei paüm.

³Mechem jomphong Mikah am shemei paümpa, jomphongi Levi am nethepalei ngeü danei jomphongi heih-ei büpa kü, “Nüng hatouei üpai müei peipa? Nüng hatouei mehe düknya? Nüng hatouei mehe heshap nyunya?” shei pheteke.

⁴Büpai jomphong kü, “Mikah-i mehe dük ha eshuohteke, hatü büpai ngei kü lop shuohnyeih hatü ngei büpalei ngongpa vainyüpeih” shei eteke.

⁵Hahepak kü jomphongi büpa kü, “Hamphongi deihshi daipü yendai lem kü aokpü dangülashang SHEMBÜPA kü phekütuh” shei e.

⁶Ngongpai jomphong kü, “Amphong mong teshang; amphongi deihshi daipü lem kü SHEMBÜPAi mongpü nyüke” shei e.

⁷Hanangkü jom shennyak nga daiyei Laish ngoiyei veishuohshingkü halei nyupü shennyakthüyü Sidon am keiha chingmeivangmei kü nyempühanpü neshiü, kahmük kü taopü neshiü, mophimo-i maei nyuteke. Nyeinya vaishi jomü Sidon am mü longi taishi hatü lebü shennyakthü mü meheyao shenteipü neshiüi nyuteke.

⁸Mechem jom Zorah hatü Eshtaolei nyokei leijapa, jeihinaüthüi, “Am yen daipü shah-om mekeiang?” shei phe.

⁹Jomphongi jangei, “Kei, jen daiyei jom hahtükshah! Hapa kahdokü longi meishi eepeih. Meheyao nedüki hamü nyuhen je? Tejü-ükei, lomi daishah hatü hapa ching hahshah.

¹⁰Mechem ammi hapa ching ngoihenshang, lanshei lapja, mih kü mong nelempü neshiüpü nanglakthü eehen hih. Hapa kahmükü longi longshi hatü mepaiyao netaonenang; Kahvangi hapa kahdok ammei lak kü shuoh-ei nyüpeih” shei e.

¹¹Hanangkü Dan am shennyak kho vok vehok phunglang temei Zorah hatü Eshtaol kübü layaong,

¹²hatü aongei Judah kahdok Kiriath-Jearim heshü philei baümtap veteke. Hanangkü hapa shing kü Mahaneh-Dan shei shinnyih thahshi nyüknyüke.

¹³Hatoueipü jomi phaüshang kahmük Ephraimei aongei Mikah am shemei pei.

¹⁴Hahepak kü Laish kahdok veinüng daipü shennyak nga-i jomei jeihinaüthü kü, “Hapa shemei ngongpalei ow, shemongei khümteipü kahvang hatü ngini jümei lingpü lebü lajei nyupü nyingla? Ammi hapa kü mehe dükhen deihhümao” shei e.

¹⁵Hanangkü jomi Mikahlei shem Levi am nethepa nyushingei shüei büpa kü selam vaiteke.

¹⁶Dan am shennyak kho vok vehok phunglang temtüktü shadenei yaong.

¹⁷Kahdok veinüng daipü shennyak nga ngongpa hatü vehok phunglang temtükpü shennyak kho vok shadenei yaongphongtü shem mongei shüei lajei, ngongpalei ow hatü shem mongei khümteipü kahvang yah-ei vam.

¹⁸Mechem shennyakthüi Mikahlei shem mongei shüei lajei, ngongpalei ow, hatü shemongei khümteipü kahvang yah-ei vamjapa, ngongpai jomphong kü, “Am mehe düknya?” shei phe.

¹⁹Jomi büpa kü, “Nenmü chongkei; shah phahükao te-ekei. Hamphong mü huoi hatü nüng hamei pa hatü ngongpa vaikei. Nüng keyü shennyak hükei ngongpa vaipü hi Israel jat hükei ngongpa vaipü meipüang?” shei e.

²⁰Büpai hapa shah kü mongmei, hatü büpai büpalei ngong-ow, shemongei khümteipü kahvang hatü lajei yah-ei jom mü müei lüdai.

²¹Hanangkü jomei hahimoithü, yemhimakthü hatü jomei douhinangthü shelei shaongtü jom layaongei dai.

²²Jomphong Mikahlei shem kübü kansho hük lüdaipheikü Mikah-i chingyowthü nyükei thaitü changei shaei jom phei thah.

²³Jomi Dan am kü lenyaki shajashingkü Dan am yaakei leiyei Mikah kü, “Hapakei khong mütü shakahen mü nüng meheang?” shei phe.

²⁴Mikah-i jangei, “Amphongi ngei linghahpü ngelei kahvang, ngelei ngongpa yah-ei lüdaiyaki ngei kü, ‘Nüng meheang?’ shei mehekei enya? Ngei kü mehe aoei tuhphongpa?” shei e.

²⁵Dan ami büpa kü, “Nüng ahshi ngeü nemohjü meihen, hei nevaijema mongdang nemeipü shennyak hanei vamei nüng hatü am shem kemei jütükhennenmü nyutuh” shei eteke.

²⁶Hapheikü Dan am lüdai. Mikah-i jomü longi wong kohshi khih shei nyingei büpa nyokei shemei leidai.

²⁷Dan ami ngongpa hatü Mikah-i linghahpü douthü yah-ei daiyei nenmü chingmeivangmei kü, mongnelemteipü neshiüpü Laish ching ngoiyei hapa ching hahteke. Jomi shennyakthü jü, hatü ching kü awi haptük.

²⁸Jomphong yangshuohhen üamao neshiü; mehenangkü jomü Sidon am mü longi taiteishi hatü lebü shennyakthü mü meheyao shenteipü neshiüi nyuteke. Hapa chingü Beth-Rehob yopailei kahji hükei nyuteke. Dan ami hapa jila ja leiyei lingtü halei chingchingei nyu.

²⁹Jomphongi hapa Laish ching kü Jakobei cheha jomei chebülei men Dan shei men.

³⁰Dan ami halei jomi khümhen lajei tuh, hatü Jonathan, Gershomei cheha, Mosalei chehüi Dan jat kü ngongpa vaiteke, hatü wüpküpei yah-ei mangdai thahshi büpalei chehathüi ngongpathü vaiteke.

³¹Jomi Kahvang khümhen Shilohlei nyupü thahshi Mikahlei lajei düngei halei tuhteke.