Read Phom Naga SHAHPHENBÜTHÜ 2 Bible Online

SHAHPHENBÜTHÜ 2 - Phom Naga bible

SHAHPHENBÜTHÜ 2

¹Shaang SHEMBÜPAlei phongshan Gilgal kübü Bokhimei aong, hatü Israel am kü, “Ngei am Ijip leipü müei daiyei ngei ammei bühipathü kü lahpü kahdokei peipeih. ‘Ngei am mü vangpüshuwpü nemangpih’ shei etepih.

²Ammi hapa kahdok kü nyupü nanglakthü mü vangpüshuwpü teling. Ammi jomei moidüthü bentüktuh shei etepih, shejao ammi ngei epü nebang. Mehekei ammi hapakei dükpa?

³Hanangkü shaang ngei am kü eshah, ngei hathü am toueipü nechangtükhen, shejao jom ammei vemang leihen, hatü jomei kahvangthü ammei aethitai vaihen” shei eteke.

⁴Mechem SHEMBÜPAlei phongshani ha eyei kempa, Israel am kemei vaüei thepteke.

⁵Hanangkü hapa shing kü Bokhim shei men, hatü hatouei jomi SHEMBÜPA kü jakpü moila shuoh.

⁶Mechem Joshua-i Israel am yanshihpa, jom laophü laophülei mükjüp kahdok yahhen leikemteke.

⁷Joshua yemmü nyupü thahshi hatü Israel am shingvaishi SHEMBÜPAi yashanpü dou dükpü Joshua diphei kao nyupü mübüthü nyupü thahshi nanglakthüi SHEMBÜPA chongphoteke.

⁸Nunei cheha Joshua, SHEMBÜPA chongphopü nyübüh vangbong kho hük mü an nyushi di.

⁹Hanangkü jomi büpa Gaash Kahshang apshaphi phaüshang kahmük Ephraim kü büpalei mükjüp kahdok Timnah-Heres shei epü shingei mahng vüteke.

¹⁰Hapa denshat kübü shennyakthü peü didai, hatü denja pheihathüi Israel am shingvaishi SHEMBÜPAi mehe dük, ha betük.

¹¹Hahepak kü Israel ami SHEMBÜPA touei mang thah, hatü Baal kahvang chongphoteke.

¹²Jomi SHEMBÜPA, üpai jom Ijip leipü müei leipa, hapa Kahvang betük; jom ngeih-ei shonei nyupü shennyakthülei kahvangthü phei mü hatü khüm, hatü jomi SHEMBÜPA mongshih vamhü.

¹³Jomi SHEMBÜPA yakphong, hatü Baal kahvang hatü Astartes kahvang khümei chongphoteke.

¹⁴Hanangkü Israel am khüei SHEMBÜPA mongshih vam, hatü büpai jom aetpüshepü hatü gühpathülei lak kü shuohtük. Büpai jom ngeih-ei shonei nyupü vepathülei lak kü shuohtük, hatü jomi vepathü khüei nehokaok.

¹⁵Israel am vehok kü daishan ieyei SHEMBÜPAi jom kü epü keiha büpa jom khüei yaongdai. Jom longi lomoh aühaü kü nyuteke.

¹⁶Hahepak kü SHEMBÜPAi jom aetpüshepüthülei lak kübü yanghen shingvaishi shahphenbüthü jeteke.

¹⁷Shejao jomi shahphenbüthülei shah-ao nebang, shejao jom nying kü lebü kahvangthü mü mükbongjuyungei hathü kü khümteke. SHEMBÜPAlei ven bangei kampü chebü chepalei lem kü nekami lomi lemnyong kü lüdaikem.

¹⁸Mechem SHEMBÜPAi jom shing shahphenbüthü jeyei ngaipa, SHEMBÜPA shahphenbüthü mü nyu, hatü shahphenbüthü yemmü nyupü thahshi büpai jom vepathülei lak kübü yang; mehenangkü SHEMBÜPAi jom mih phangkü shüveidoidei hatü hanghi ponghahpü kü shinshangei deih.

¹⁹Shejao mechem shahphenbüthü didaikempa, jomi lebü kahvangthü phei müei hathü kü khümei jomei bühipa mao nemeipüba lemnyong kü kam, hatü nemeipü lem, douten yakphonghen jomi nemong.

²⁰Hanangkü SHEMBÜPAi Israel am khüei mongshih vam hatü büpai e, “Mehenangkü hapa nanglakthüi ngei chebü chepa kü shuohpü vangpüshuwpü mangtük, hatü ngei epü nebangpü nangkü,

²¹Joshua didaishingkü tuhphongpü jatthü hükao ngei jom toueipü nechangtükpih.

²²Chebü chepa kei ngelei lem kü nemühen hi mühenshang dokhen shingvaishi ngei hathü noteihen” shei eteke.

²³Hanangkü SHEMBÜPAi ha jatthü kahdok kübü nechangtük; büpai Joshua kao aokpü nedanghü.